سپورت – ەل نامىسى

سپورت – دەنساۋلىق كەپىلى, ەل نامىسى. سوندىقتان دا, الدىنا ماڭگىلىك ەل بولۋ مۇراتىن قويعان ەگەمەن قازاق ەلىندە ەلباسىنىڭ ءوزى حالىقتىڭ سپورتپەن شۇعىلدانۋىنا ايرىقشا كوڭىل ءبولىپ كەلەدى.
2009 جىلعى جولداۋىندا ەلباسى نۇرسۇلتان نازارباەۆ 2020 جىلعا قاراي قازاقستان حالقىنىڭ 30 پايىزى سپورتپەن تۇراقتى اينالىساتىنداي جاعداي جاسالۋىن مىندەتتەدى. ال 2010 جىلى 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىن بەكىتۋ تۋرالى جارلىققا قول قويدى. مۇنىڭ ءبارى, ارينە, حالىقتىڭ دەنساۋلىعىن جاقسارتىپ, ۇزاق ءومىر سۇرۋىنە الىپ باراتىن باستامالار. ال دەنى ساۋ حالىق – مەملەكەتتىڭ بايلىعى.
ەلىمىزدە بۇقارانىڭ سپورتقا دەن قويۋىنا تۇرتكى بولارلىق يگى قادامدار از ەمەس. تۇراقتى اتاپ وتىلە باستاعان سپورت كۇنى مەرەكەسى دە سونىڭ دالەلى.
مەرەكە قارساڭىندا رەداكتسيامىزدا وتكەن «دوڭگەلەك ۇستەلگە» شاقىرىلعان قوناقتارمەن قالا تۇرعىندارىنىڭ سپورتقا قىزىعۋشىلىعى جايلى اڭگىمە قوزعاعان بولاتىنبىز.

«دوڭگەلەك ۇستەلگە» قاتىسۋشىلار:

 

جومارت سابىرجانۇلى – قازاقستاننىڭ ەڭبەك سىڭىرگەن جاتتىقتىرۋشىسى, «اسىق اتۋ» فەدەراتسياسىنىڭ ۆيتسە-پرەزيدەنتى

 

 

سۆەتلانا يمانقۇلوۆا – رەسپۋبليكالىق مادەنيەت, سپورت جانە اقپاراتقىزمەتكەرلەرىنىڭ كاسىپوداق كەڭەسىنىڭ ءتورايىمى

 

 

گۇلناز ورازالينا – استانا قالاسى تۋريزم, دەنە تاربيەسى جانە سپورت باسقارماسىنىڭ وقۋ جانە سپورت ءبولىمى باستىعى

 

 

جاردەمبەكقابىلحان – قاجىمۇقان مۇڭايتپاسوۆ اتىنداعى دارىندى بالالارعا ارنالعان رەسپۋبليكالىق مەكتەپ-ينتەرناتى ديرەكتورىنىڭ ورىنباسارى

 

 

جولامان تابيعات – «استانا» فۋتبول كلۋبى جاستار كومانداسىنىڭ جارتىلايقورعاۋشىسى

 

«دوڭگەلەكۇستەلدى» جۇرگىزۋشىلەر:
عالىمقوجابەكوۆ,
نازيرا بايىربەك

ن.بايىربەك: بارشاڭىزعا ءمالىم, قازىرگى كۇنى قالامىزدا سپورت مەكتەپتەرىنە قابىلداۋ ءجۇرىپ جاتىر. وسى جاعدايعا قاراپ-اق جاستاردىڭ سپورتقا قىزىعۋشىلىعىن شامالاۋعا بولادى. ءبىز اڭگىمەنى وسى تۇستان باستاساق دەپ وتىرمىز. بالالارىمىزدىڭ سپورت مەكتەپتەرىندە وقىسام دەگەن ىنتاسى قانداي؟

ج.قابىلحان: ءبىزدىڭ قاجىمۇقان مۇڭايتپاسوۆ اتىنداعى سپورت مەكتەپ-ينتەرناتى قازاق سپورتىنىڭ ۇستاحاناسى اتالىپ جۇرگەنى تەگىن ەمەس. بۇل وقۋ ورنى, بىلەسىزدەر, الماتىدان كوشىپ كەلگەن. بۇگىنگى قازاق سپورتىنىڭ ءبىراز ساڭلاقتارى وسى مەكتەپتىڭ تۇلەگى ەكەنىن دە كوپشىلىك بىلەدى. سول سەبەپتى, ءبىزدىڭ وقۋعا قابىلداۋ ۋاقىتىمىزدى, ياعني جىل سايىن تامىز ايىن ەل تاعاتسىزدانا كۇتەدى دەپ ايتا الامىن.

25 تامىز كۇنى رەسپۋبليكامىزدىڭ تۇكپىر-تۇكپىرىنەن كەلگەن تالاپكەرلەر قۇجاتتارىن تاپسىرادى. 26-سى كۇنى جالپى دەنە دايىندىعىنان قابىلداۋ ەمتيحانى وتەدى. ال 27-سىندە ارنايى دەنە دايىندىعىنان ەمتيحان تاپسىرادى. وسى سىناقتار بويىنشا جيناعان ۇپايلارىنا قاراي بالالار كونكۋرستىق نەگىزدە بوس ورىندارعا وقۋعا قابىلدانادى. ءسويتىپ, 28-ءى كۇنى ناتيجە بەلگىلى بولىپ, مەكتەپ الدىنداعى تاقتايشادا وقۋعا تۇسكەن بالالاردىڭ ءتىزىمى ىلىنەدى.

