نۇر-سۇلتان قالاسى ءماسليحاتىنىڭ وتىرىسىندا ءماسليحات حاتشىسى ەرلان كاناليموۆتىڭ توراعالىعىمەن بيۋدجەتتىك باعدارلامالار اكىمشىلەرىنىڭ بيۋدجەتتىك-ينۆەستيتسيالىق جوبالارىن قالانىڭ كوممۋنالدىق مەنشىگىنە قابىلداۋ ماسەلەسى قارالدى. نەگىزگى باياندامانى قالالىق اكتيۆتەر جانە مەملەكەتتىك ساتىپ الۋ باسقارماسىنىڭ باسشىسى ەرسىن وتەباەۆ جاسادى.
ونىڭ ايتۋىنشا, بيىل كوممۋنالدىق مەنشىككە جالپى 84 جوبانى قابىلداۋ جوسپارلانعان. سونىڭ ىشىندە كولىك جانە جول-كولىك ينفراقۇرىلىمىن دامىتۋ باسقارماسىنا 28 جوبا تيەسىلى. وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ ەنشىسىندە 38 جوبا, قورشاعان ورتانى قورعاۋ جانە تابيعاتتى پايدالانۋ باسقارماسىندا 2 جوبا, قۇرىلىس باسقارماسىندا 16 جوبا بار. بۇگىنگى كۇنگە 23 جوبا نەمەسە جوسپارلانعان نىسانداردىڭ 22 پايىزى كوممۋنالدىق مەنشىككە قابىلداندى, ال قالعان 61 نىسان وسى جىلدىڭ سوڭىنا دەيىن قابىلدانۋى ءتيىس. جالپى 2020-2022 جىلدار ارالىعىندا بىرقاتار يەسىز ينجەنەرلىك جەلىلەر مەن نىساندار كوممۋنالدىق مەنشىككە بەرىلدى. وعان جۇمسالعان قارجىنىڭ جالپى سوماسى 4,8 ملرد تەڭگەنى قۇرادى.
ودان كەيىن ءتيىستى باسقارمالاردىڭ باسشىلارى كۇن تارتىبىنە شىعارىلعان ماسەلە بويىنشا بايانداما جاسادى. اتاپ ايتقاندا, قۇرىلىس باسقارماسى باسشىسىنىڭ ورىنباسارى جاسۇلان قوجاحمەتوۆ, كولىك جانە جول-كولىك ينفراقۇرىلىمىن دامىتۋ باسقارماسىنىڭ باسشىسى جانسۇلتان ساپارباەۆ, قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى ءاليا قوجاباەۆا, وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى باسشىسىنىڭ ورىنباسارى ەرلان سىدىقوۆ وسى باسقارماعا جۇكتەلگەن جۇمىستار بارىسىمەن تانىستىردى.
بيۋدجەتتىك-ينۆەستيتسيالىق جوبالاردى قالانىڭ كوممۋنالدىق مەنشىگىنە قابىلداۋ جۇمىستارىندا تۇيتكىلدەر جوق ەمەس. ءماسليحات دەپۋتاتتارى پىكىرلەرى مەن ۇسىنىستارىن ايتىپ, ساۋالدارىن قويدى. حاتشى ەرلان كاناليموۆ جىلدار بويىنشا كوممۋنالدىق مەنشىككە قابىلدانباعان جوبالارعا توقتالىپ, قۇرىلىسى اياقتالماعان نىساندار جايىن قوزعادى.
– 2013 جىلعى نىسانداردىڭ ءالى تاپسىرىلماعانىن قالاي تۇسىنۋگە بولادى؟ ماسەلەن, «كوكتەم» قوسالقى ستانتسياسىنىڭ قۇرىلىسى 9 جىلدان بەرى اياقتالماي كەلەدى. وسىعان بايلانىستى وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى قانداي شارالاردى قولدانىپ جاتىر؟ باسقارما ستانتسيا قۇرىلىسىن سوزىپ جىبەرگەن كومپانيانى سوتقا بەردى مە, بۇل كومپانيا جوسىقسىز دەپ تانىلدى ما, وسى ماسەلەنى تالقىلاۋ جانە شەشۋ ءۇشىن كوميسسيا قۇرۋ قاجەت. زاڭناما شەڭبەرىندە ماسەلەلەردى رەتتەۋ مۇمكىندىگى بار. بيىل بيۋدجەتتىك-ينۆەستيتسيالىق نىسانداردىڭ 25 پايىزى عانا كوممۋنالدىق مەنشىككە وتكەن. قالعاندارى تاپسىرىلۋ ۇستىندە نەمەسە ءالى سالىنىپ جاتىر. قابىلداۋدى جەدەلدەتۋ ءۇشىن ءتۇرلى بيۋروكراتيالىق كىدىرىستەردى جويۋ كەرەك. كەيبىر مەملەكەتتىك ورگانداردىڭ زاڭگەرلەرىنىڭ جوسىقسىز مەردىگەرلەرگە تالاپ-ارىزداردى بەرۋ جۇمىسى تومەن دەڭگەيدە. باسقارمالار دەپۋتاتتارعا بيىلعى جانە وتكەن جىلدارداعى نىسانداردى بەرۋ بويىنشا كەزەڭ-كەزەڭىمەن جۇمىس جوسپارىن ۇسىنۋى قاجەت. بۇل نىسانداردى بيۋدجەت ەسەبىنەن ۇستاۋعا بولمايدى. ەڭ الدىمەن, بۇل كوشەلەر, ينجەنەرلىك جەلىلەر مەن ەلەكتر جۇيەلەرى, قوسالقى ستانتسيالار جانە باسقا دا نىساندار, – دەگەن ەرلان كاناليموۆ ۇزاققا سوزىلعان جوبالار بويىنشا مەرزىمدەرى كورسەتىلگەن جول كارتاسىن دايىنداۋدى ۇسىندى
