كەشە ەلوردانىڭ دوستىق ۇيىندە «قازاقستان ءماسليحاتتار دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگى ورتالىق كەڭەسىنىڭ وتىرىسىندا مەملەكەت باسشىسى قاسىم-جومارت توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋى تالقىلاندى. جيىنعا نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ, ەلوردالىق ءماسليحات دەپۋتاتتارى نۇرلان كوپەشوۆ, التىنشاش تابۋلدينا قاتىستى.
– پرەزيدەنت جولداۋدا ساياسي رەفورمالاردى جانە جاڭا ەكونوميكالىق ساياساتتى ىسكە اسىرۋ, ەلىمىزدىڭ ترانزيتتىك قۋاتىن ارتتىرۋ, اۋىل شارۋاشىلىعىن دامىتۋ, مەديتسينالىق ينفراقۇرىلىمدى كەشەندى تۇردە جاقسارتۋ, ءبىلىم بەرۋ جۇيەسىن دامىتۋ, ەڭ تومەنگى جالاقى دەڭگەيىن كوتەرۋ, زەينەتاقى جۇيەسىن جاڭعىرتۋ, ادام الەۋەتىن دامىتۋ, قوعامدا زاڭ ۇستەمدىگىن بەرىك ورناتۋ سىندى بۇگىنگى كۇننىڭ وزەكتى ماسەلەلەرىن كوتەرىپ, الداعى ۋاقىتتاعى ەلىمىزدىڭ ساياسي, الەۋمەتتىك-ەكونوميكالىق دامۋىن ايقىنداپ بەردى. حالىقتىڭ ءال-اۋقاتىن كوتەرۋگە باعىتتالعان تىڭ باعدارلامالار ۇسىنىلعان بۇل جولداۋ يگىلىكتى باستامالاردىڭ باستاۋى, جارقىن بولاشاقتىڭ نىشانى بولارى ءسوزسىز. ەندى ءبىز جاڭا قازاقستاندى قۇرۋ ءۇشىن ەل تاريحىنداعى ەلەۋلى وقيعاعا بەيجاي قاراماي, بىرلىگىمىز بەن ىنتىماعىمىزدى, تاتۋلىعىمىز بەن تۇراقتىلىعىمىزدى جانە ءوزارا اۋىزبىرشىلىگىمىزدى كوزدىڭ قاراشىعىنداي قاستەرلەپ, جۇمىلا جۇمىس جاساۋىمىز اسا ماڭىزدى, – دەدى جيىندى اشىپ, جۇرگىزىپ وتىرعان «قازاقستان ءماسليحاتتار دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگىنىڭ توراعاسى تولەۋبەك مۇقاشەۆ.
ودان كەيىن ءسوز العان پرەمەر-مينيستر كەڭسەسىنىڭ وكىلى رىسكەلدى ساتباەۆ مەملەكەت باسشىسى جاڭا جولداۋىندا وڭىرلەردەگى وزەكتى ماسەلەلەردى شەشۋ ءۇشىن جەرگىلىكتى ءوزىن-ءوزى باسقارۋ قىزمەتىن وزگەرتۋگە ايرىقشا نازار اۋدارۋ قاجەتتىگىن اتاپ وتكەنىن جەتكىزدى. بۇل تاراپتا قولعا الىنعان شارالارعا توقتالدى. سونىڭ ىشىندە ءماسليحاتتاردى جاڭعىرتۋ ءىسى ماڭىزدى ەكەنىن ايتتى.
ۇلتتىق ەكونوميكا ءمينيسترىنىڭ ورىنباسارى باۋىرجان وماربەكوۆ جەرگىلىكتى ءوزىن-ءوزىن باسقارۋ سالاسىنداعى رەفورمالارعا توقتالدى. ادىلەت مينيسترلىگىنىڭ وكىلى سالتانات ءجۇنىسوۆا پرەزيدەنت جولداۋىندا بەس باسىم باعىتتى اتاپ وتكەنىن ايتىپ, سونىڭ ىشىندە ادىلەت مينيسترلىگىنە جۇكتەلگەن تاپسىرمالارمەن تانىستىردى.
جيىن قورىتىندىسىندا «قازاقستان ءماسليحاتتار دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگىنىڭ ورتالىق كەڭەسى قازاقستاندىقتارعا ۇندەۋ جولدايتىنى ايتىلدى.