ن.بايىربەك: سىزدەردەن شىققان تانىمال سپورتشىلاردى اتاپ وتسەڭىز ؟

ج.قابىلحان: ءبىزدىڭ مەكتەپتەن, مىسالى, وليمپيادا ويىندارىنىڭ جەڭىمپازى, ەكى دۇركىن الەم چەمپيونى بولعان مارقۇم ءشامىل سەرىكوۆ, وداق كەزىندە-اق قازاق سپورتىن العا سۇيرەگەن داۋلەت تۇرلىحانوۆ, كەشەگى قايبىر سايىستاردا «مەن قازاقتىڭ تۋىن جەلبىرەتىپ الىپ بارىپ, جەلبىرەتىپ الىپ كەلەمىن» دەپ ۋادە بەرىپ, ۋادەسىندە تۇرعان قايسار بوكسشىمىز ەرماحان ىبىرايىموۆ شىققان. سول سەكىلدى, وليمپيادا سىندارىندا ولگا شيشيگينا, ماۋلەن مامىروۆ, نۇرباحىت تەڭىزباەۆ, تاعى باسقا تۇلەكتەرىمىز قازاقتىڭ نامىسىن قورعاعان. بۇل قاتاردى ءتىزىپ ايتا بەرۋگە بولادى, ارينە. بىراق ولاردى تۇگەندەپ شىعۋ قيىنىراق. جالپى قازاق سپورتىن ورگە سۇيرەپ, بيىكتەردەن كورىنىپ جۇرگەن تالانتتارىمىزدىڭ تەڭ جارتىسى وسى ءبىزدىڭ وقۋ ورنىمىزدان شىقتى دەۋگە بولادى.

ن.بايىربەك: بۇگىندە مەكتەپ-ينتەرناتتا قانشا سپورتشى-وقۋشى تاربيەلەنىپ ءجۇر؟

ج.قابىلحان: ەكى جىل بۇرىن ءبىزدىڭ مەكەمە مەكتەپ-كوللەدج بولىپ وزگەرتىلگەن. دەمەك, بيىل ءۇشىنشى جىل كوللەدجگە بالالار قابىلداپ جاتىرمىز. سوندا جالپى 120 ستۋدەنت, 280 وقۋشى ءبىلىم الادى. ال جالپى كونتينگەنتىمىز بويىنشا 420 بالانى قامتاماسىز ەتە الامىز. بىزدە كۇنتارتىبى بەكىتىلگەن. وقۋشىلار مەن ستۋدەنتتەر كۇنىنە ەكى ۋاقىت جاتتىعۋ جاسايدى, بەس مەزگىل تاماقتانادى. ولاردىڭ جۇيەلى تۇردە ءبىلىم الىپ, ءوز قابىلەتىن جۇيەلى دامىتۋعا مۇمكىندىگى بار. سونىڭ ارقاسىندا, وسى مەكەمە سپورتقا دا ەلەۋلى ۇلەس قوسا باستادى. مىسالى, ءبىزدىڭ مەكتەپ العاش استاناعا كوشىپ كەلگەندە رەسپۋبليكالىق جارىستاردا بالالارىمىز ەكى ءجۇزدىڭ ار جاق-بەر جاعىندا عانا مەدال الاتىن. ال قازىر ءبىزدىڭ بالالاردىڭ جەتىستىگى كوپ. مىسالى, 2013 جىلى چەمپيوناتتاردا 271 التىن, 171 كۇمىس, 193 قولا مەدال يەلەندى. وتاندىق سپورتقا قوسامىز دەپ, ۇلكەن سايىستارعا دايىنداپ وتىرعان سپورتشىلارىمىز دا بار. تاعى ءبىر قۋانىشتىسى, رەسپۋبليكالىق ۇلكەن دودالارعا ءبىر ەمەس, بىرنەشە جاتتىعۋ نەمەسە بىرنەشە سپورت ءتۇرى بويىنشا قاتىسۋعا بەيىم بالالارىمىز دا بار.

ن.بايىربەك: تالاپكەرلەردىڭ باسەكەسى قالاي؟

ج.قابىلحان: بوكس دەسە, كۇرەس دەسە قانى قىزبايتىن قازاقتىڭ بالاسى جوق, شىنىن ايتۋ كەرەك. سوندىقتان, بىزدە جەكپە-جەك تۇرلەرىنەن, مىسالى, ەركىن كۇرەس, گرەك-ريم كۇرەسى, بوكستا اسىرەسە باسەكە كوپ. 7-8 ورىن بولسا, سوعان 50-60 بالاعا دەيىن كەلىپ جاتادى. ولاردى قاراپ, ىرىكتەپ الۋ قيىنعا سوعاتىن كەزدەر بولادى. ءبارىن بىردەي قابىلداي المايسىڭ, بەكىتىلگەن ورىن شەكتەۋلى. سول كەيدە وكىندىرىپ جاتادى.

ن.بايىربەك: وسى تۇستا قالالىق اكىمدىكتىڭ وكىلى رەتىندە گۇلناز ورازاليناعا سۇراق قويعىمىز كەلىپ وتىر. مىنەكي, بالانى سپورتقا بەرۋگە قۇلشىنىس كوپ ەكەنى ايتىلىپ جاتىر. ال وسى رەتتە باسقارما تاراپىنان, اسىرەسە, بالالار مەن جاسوسپىرىمدەردىڭ سپورتپەن اينالىسۋىنا قانداي جاعداي جاسالىپ جاتىر؟

گ.ورازالينا: قالا بويىنشا بىزدە 25 سپورتتىق مەكەمە بار. ولاردىڭ قاتارىندا 10 ارنايى سپورت مەكتەبى بولسا, التاۋى – وليمپيادالىق رەزەرۆ دايارلاۋ مەكتەبى. ولاردا 7000-عا تارتا ادام سپورت شەبەرلىگىن شىڭداۋدا. بۇل, ارينە, وتكەن جىلدارمەن سالىستىرعاندا ەداۋىر جوعارى كورسەتكىش. جالپى, حالىقتىڭ بۇقارالىق سپورتقا قىزىعۋشىلىعى جىلدان جىلعا ارتىپ كەلە جاتقانى بايقالادى. وسى ورايدا, استانا قالاسىنىڭ تۋريزم, دەنە تاربيەسى جانە سپورت باسقارماسى بۇگىنگى تاڭداعى سۇرانىسقا قاراي ءار ءتۇرلى سپورتتىق شارالار ۇيىمداستىرىپ, جاڭا مۇمكىندىكتەر قاراستىرىلۋدا. مىسالى, بيىل 17 تامىزدا, ياعني سپورت كۇنى قالاداعى بارلىق سپورت كەشەندەرىندە اشىق ەسىك وتەدى. ودان بولەك كوپتەگەن سپورتتىق-مادەني شارالار ۇيىمداستىرىلادى. ال بالالار مەن جاسوسپىرىمدەردى سپورتقا باۋلۋ ءۇشىن ءبىزدىڭ باسقارما قالالىق ءبىلىم باسقارماسىمەن بىرلەسىپ جوس­پارلى جۇمىس ىستەۋدە.

