پرەزيدەنت قاسىم-جومارت كەمەلۇلى توقاەۆتىڭ حالىققا سوڭعى جولداۋىمەن تانىسىپ وتىرعاندا ويىما مىنا حالىق ماقالى ورالا كەتتى:
وراعىڭ وتكىر بولسا,
قارىڭ تالمايدى.
وتانىڭ بەرىك بولسا,
جاۋىڭ المايدى.
ءيا, پرەزيدەنتتىڭ سوڭعى جولداۋىن وقىعاندا بۇل ماڭىزدى قۇجاتتىڭ يدەياسى, نەگىزىنەن, ەلدىڭ بەرىك بولاشاعى مەن حالقىنىڭ ءبىرتۇتاس ۇلت بولىپ قالىپتاسۋدىڭ قام-قاراكەتى ەكەنىنە كوز جەتكىزەسىز. اسىرەسە جولداۋداعى ءۇشىنشى باعداردا بۇل قاعيدا تايعا تاڭبا باسقانداي ايقىن كورىنىس تاپقان.
ەلىمىزدىڭ باستى قۇندىلىعى – ادام جانە ونىڭ قۇقىعى ەكەنى اتا زاڭدا انىق كورسەتىلگەن. سوندىقتان ۇلتتىق بايلىقتى تەڭ ءبولۋ جانە بارشاعا بىردەي مۇمكىندىك بەرۋ ەكىنشى رەسپۋبليكانى نىعايتۋدىڭ باستى ماقساتى بولماق. حالىق اۋقاتىنىڭ ويداعىداي جوعارى بولعاندا عانا قوعام ورنىقتى داميدى. بۇل – ەشبىر دالەلدى قاجەت ەتپەيتىن اكسيوما.
حالىقتىڭ ءال-اۋقاتىن ارتتىرۋدىڭ نەگىزگى فاكتورى جالاقىنىڭ وسۋىنە تىكەلەي بايلانىستى. وسىعان وراي, پرەزيدەنت ق-ج.توقاەۆ ەڭ تومەنگى جالاقىنى 60 مىڭنان 70 مىڭ تەڭگەگە دەيىن كوتەرۋدى ورىندى دەپ سانايمىن. بۇل جيىنتىق زەينەتاقىنى 2025 جىلعا دەيىن 27 پايىزعا كوتەرۋگە مۇمكىندىك بەرەدى.
ايتا كەتۋ كەرەك, پرەزيدەنت ءوز سوزىندە الەۋمەتتىك ماسەلەلەردىڭ ۇلكەن ءبىر بولىگىن كوتەردى. سونىڭ ءبىرى – سوڭعى جىلدارى كۇن تارتىبىنەن تۇسپەي كەلە جاتقان ايەلدەردىڭ زەينەتكە شىعۋ جاسى. ول 2028 جىلعا دەيىن 61 جاس بولىپ تىركەلمەك. بۇل شەكتەۋ – قازىرگى ەرلەردىڭ زەينەتكە شىعۋ 63 جاسىنان ەكى جاس كەم دەگەن ءسوز. سونىمەن بىرگە ايەلدەرگە جاسالعان جاقسىلىق وسىمەن شەكتەلمەيدى. 2023 جىلدىڭ 1 قاڭتارىنان باستاپ بالا كۇتىمى بويىنشا تولەمدەر ءبىرجارىم جاسقا دەيىن ۇزارتىلدى. بۇل شىن مانىندە انالارعا سابيلەردىڭ ەڭ ماڭىزدى جاسىندا بالالارمەن بىرگە بولۋعا مۇمكىندىك بەرەدى. وسى شارالار جاس وتباسىلارعا, اسىرەسە جاس انالار مەن سابيلەرگە جاسالعان مەملەكەتتىڭ قامقورلىعى دەپ ءبىلۋ كەرەك.
مەملەكەت باسشىسى قاسىم-جومارت توقاەۆتىڭ جولداۋىنداعى ەڭ كۇتپەگەن, ماڭىزدى ۇسىنىستاردىڭ ءبىرى ۇلتتىق قور-بالالارعا تۇبەگەيلى جاڭا باعدارلاماسىنىڭ «بالالار جىلى» باستالعانى تۋرالى حابارلاندىرۋ بولدى. پرەزيدەنت بالالاردىڭ ارنايى جيناقتاۋشى شوتتارىنا ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن مەرزىمىنەن بۇرىن الۋ قۇقىعىنسىز, 18 جاسقا تولعانعا دەيىن اۋدارۋدى ۇسىندى. كامەلەتكە تولعاننان كەيىن جيناقتالعان سوما تۇرعىن ءۇي ساتىپ الۋعا مۇمكىندىك بەرەدى. پرەزيدەنتتىڭ پىكىرىنشە, بۇل قاراجات وسكەلەڭ ۇرپاققا ەرەسەك ومىرگە ناقتى جولداما بەرەدى. ۇلتتىق بايلىقتان تۇسكەن پايدانى وسكەلەڭ ۇرپاق ءۇشىن كادەگە جاراتۋ قازاق قوعامىنىڭ كوپتەن بەرى ايتىپ كەلە جاتقان ۇسىنىستارىنىڭ بىرەگەيى دەۋ كەرەك.
