«ەل كلاسسيكا» اتانىپ كەتكەن «استانا» مەن «قايرات» كوماندالارىنىڭ كەزدەسۋى الماتىلىقتاردىڭ جەڭىسىمەن اياقتالدى. بۇل ويىن – جەتەر جەرىنە جاقىنداپ قالعان قپل-دىڭ ناعىز شارىقتاۋ شەگى.
ءتۋرنيردىڭ تۇگەسىلۋىنە ءبىر تۋر قالعاندا ەلوردالىقتار ءوز الاڭىندا «قايراتقا» ەسە جىبەرىپ, چەمپيوندىقتان ۇمىتكەر باستى كوماندالاردىڭ اراقاشىقتىعى ودان سايىن قىسقارا ءتۇستى. وسىعان دەيىن كوش ىلگەرى تۇرعان «استانا» كومانداسى سوڭعى ماتچتاردا ءىزىن الا كەلە جاتقان «قايراتتى» ايتارلىقتاي جاقىنداتىپ الدى.
«استاناعا» چەمپيوندىقتىڭ تاعدىرىن شەشۋ ءۇشىن بۇل كەزدەسۋدە تەڭ ءتۇسۋدىڭ ءوزى جەتكىلىكتى ەدى. سويتكەن ەلوردالىقتاردىڭ قورعانىسى 70-مينۋتقا دەيىن سىر بەرمەي, ويىن تەڭ دەڭگەيدە ءوربىدى. الايدا جەڭىسكە ءزارۋ قوناقتار اقىرى دەگەنىنە جەتتى. بۇعان يۋري لوگۆينەنكونىڭ جاراقاتى دا سەبەپ بولۋى مۇمكىن. سايكەسىنشە, «قايراتتىڭ» دا كۇشەيۋىنە اكوش ەلەكتىڭ جاراقاتى ىقپال ەتتى دەۋگە بولادى. ويتكەنى سونىڭ ورنىنا شىققان ايبول ابىكەننىڭ جۇلدىزى جاندى. ءبىر گول جىبەرىپ العان الاڭ يەلەرى بار كۇشىمەن العا ۇمتىلدى. بىراق قارسىلاستار قارىمتا شابۋىلدا تاعى ءبىر دوپ سوعىپ كەتتى. وسىلايشا, 31-تۋردىڭ ورتالىق ويىنى 0:2 ەسەبىمەن اياقتالدى.
«استانا» كومانداسى «قايراتتان» ءبىر ۇپاي الدا. ەندى چەمپيون اتانۋ ءۇشىن سوڭعى تۋردا ورالدىڭ «اقجايىعىنان» ايلاسىن اسىرۋ كەرەك. ال «قايرات» «اقتوبەمەن» كەزدەسەدى. ەگەر وسى ويىنداردان كەيىن الدەقانداي جاعدايمەن قوس كوماندانىڭ جالپى ۇپايلارى تەڭەسەتىن بولسا, وندا چەمپيوندى انىقتاۋ ءۇشىن قوسىمشا «التىن» ماتچ وتكىزۋگە تۋرا كەلەدى.
ورىنبەك وتەمۇرات