وزدەرىڭىز بىلەسىزدەر, قالامىزدا سپورت كەشەندەرى, جاتتىعۋ زالدارى كوبەيۋدە. سونىمەن قوسا, اۋلالاردا جاتتىعۋ قۇرالدارى ورناتىلىپ, جالپى بۇقارانىڭ دەنە تاربيەسىمەن اينالىسۋىنا جاعداي جاساۋعا باسا ءمان بەرىلەدى.

مۇنىڭ سىرتىندا جاسوسپىرىمدەر اراسىنداعى وليمپيادا ويىندارىندا, ازيا ويىندارىندا باق سىنايتىن سپورتشىلاردى ىرىكتەپ الۋ دا – جاۋاپتى مىندەت. ءبىز بۇل رەتتە حالىقارالىق جارىستاردا ەل نامىسىن قورعايتىن 50-دەن استام ۇمىتكەردى ىرىكتەپ, ولاردىڭ تىڭعىلىقتى دايىندالۋىنا جاعداي جاساپ وتىرمىز. جالپى, قازاقستاننىڭ ۇلتتىق قۇراماسىنا سپورتتىق رەزەرۆ دا­يىنداۋ جاعىنان ءبىز قازىر ون ءتورت وبلىس پەن ەكى قالا ىشىنەن بەسىنشى ورىندامىز.

ع.قوجابەكوۆ: وتە جاقسى كورسەتكىش ەكەن. ەندى, سول ەلوردالىق سپورتشىلارىمىز حالىقارالىق جارىستاردا ءساتتى ونەر كورسەتەدى دەپ سەنىممەن قارايمىز. وسى ورايدا سىزدەردىڭ ەڭبەكتەرىڭىزدىڭ جەمىستى بولۋىنا تىلەكتەسپىز.

ن.بايىربەك: جومارت اعا, سپورت مەكتەپتەرىنە قابىلداۋدا ءبىر ورىنعا ون شاقتى بالا ۇمىتكەر بولىپ وتىر ەكەن. ءسىز قالاي ويلايسىز, سپورت مەكتەپتەرى جالپىعا بىردەي مۇمكىندىك تۋدىرۋى كەرەك پە, الدە مۇنداي ارناۋلى مەكتەپتەرگە بولاشاقتا الەمدىك دەڭگەيدە قازاقتىڭ نامىسىن قورعاپ, تۋىن جەلبىرەتەتىن بالالار ىرىكتەپ الىنۋعا ءتيىس پە؟

ج.سابىرجانۇلى: سپورتتاعى دارىندىلار مەكتەبى بولعاننان كەيىن بۇل وقۋ ورنىنا ەلىمىزدىڭ تۇكپىر-تۇكپىرىندەگى ەڭ قابىلەتتى, دارىندى بالالار ىرىكتەلىپ الىنۋى كەرەك. ءوزىمىز وسى وقۋ ورنىندا قىزمەت ەتكەن جىلدارى ەلدى ارالاپ ءجۇرىپ, بويى 1 مەتر 75 سانتيمەتر بالالاردى ىزدەگەنبىز. سالماعى 74 كەلىدەن اساتىن بالالاردى كورسەك, ۇگىتتەپ, وقۋعا اكەلۋگە تىرىساتىنبىز. مەنىڭ ەسىمدە, ەلدىڭ ءبىر تۇكپىرىندەگى ءبىر سوۆحوزدا سۋعا سۇڭگىپ جۇرگەن ءبىر قىزدى كورىپ, وسىندا الىپ كەلدىك. ول قىز التىنشى كلاستا وقيتىن ەدى. التىدان سوڭ بىزدە قابىلدانبايدى, سونان سوڭ, ءبىر جىل قالادا وقىتىپ, كەيىن سپورت مەكتەبىنە تۇسىردىك. اتى فاريزا سابيتوۆا بولاتىن. سول قىز ەكى-اق جىل اينالىسىپ, سپورت شەبەرى ءنورماتيۆىن ورىندادى. سول سەكىلدى, جەڭىل اتلەتيكاعا بەيىم ءبىر بالانى اكەلىپ, وقىتتىق. تاعى ءبىر قىزىلوردالىق جاسۇلان دەگەن بالانى اكەلدىك, ول دا ساداق اتۋدان ەكى جىلدا سپورت شەبەرلىگىنە قول جەتكىزدى. جالپى, وسىلاي تالانتتاردى ىزدەۋ كەرەك. وندايلار استانا قالاسىنداعى مەكتەپتەردە دە تولىپ جاتىر. سولاردى تاڭداپ, تابا ءبىلۋ كەرەك. سودان كەيىن سپورت مەكتەپتەرىندە ءار بالانىڭ قابىلەتىنە قاراي دامۋىن قاداعالاۋ كەرەك. مىسالى, گەرمانيادا بىلاي ىستەيدى. العاشقى ەكى جىل بالانىڭ ءبارىن جالپى سپورتقا دايىندايدى دا, سولاردى ارتىنان قابىلەتىنە قاراي بولەدى. ءبىر سالا بويىنشا دامىتادى. ال بىزدە بولسا, ءجۇز بالانى جيناپ الادى دا, «سەن بوكسشى بولساڭ دا بولاسىڭ, بولماساڭ دا بولاسىڭ» دەپ, تۇساۋلاپ تاستايدى. سول دۇرىس ەمەس. ودان كەيىن جاتتىقتىرۋشى, ۇستازدار جالپى سپورتقا بەيىم بالا كورسە, سونى وزىنە تارتىپ, جىبەرگىسى كەلمەيدى. ال شىن مانىندە بالانىڭ باعىن اشۋ ءۇشىن, تالانتتى قازاقتىڭ نامىسىن قورعاۋعا دايىنداۋ ءۇشىن, ول نەگە بەيىم, سوعان جىبەرۋ كەرەك.

