ەلوردانىڭ №1 كوپسالالى قالالىق اۋرۋحاناسىندا سيرەك كەزدەسەتىن مەنەر اۋرۋىن ەمدەۋ بويىنشا 2019 جىلدان بەرى 30-دان استام بىرەگەي وتا ءساتتى جۇرگىزىلدى. مەنەر – كەنەتتەن باس اينالۋ, جۇرەك اينۋ, قۇسۋ جانە ەستۋ قابىلەتىنىڭ جوعالۋى ارقىلى بەلگى بەرەتىن قۇلاقتىڭ ىشكى جاعىنىڭ اۋرۋى. وتە سيرەك كەزدەسەتىن دەرت بولسا دا, بەلگىلەرى قاتتى السىرەتىپ, اۋىرعاندا ادام توزگىسىز ەتەدى. جاقىندا ونى ەمدەۋدىڭ ءتيىمدى تاسىلدەرى ارقىلى تاعى ءبىر وتا جاسالدى.
بۇل اۋرۋدى فرانتسۋز دارىگەرى پروسپەر مەنەر زەرتتەگەن. باس اينالىپ, باس ۇستاماسىنىڭ قايتالانۋىمەن, زاقىمدانعان قۇلاق ىشىندەگى شۋدىڭ كەسىرىنەن ەستۋ قابىلەتىنىڭ بىردەن تومەندەۋىمەن پايدا بولاتىن ىشكى قۇلاقتىڭ اۋرۋى كوبىنە 30-50 جاس ارالىعىنداعى ادامداردا كوپ كەزدەسەدى. بۇل اۋرۋعا باسىنان جاراقات العان, قۇلاعى جاراقاتتاعان نەمەسە سۋىق تيگىزگەن ادامدار ءجيى ۇشىرايدى. باستىڭ اينالۋى, باس ۇستاماسىنىڭ قايتالانا بەرۋىنەن ناۋقاس ءتىپتى جۇرە دە, وتىرا دا الماي قالادى. سونداي كەزدە ناۋقاستى جاتقىزىپ, اياق-قولىن جىلى ۇستاۋ قاجەت. جۇرەك اينۋ, قۇسۋ, تەرشەڭدىك, قان قىسىمىنىڭ تومەندەۋى – اۋرۋدىڭ العاشقى بەلگىلەرى. دەر كەزىندە ەم قابىلداماسا, بۇل دەرت كەرەڭدىككە اكەلىپ سوعادى.
اۋرۋدىڭ ەتيولوگياسى بەلگىسىز, مەديتسينالىق قاۋىمداستىق مەنەر اۋرۋىنىڭ پايدا بولۋىنا بايلانىستى بىرنەشە تەوريا ايتادى. بۇگىنگە دەيىن قازاقستاندا اۋرۋ تەك امبۋلاتوريالىق جاعدايدا ەمدەلدى. ءبىرىنشى وتا 2019 جىلدىڭ تامىز ايىندا استاناداعى №1 قالالىق اۋرۋحانانىڭ قابىرعاسىندا جاسالدى. وسىنداي دياگنوزى بار جانە العاش وتا جاسالعان ناۋقاس جىلدار بويى اۋرۋدىڭ بەلگىلەرىنەن زارداپ شەگىپ كەلگەن. ۋاقىت وتە كەلە ول تۇراقتى, سوزىلمالى تۇرگە اينالعان ۇستاماسىن ازايتسام دەگەن ۇمىتپەن نەۆرولوگيالىق, وتورينولارينگولوگيالىق امبۋلاتوريالىق ەمگە جۇگىنەدى.
– جاسالعان وتادان كەيىن ءۇش ساعات وتكەندە ءبىز ناۋقاستىڭ جانىنا باردىق. ول, ەڭ الدىمەن, باس اينالۋى ءبىراز قويعانىن ايتتى. كەلەسى كۇنى ناۋقاس وزدىگىنەن ورنىنان تۇرىپ, ەكى كۇننەن كەيىن پالاتادا جۇرە الاتىن بولدى. بۇل كۇندەرى ول – ءومىر ساپاسىن قالپىنا كەلتىرگەن بەلسەندى ادام. وتاعا دەيىن ۇنەمى باسى اينالا بەرگەننىڭ كەسىرىنەن وزدىگىنەن قوزعالا المايتىن جاعدايدا بولعانىن ەسكەرسەك, ونىڭ وتادان كەيىن ءوزى جۇرە الۋى كەرەمەت ناتيجە دەۋگە بولادى, – دەيدى استانا مەديتسينا ۋنيۆەرسيتەتى لور اۋرۋلارى كافەدراسىنىڭ دوتسەنتى, مەديتسينا عىلىمدارىنىڭ كانديداتى ءادىل مۇستافين.
2024 جىلدىڭ 12 اقپانىندا مەنەر اۋرۋى بويىنشا تاعى ءبىر وتا جاسالدى. مەرۋەرت دەگەن ناۋقاسقا بىرنەشە جىل بۇرىن وسى دياگنوز قويىلىپ, ۇزاق ۋاقىت بويىنا كونسەرۆاتيۆتى تەراپيا السا دا, ەمى وڭ ناتيجە بەرمەگەن. دارىگەرلەردىڭ ايتۋىنشا, مۇنداي اۋرۋلاردى ەمدەۋ كونسەرۆاتيۆتى ادىستەردەن باستالادى, وتا بىردەن جاسالمايدى, ويتكەنى بۇل وتە كۇردەلى, قاۋپى باسىم وتاعا جاتادى.
– 7 جىل بويى قۇلاعىمنان شۋىل كەتپەي, بۇل اۋرۋ مەنى ابدەن مازالادى. جۇرسەم بولدى قۇلايتىنمىن, جۇرەگىم اينىپ, قۇسا بەرەتىنمىن. وسى اۋرۋدان ەستۋ قابىلەتىم تومەندەپ كەتتى. مەنى ەمحانادان «گوسپيتاليزاتسيا بيۋروسى» پورتالى ارقىلى اۋرۋحاناعا جىبەردى. وتادان كەيىن ءوزىمدى الدەقايدا جاقسى سەزىنەمىن, اينالامدى جاقسى ءتۇيسىنىپ, تىرشىلىكتى باعامداۋدا ايقىندىق پايدا بولدى, – دەيدى مەرۋەرت.
وتا استانا قالاسىنداعى №1 اۋرۋحانادا لور ورتالىعىنىڭ ورديناتور-دارىگەرى دينا ابىلتاەۆانىڭ قاتىسۋىمەن جاسالدى. دارىگەرلەر قۇلاقتىڭ ىشكى جاعىنداعى قىسىمدى تومەندەتۋ ماقساتىندا درەناج ورناتا وتىرىپ, ەندوليمفا قاپشىعىن اشتى جانە درەناجداۋ پروتسەسىن جۇرگىزدى. كەلەسى كۇنى ناۋقاستىڭ جاعدايى ەداۋىر جاقسارعانى بايقالعان. بۇل وتا دا ناۋقاسقا مىندەتتى الەۋمەتتىك مەديتسينالىق ساقتاندىرۋ جۇيەسى ارقىلى تەگىن جاسالدى.