جولداۋمەن تانىسا وتىرىپ, مەن ەل جاستارى مەن بولاشاق ۇرپاق ءۇشىن جۇزەگە اساتىن يگىلىكتى شارالاردىڭ وسىمەن ءتامام بولمايتىنىنا نازار اۋداردىم. سونىڭ ءبىر ايعاعى – پرەزيدەنت ءبىلىم, عىلىم, جاستار تاربيەسىنە باسىمدىق بەرۋى. مىسالى, كەلەسى جىلى 100 مىڭ جاس جۇمىسپەن قامتىلادى جانە ولارعا جەڭىلدەتىلگەن تارتىپپەن جىلدىق ءوسىمى 2,5 پايىزدان اسپايتىن شاعىن نەسيە بەرىلەدى دەدى. بۇل شارالار قوعامنىڭ بارىنشا ۇيلەسىمدى ءارى ادىلەتتى بولۋىنا ىقپال ەتەتىنى ءسوزسىز. جولداۋدا مەكتەپ جانە بالاباقشالار ماسەلەسى دە پرەزيدەنت نازارىنان تىس قالمادى. «جايلى مەكتەپ» ۇلتتىق جوباسى دا حالىق كوڭىلىنەن شىقتى دەپ باتىل ايتۋعا نەگىز بار. بۇل نىسان ءتۇپتىڭ تۇبىندە حالىقتىڭ مەنشىگىنە اينالادى.
ەرەكشە ايتا كەتەتىن ماسەلە – پرەزيدەنت ق.ك.توقاەۆتىڭ جالپىحالىقتىق رەفەرەندۋمدا قابىلدانعان كونستيتۋتسيالىق رەفورمالاردىڭ ناتيجەسىندە اتا زاڭعا سايكەس جەر مەن تابيعي رەسۋرستار حالىقتىڭ مەنشىگى بولىپ تابىلاتىنى. ءسويتىپ, مەملەكەت باسشىسى وتىز جىلدان بەرى ايتىلىپ, بىراق ورىندالماي جۇرگەن ءبىر تۇيتكىلدى ماسەلەنىڭ ءتۇيىنىن شەشتى. اتا مەكەننىڭ قاسيەتتى جەرىنە ەندى ەشكىم زاڭسىز قول سۇقپايدى دەپ سەنگىمىز كەلەدى.
جولداۋدا ول سونداي-اق بۇكىل زەينەتاقى جۇيەسىن قايتا قاراۋ قاجەتتىگىنە باسا نازار اۋداردى. وسىلايشا, زەينەتاقىنىڭ ەڭ تومەنگى بازالىق مولشەرلەمەسى ەڭ تومەنگى كۇنكورىس دەڭگەيىنىڭ 70 پايىزىنا دەيىن, ال ەڭ جوعارى مولشەرلەمەسى 120 پايىزعا دەيىن جەتكىزىلەتىنى اتاپ ءوتىلدى.
حالىقتىڭ قامىن ويلاۋ, ولارعا قامقورلىق تانىتۋ, ساپالى ءبىلم بەرۋ, مەديتسينالىق قىزمەتتەردى جاقسارتۋ, جاستار مەن پەداگوگتاردى قولداۋ سياقتى ماسەلەلەر مەملەكەتتىڭ باستى نازارىندا بولۋى ءتيىس.
سونىمەن بىرگە جولداۋدىڭ ماڭىزدى ۇستانىمى – ەلدىڭ تۇرمىسىن, الەۋمەتتىك جاعدايىن جاڭا كەزەڭ تالاپتارىنا ساي بەيىمدەۋ, ەلدىڭ تۇرمىس ساپاسىن كوتەرۋ, ازاماتتىق قوعامنىڭ بەلسەندىلىگىن ارتتىرۋ يگىلىكتەرىنىڭ جاڭا ساتىسىنا كوتەرىلۋى اۋاداي قاجەت ەكەنى دە جاريا ەتىلدى.
جولداۋ ەلىمىزدىڭ ساياسي ءومىرىن جانداندىرىپ, ەكونوميكالىق-الەۋمەتتىك دامۋىنا تىڭ سەرپىن بەرەتىن ۇلكەن جاڭالىقتارعا تولى بولدى. ەڭ باستىسى, حالىقتىڭ الەۋمەتتىك جاعدايى ءاردايىم مەملەكەتتىڭ باستى نازارىندا قالا بەرمەك. جولداۋدا ايتىلعان جايتتاردىڭ تۇپكى ماقساتى – جۇرتتىڭ تۇرمىسىن جاقسارتۋ, ءال-اۋقاتىن ارتتىرۋ. ساياسي ەكونوميكالىق رەفورمالاردىڭ, يگى باستامالاردىڭ ءبارى وسىعان باعىتتالعان.
سونىمەن قاتار جولداۋدا ساياسي سالانى ءارى قاراي دامىتۋ ماسەلەلەرى دە قامتىلدى. مەملەكەت باسشىسى كەزەكتەن تىس پرەزيدەنت سايلاۋى جانە پارلامەنت ءماجىلىسى مەن ماسليحاتتار سايلاۋى تۋرالى جاريالادى. الداعى كەزەڭدەگى ەلەكتورالدى تسيكلدىڭ مەرزىمىن اشىق جاريالاۋ جاڭا ساياسي مادەنيەتتىڭ كورىنىسى ەكەنى ءسوزسىز. مۇنداي قادام قوعام مەن بيلىك اراسىنداعى سەنىمدى كۇشەيتە تۇسەتىنى انىق.
جاڭارۋ, جاڭعىرۋ تابالدىرىعىندا تۇرعان قازاقستاننىڭ گۇلدەنۋى – بارشامىزدىڭ باقۋاتتى تىرلىگىمىز. ەندەشە, پرەزيدەنت ايتقانداي, «ءبىر جاعادان باس, ءبىر جەڭنەن قول شىعارا» وتىرىپ, جارقىن بولاشاق ءۇشىن جۇمىلا كۇرەسەيىك.
سانسىزباي ەسىلوۆ, نۇر-سۇلتان قالالىق
ارداگەرلەر كەڭەسىنىڭ توراعاسى