بىراق قازىر, قۇدايعا شۇكىر, كوزقاراس تۇزەلىپ قالدى. سپورت دەگەن تەك قانا جۇگىرۋ, الىپ ۇرۋ, جۇدىرىقتاۋ ەمەس, ول ەلىمىزدىڭ ساياساتىنا اينالىپ كەلە جاتىر. سپورت, راسىندا, ەلدىڭ ساياساتى, ەلدىڭ دەنساۋلىعى, ءتىپتى ەكونوميكاسى دەپ ايتۋعا بولادى. نەگە دەسەڭىز, دەنساۋلىق دۇرىس بولسا, كوپ شىعىن شاشىلمايدى. دۇرىس جۇمىس ىستەلەدى.

ع.قوجابەكوۆ: مەن جيىرما جىلدان بەرى نەگىزىنەن سپورت تاقىرىبىنا قالام تارتىپ كەلەمىن. سونداعى تۇيگەنىم: بۇكىل الەمدە سپورت يندۋسترياعا اينالىپ وتىر. ماسەلەن, كەيبىر فۋتبولشىنىڭ قارجىلاي قۇنى ءبىر-ءبىر فابريكا نەمەسە زاۋىتتىڭ باعاسىنان دا اسىپ تۇسەدى. سوندىقتان ءبىزدىڭ ەلىمىزدە دە سپورت سالاسىنا يندۋستريالىق كوزقاراس قالىپتاستىرۋ قاجەت-اق.

ج.سابىرجانۇلى: ءيا, ونىڭىز شىندىق. بۇكىل الەمدە سپورت دەگەنىڭىز بۇگىندە كادىمگىدەي ساياسي-الەۋمەتتىك, مادەني-رۋحاني قۇبىلىس بولىپ وتىر. ءبىز دە بۇل كوشتەن قالماۋعا ءتيىسپىز. وسى باعىتتا قازىرگى جاعدايىمىز جامان ەمەس. وليمپيادا ويىندارىنداعى كورسەتكىشتەرىمىز سول ورلەۋدىڭ ايعاعى ەمەس پە؟! ءبارىمىزدىڭ تىلەۋىمىز سول – قازاق سپورتىنىڭ وركەندەپ-وسكەنىن قالايمىز.

ع.قوجابەكوۆ: بۇگىندە كوپتەگەن ەلدەردە سپورتشىلاردى كاسىپوداق جاعىنان قولداۋدىڭ ەرەكشە فورماسى قالىپتاسقان. بىزدە وسى ماسەلە قالاي؟ سونى بىلگىمىز كەلەدى.

س.يمانقۇلوۆا: جاڭا جومارت سابىرجانۇلى «كەزىندە اۋىلدى جەرلەردەن ىزدەپ ءجۇرىپ سپورتقا بەيىم جاستاردى الىپ كەلەتىنبىز» دەپ وتىر عوي. مەنىڭ ويىمشا, بىزگە سول ءداستۇردى قايتا جاڭعىرتۋ كەرەك. نەگىزى, قاي مەملەكەتكە بارساڭ دا, سول مەملەكەتتىڭ بەت-بەينەسى مادەنيەتى مەن سپورتى ارقىلى تانىلادى. سوندىقتان, بۇل سالانىڭ جاۋاپتىلىعىن, ماڭىزدىلىعىن ەستە ۇستاعانىمىز ابزال. ال ەندى بۇگىنگى ماسەلەگە كەلەتىن بولساق, ق.مۇڭايتپاسوۆ مەكتەبى ءبىزدىڭ كاسىپوداق قۇرامىنا ەنگەن. گۇلميرا شامانوۆا وسى مەكتەپتىڭ وكىلى رەتىندە بىزبەن تۇراقتى جۇمىس ىستەپ كەلەدى. ءبىر رەت مىناداي جاعداي بولدى, وسى مەكتەپتەن ءبىر بالانى گەرمانياعا اپارىپ ەمدەتۋ ءۇشىن 40 000 $ كولەمىندە اقشا قاجەت بولعان. بىراق, ءبىزدىڭ ونداي قاراجات شىعاراتىن مۇمكىندىگىمىز جوق ەدى. سول سەبەپتى ورتادان شىعارىپ, جيناپ, 1 000 $ كولەمىندە قاراجات تاۋىپ كومەكتەستىك. كاسىپوداق وسىلاي ءوز شاماسىنا قاراي قولداۋ كورسەتىپ وتىرادى. قوسىمشا كىرىس كوزى بولماعاندىقتان, سپورت سالاسىنداعى قىزمەتكەرلەرگە دە ءبىز, مىسالى, شيپاجايعا بارۋ اقىسىنىڭ 10-20 پايىزىن وتەپ بەرۋ سەكىلدى كومەگىمىزدى تيگىزىپ تۇرامىز.

ءبىر ايتا كەتەرلىگى, وسى جىلى شىلدە ايىندا «كاسىپوداق تۋرالى» زاڭ جاڭارتىلدى. ءبىز ونىڭ الدىندا جيىرما ءبىر جىل بويى ەسكى زاڭمەن جۇمىس ىستەدىك. ەندى وسى قابىلدانعان جاڭا زاڭدا جاس سپورتشىلارعا مەملەكەت تاراپىنان اقشا ءبولىنسىن دەگەن باپ ەنگىزىلىپ وتىر. ەندى وسى قۇجات كۇشىنە ەنەدى. ءبىز وسى زاڭدى جۇزەگە اسىرۋ ماقساتىندا جۇمىس ىستەپ وتىرمىز.

ءبىر بايقالاتىنى, سپورت سالاسىنداعى كاسىپوداقتار ءوز الدىنا ءبولىنىپ-ءبولىنىپ كەتكەن. دەربەس جۇمىس ىستەگىسى كەلەدى. بىراق ءبىز ءبىر ماقسات, ءبىر مۇددە دەگەن قاعيدامەن ەلباسىمىزدىڭ تاپسىرماسى اياسىندا جاڭا باستامالار كوتەرىپ جاتىرمىز. وعان قر كاسىپوداق ۇيىمى كوپ ەڭبەك ءسىڭىرىپ وتىر. جالپى, قازىر كاسىپوداق قىزمەتى سپورت سالاسىنداعى تۇلعالارعا قولداۋ كورسەتۋ ءۇشىن دە جاڭا جۇيەنى ەنگىزۋگە كۇش سالۋدامىز.

شەت مەملەكەتتەردە مينيسترلەر دۇرىس جۇمىس ىستەمەي, الدەكىمدى ورىنسىز جۇمىستان شىعارىپ, قىسىمعا الىپ, ءوز قۇقىن اسىرا پايدالانىپ كەتسە, كاسىپوداق ۇيىمدارىنىڭ باسشىلارى, دەپۋتاتتار – ءبارى بىرىگىپ, زاڭدى بەلىنەن باسقان ءمينيستردىڭ ءوزىن جۇمىستان شىعارىپ جىبەرۋگە حاقىلى ەكەن. بىزدە ونداي قۇقىق جوق. مىقتى ءبىر سپورتشى نەمەسە جاتتىقتىرۋشى ورىنسىز جۇمىستان شىعارىلىپ جاتسا دا, اراشا تۇسە المايمىز. بىراق جاڭا زاڭعا سايكەس بىزگە دە ۇلكەن مۇمكىندىك قاراستىرىلۋدا. ءبىز وزىمىزگە ارتىلعان جاۋاپكەرشىلىكتىڭ ارقاسىندا الداعى ۋاقىتتا سپورت سالاسىنداعى قىزمەتكەرلەر مەن سپورتشىلارعا الەۋمەتتىك, مورالدىق قولداۋ كورسەتىپ, كومەك بەرۋگە قاۋقارلى بولا باستايمىز دەپ ويلايمىن.

ن.بايىربەك: كاسىپوداق ۇيىمىنىڭ وكىلى رەتىندە بىزدەگى سپورت مەكتەپتەرىندەگى وقىتۋشى-جاتتىقتىرۋشىلار مەن سپورتشىلاردىڭ مۇددەسىن قورعاۋ ءۇشىن الدىمەن قانداي باس­تاما كوتەرىپ وتىرسىزدار؟

س.يمانقۇلوۆا: ەڭ باستى ماسەلە, بۇل مەكەمەلەردەگى شتاتتا مەدبيكەلەر قاراستىرىلماعان. مۇندا قازىر دارىگەرلەر بار, بىراق ولار تاڭەرتەڭنەن كەشكە دەيىن جۇمىس ىستەيدى دە, كەتىپ قالادى. ال كەشكى, ءتۇننىڭ ۋاعىندا ءبىر جاعداي بولسا, كىم قاداعالايدى؟ مىسالى, سپورتشىلار كەشكە دە جاتتىعۋ زالىندا بولادى, قانداي دا ءبىر جاراقات السا, ولار العاشقى كومەكتى كىمنەن الادى؟ وسى جاعىن ەسكەرە وتىرىپ, مۇنداي مەكەمەدە كۇندىز-ءتۇنى دارىگەرلىك كومەك اتقاراتىن تۇلعالار بولۋى كەرەك دەپ ويلايمىن.

ج.سابىرجانۇلى: دۇرىس ايتاسىز. قازىر نەشە ءتۇرلى جاعدايلار بولىپ جاتىر. دارىگەر مەن مەدبيكەلەر مىندەتتى تۇردە شتاتقا كىرگىزىلۋى كەرەك.

ج.قابىلحان: بۇل شىنىندا دا ءبىزدىڭ كۇيىپ تۇرعان ماسەلەمىز. بىراق قازىرشە شتاتتى كەڭەيتۋ وتە قيىن بولىپ وتىر. ول جوعارى جاقتان بەكىتىلەدى.

س.يمانقۇلوۆا: وسى سەكىلدى, جالاقىنى ساتىلاپ ءوسىرۋ, ەڭبەك وتىلىنە قاراي ەڭبەكاقىسىن ءوسىرۋ ماسەلەسى بويىنشا دا بۇرىنعى قاۋلىمەن عانا جۇمىس ىستەپ وتىرعاندار كوپ. اسىرەسە, شەت جاقتاردا جاڭا قاۋلىنى بىلمەيدى دە. مۇلدەم ساۋاتى جوق ادامدار جۇمىس ىستەپ وتىر. ودان كەيىنگى ماسەلە, وسى مادەنيەت پەن سپورت سالاسىندا اتتەستاتسيالاۋ دەڭگەيى وتە تومەن. ءار ماماندى ىستەگەن جۇمىسى مەن جەمىستى ەڭبەگىنە قاراي دەڭگەيىن انىقتاپ وتىرۋ دۇرىس جولعا قويىلماعان. ەكونوميستەر مەن بۋحگالتەرلەردىڭ كەمشىلىگى – بۇل. ەلباسىنىڭ ءوزى «ەڭبەك ادامىنىڭ جاعدايىن جاساۋ كەرەك» دەپ وتىر. ال بىزدە ەڭبەكتى باعالاۋ ءالى دۇرىس ەمەس.

ع.قوجابەكوۆ: بارشاڭىزعا بەلگىلى, الدىمىزدا بيىلعى قىركۇيەكتە باستالاتىن ازيا ويىندارى جانە 2016 جىلى ريو-دە-جانەيرودا وتەتىن وليمپيادا ويىندارى جاقىنداپ قالدى. وسى جارىستارعا استانا قالاسىنان ۇمىتكەرلەر بار ما؟

گ.ورازالينا: وزدەرىڭىزگە بەلگىلى, وتكەن وليمپيادا ويىندارىنا استانا قالاسىنان 17 سپورتشى قاتىسقان ەدى. ناتيجەسىندە مارينا ۆولنوۆا دەگەن قىزىمىز بوكس باسەكەسىندە قولا جۇلدەگەر اتاندى. ال ەندى الداعى ازيا ويىندارى مەن ريو دە جانەيرو ويىندارىنا ۇمىتكەرلەردى دايىنداۋ تۋرالى قۇجاتتار جۋىردا قابىلداندى. ىرىكتەلگەن سپورتشىلاردىڭ دايىندىعىن قامتاماسىز ەتۋگە بارلىق جاعداي قاراستىرىلعان. ەندى سول سپورتشىلارىمىزدىڭ جوعارى ناتيجە كۇتەتىن بولامىز. ال ەل نامىسىن قورعاۋعا اتتاناتىن ۇمىتتەرىمىزدىڭ اتىن قازىردەن اتاعىم كەلمەي وتىر. ودان دا ولاردىڭ جەڭىسى تۋرالى ماقالالار وقيتىن بولايىق دەپ تىلەگىم كەلەدى.

ع.قوجابەكوۆ: ارامىزدا «استانا» فۋتبول كلۋبى جاس­تار قۇراماسىنىڭ جارتىلاي قورعاۋشىسى جولامان تابيعات دەگەن فۋتبولشىمىز وتىر. سەن فۋتبولعا بالا كەزىڭدە كەلدىڭ. قازىر ءوزىڭ سەكىلدى جاس فۋتبولشىلاردىڭ الەۋمەتتىك جاعدايى قالاي؟

ج.تابيعات: ارينە, ءۇش-ءتورت جىل بۇرىنعى جاعدايمەن سالىستىرعاندا قازىرگى كۇنىمىز جاقسى. مىسالى, ءبىز 3-4 سىنىپتا وقيتىن كەزىمىزدە, مىسالى, سپورتتىق كيىم-كەشەكتەرمەن جابدىقتاۋ, جارىستارعا شىعۋ وتە قيىن بولاتىن. جىلىنا ەكى-ءۇش جارىسقا عانا شىعاتىنبىز. ال قازىر جىل سايىن ەپيكيروۆكامىز, ياعني فورمامىز جاڭارتىلادى. جارىستارعا دا ءجيى شىعامىز. مەنىڭ ويىمشا قازىر بالالار مەن جاسوسپىرىمدەر سپورتىنا قاراجات جاقسى بولىنەتىن سياقتى. ال ونداي جاعداي جاسالعان سوڭ, تالاپ تا كۇشەيتىلەدى. سوندىقتان, ءبىز دە قولىمىزدان كەلگەنشە جەڭىسكە جەتۋگە, جۇلدەلى ورىندار يەلەنۋگە تىرىسامىز.

ع.قوجابەكوۆ: جولامان, ساعان وسى ۋاقىتقا دەيىن قالامىزداعى №8 بالالار مەن جاسوسپىرىمدەر سپورت مەكتەبى قامقور بولدى, ودان كەيىن «استانا» فۋتبول كلۋبى قاراماعىنا الدى. بيىل مەكتەپ ءبىتىرىپ وتىرسىڭ. ءارى قاراي سپورتتاعى تاعدىرىڭ قالاي بولماق؟ قانداي ماقساتىڭ بار؟

ج.تابيعات: بارشاعا بەلگىلى, ون سەگىز جاسقا دەيىن جاستار كومانداسىندا ويناتادى, ودان كەيىن ونىڭ قاتارىنان شىعاسىڭ. باسقا كلۋبتارعا بارۋعا ءتيىسسىڭ. ونداي جاعدايدا كاسىپتىك كەلىسىمشارت بويىنشا وينايسىڭ. ول كادىمگى جۇمىس ىستەگەنمەن بىردەي. سوندىقتان, قازىر مەنىڭ ماقساتىم دۋبلعا, ياعني نەگىزگى كوماندانىڭ قوسالقى كومانداسىنا ءتۇسۋ. ودان ءارى قاراي قازاقستاننىڭ ءىرى فۋتبول كلۋبتارىنىڭ بىرىنە ءوتىپ, فۋتبولدا ۇلكەن كارەرا جاساسام دەيمىن.

***

ن.بايىربەك: حالىقارالىق دودالاردا سپورتشىلار ءوز ەلىنىڭ ءانۇرانىن ەستىگەندە رۋحتانىپ, دەلەبەسى قوزىپ كەتەدى. قايسىبىر ويىندا فرانتسيا فۋتبولشىلارىنىڭ وزدەرىنىڭ گيمنى قويىلعاندا جەڭىلىپ تۇرعان جەردە عالامات كۇشكە, شەبەرلىككە قول جەتكىزىپ, جەڭىس جەتكەنى تۋرالى كوپشىلىك ايتىپ جاتادى… ەندەشە سپورتشىنى تەك قانا سپورتپەن تاربيەلەۋ كەرەك پە الدە بىلىممەن, اقىلمەن دە تاربيەلەۋ كەرەك پە؟ اقىل, پاتريوتتىق سەزىم سپورتشىنىڭ بيىكتەن كورىنۋى ءۇشىن قانداي ماڭىزعا يە بولۋى مۇمكىن؟

ج.سابىرجانۇلى: وتە دۇرىس. سپورتشىلاردى پاتريوتتىق رۋحتا تاربيەلەۋ كەرەك. ءانۇراندى ءاربىر سپورتشى بىلۋگە مىندەتتى. «ەل وسپەيدى ونەرى قانات جايماسا» دەيدى حالىق. مىسالى, فۋتبولى ارقىلى قازىر برازيليانى دۇنيە ءجۇزى بىلەدى. اناۋ انگليانى دا بىلەدى. قازىر ءبىز دە, قۇدايعا شۇكىر, جاقسى كەلە جاتىرمىز. نامىستى, مىقتى جىگىتتەرىمىز شىعىپ جاتىر. قاي كەزدە دە تاجىريبەگە سۇيەنىپ, بىلىكتىلىكتى جەتىلدىرىپ وتىرۋ قاجەت. بۇعان دا كوبىنە ءمان بەرە بەرمەيمىز. ەلباسىمىز «ۇلتتىق سالت-ءداستۇرىمىز, ادەت-عۇرپىمىز ۇلتىمىزدىڭ گەنەتيكالىق كودى» دەپ ادەمى ايتقان جوق پا؟! ءبىز سپورت سالاسىندا دا وسى تۇجىرىمدى ۇستانۋىمىز كەرەك. مەن, مىسالى, وسى قالادا بەس جىل بويى اسىق ويىنىنان چەمپيونات وتكىزىپ ءجۇردىم. ونىڭ ءوزى قالاعا اكىم بولىپ كەلگەن يمانعالي تاسماعامبەتوۆتىڭ قولداۋىمەن قولعا الىنعان بولاتىن. ال قازىر وسى چەمپيونات توقتاپ قالدى. نەگە؟ قازىر بۇرىنعى زامان ەمەس, اسىق ويناعانعا كۇلەتىندەي ساناسىز ەمەسپىز. كەزىندە ءوزىم, مىسالى, قازاق كۇرەسىن جاڭعىرتۋ ءۇشىن جۇگىرگەنىمدە ماعان «ۇلتشىلسىڭ» دەپ سوككەندەر بولعان. ال قازىر كىم شەكتەۋ قويىپ جاتىر؟

مەن جۋىردا گەرمانياعا ەۋروپا قازاقتارىنىڭ كىشى قۇرىلتايىنا بارىپ كەلدىم. سوندا دانيانىڭ, گوللانديانىڭ, امەريكانىڭ قازاقتارى جينالعان بولاتىن. مىنە, سولار: «ءبىز ۇلتتىق ويىندارىمىزدى نەگە بىلمەيمىز؟ بىزگە اتا-بابامىز ۇلتتىق قۇندىلىقتارىڭنىڭ ءبىرى اسىق ويىنى, سونى ءارى قاراي جەتىلدىرۋ كەرەك دەپ ايتىپ كەتكەن» دەدى. وزدەرى اسىقتى كەرەمەت وينايدى ەكەن. ال بىزدەگىلەر نەگە وينامايدى؟ نامىستانا ما؟ سول سەكىلدى, مەرگەندىكتى دە دامىتۋ كەرەك. اسىق ويىنى, مەرگەندىك, تاعى باسقا دا ۇلتتىق سپورتتىق ويىنىمىزدى جاڭعىرتىپ, سودان ۇلكەن سايىستار وتكىزىپ وتىرۋ قاجەت. مەرگەندىك ونەر قازاق بالاسىنىڭ بويىندا بار. بۇل ۇلتتىق ويىندارىمىزدىڭ قاي-قايسىسى دا بالالارىمىزدىڭ ميىنا دا, دەنساۋلىعىنا دا پايدالى. ال قازىر بالالارىمىز نە ىستەپ ءجۇر؟ تاڭەرتەڭنەن كەشكە دەيىن كومپيۋتەردىڭ الدىندا وتىرادى. ول ميوپياعا شالدىقتىرادى. ميوپيا دەگەن – كوزدىڭ بۇلشىق ەتتەرى دامىماي قالۋى سالدارىنان بولاتىن اۋرۋ, كوز اۋرۋى. كومپيۋتەرگە تەسىلىپ قاراپ وتىرا بەرۋ بۇدان باسقا دا اۋرۋلارعا اكەپ سوعادى. ال ءبىز نەگە وسىعان ءمان بەرمەيمىز؟

س.يمانقۇلوۆا: مەكتەپتە سپورتتىڭ تۇرلەرىن كوبەيتۋ كەرەك. بالالارىمىزدىڭ ازىپ-توزىپ كومپيۋتەردىڭ الدىندا وتىرۋىنا شەك قويۋىمىز كەرەك. مەن دە بۇنى وتە وزەكتى پروبلەما دەپ سانايمىن.

ن.بايىربەك: جالپى مەكتەپتەگى دەنە شىنىقتىرۋ پانىندە ۇلتتىق سپورتقا بەيىمدەۋ قاراستىرىلعان با؟

ج.سابىرجانۇلى: ارنايى قاراستىرىلماعان. بىراق پەداگوگتار كەڭەسىندە وسى ماسەلەنى قوزعاپ, وزدەرى ەنگىزۋگە بولادى. مىسالى, كەيبىر جەرلەردە ساباق شاڭعى تەبۋگە ارنالسا, شاڭعى جوق بولعاندىقتان, ورنىن ۇلتتىق ويىنمەن تولتىرۋعا بولادى. ول ۇستازداردىڭ وزدەرىنىڭ ىنتاسىنا بايلانىستى.

س.يمانقۇلوۆا: جالپى, قازىر نەگىزى سپورتقا جاقسى كوڭىل ءبولىنىپ وتىر عوي. ارنايى سپورت ارناسى اشىلىپ وتىر, باسىلىمدار شىعىپ جاتىر. سپورت سالاسىنا ارنالعان باعدارلامالار دا بارشىلىق. بىراق نامىس ماسەلەسى ءبىرىنشى كەزەكتە بولۋى كەرەك. مىسالى, ۇلكەن سايىستارعا كەلگەندە شەت ەلدەرگە دوداعا باراتىن كەزدە «بارماق باستى, كوز قىستىمەن» ادام جىبەرگەندى قويۋ كەرەك.

ج.سابىرجانۇلى: ءيا, جاردەمبەك ءىنىم بىلەتىن شىعار, بىزدە ونداي جاعداي كوپ بولادى. مەكتەپ ديرەكتورى بولعان كەزىمدە دەپۋتاتتاردىڭ وزدەرى حابارلاسىپ, «پالەنشەنى جىبەر, تولەنشەنى قولدا» دەپ, جۇمىسىما ارالاسىپ وتىراتىن. مۇندايدى قويۋ كەرەك. سانانى وزگەرتۋ كەرەك. نامىس ماسەلەسى ءبىرىنشى تۇرۋعا ءتيىستى.

ج.قابىلحان: مەن باسىندا كوپ سويلەمەيىن دەپ, قىسقاشا بايانداعان ەدىم. ءبىرىنشى ايتقىم كەلىپ وتىرعانى, ءبىزدىڭ مەكتەپكە بالالاردى ىرىكتەپ الۋ ماسەلەسىنە ءالى دە ءمان بەرىپ وتىرمىز. ءبىزدىڭ دە ىرىكتەپ, ايماقتاردان تاڭداپ الىپ كەلگەن بالالارىمىز جاقسى جەتىستىكتەرگە جەتىپ جاتىر. جاڭا جومارت اعامىز ايتقانداي, كەلە سالىپ, العاشقى ءبىر-ەكى جىلدان كەيىن-اق سپورت شەبەرى اتانىپ, ۇلكەن جۇلدەلەرگە يە بولىپ جاتقاندار دا بار. ال مۇنىڭ سىرى نەدە دەسەڭىز, ەڭ باستىسى وتانسۇيگىشتىكتە. قازاقتا حاديستەن الىنعان ءسوز بار: «وتاندى ءسۇيۋ – يماننان» دەيدى. ەگەر ءسىزدىڭ بويىڭىزدا وتانسۇيگىشتىگىڭىز بولماسا, كوك تۋدى كورگەن كەزدە جىلقىمىنەزدەنىپ, كىسىنەپ شىقپاساڭىز, وندا دۇنيە قاراڭ قالادى. كەشە سيدنەيدە وتكەن وليمپيادادا مۇحتار ءىنىمىز كيىمى سۋ بولىپ كەتتى مە, ەڭكەيىڭكىرەپ قالدى. سوندا انا باپكەردىڭ ءسوزى ەستىلىپ تۇردى ەفيردە. ونى بۇكىل قازاق ەستىگەن شىعار, كوزىنە جاس العان دا شىعار: «ەي, تۇر, ەڭسەڭدى كوتەر! قازاق ەمەسسىڭ بە!» دەدى باپكەر… مىنە, ءبىز وزىمىزدەگى 280 بالانى جيناپ الىپ, وسىنى ايتىپ وتىرامىز. «اينالايىن, سەن قازاقتىڭ بالاسىسىڭ. اتا-باباڭ وسىنشا جەردى كۇرەسكەرلىگىمەن, مىقتىلىعىمەن, ءوزىنىڭ مادەنيەتىمەن, كۇشتىلىگىمەن ساقتاپ قالعان. سونى بىزگە امانات قىلىپ قالدىرعان» دەيمىز. ەلىمىزدىڭ تاريحىن, ابىلايحاننىڭ الپىس جەتى جاسىندا قالماقتىڭ باتىرىمەن جەكپە-جەككە ءوزى شىعىپ, قالاي جەڭگەنىن, ەلدى, جەردى قالاي قورعاپ قالعانىن, قانداي باتىرلارىمىز بارىن, كىمنىڭ قازاققا قانداي ەڭبەك سىڭىرگەنىن – ءبارىن-ءبارىن ايتىپ وتىرامىز. ءوزىم دزيۋدو بويىنشا جاتتىقتىرۋشىمىن. بىراق مەنىڭ شاكىرتتەرىم قارا كۇشتىڭ عانا ەمەس, اقىلدىڭ دا يەسى بولۋى كەرەك دەپ ەسەپتەيمىن. سوندىقتان, كەز كەلگەن سايىستا السىرەپ, جەڭىلىپ جاتقان كەزدە, اياعى تايىپ, قۇلاعالى تۇرعاندا «مەن قازاقتىڭ ۇلانىمىن» دەگەن ۇعىم ەسىنە ءتۇسىپ, جىگەرى تاسىپ شىعا كەلسە ەكەن دەيمىن. قازاق دەگەن ءسوزدى قاستەرلەپ, سول اتقا لايىق بولماۋدى نامىس تۇتاتىن بولسا, سول نامىس كەز كەلگەن بالا جەڭىس شىڭىنا تاياعاندا ورگە سۇيرەپ الىپ شىعادى. راس, بىزگە جاڭا كەلگەن بالالار «حانداردى نەگە بىلمەيسىڭ؟ بيلەردى نەگە بىلمەيسىڭ؟» دەگەندە جىلايتىن كەزدەرى بولادى. بىراق سولاي نامىسى قايرالادى.

بىزدە وقيتىن 280 بالاعا باپكەرلەرى جەكە-جەكە جوسپار تولتىرىپ وتىرادى. سونى ءوزىم قاداعالايمىن. سوندا ءبىر سۇراق مىندەتتى تۇردە وتانسۇيگىشتىككە باۋلۋعا ارنالۋى كەرەك. ياعني, بولاشاق سپورتشى بالالارىمىز مەكتەپ جاسىنان مىقتى سپورتشى عانا ەمەس, وتانسۇيگىش, سانالى سپورتشى بولىپ شىعۋعا ءتيىس. اعاشتىڭ دا وزەگى بولادى. وتانسۇيگىشتىك قاسيەت, وتانعا دەگەن ماحاببات كەز كەلگەن ونەر يەسىنىڭ, كەز كەلگەن تۇلعانىڭ وزەگى بولىپ تۇرۋى كەرەك. نە ءۇشىن ءبىز سپورتتى دامىتىپ جاتىرمىز؟ ۇلت ءۇشىن! ەلىمىزدىڭ نامىسى ءۇشىن!

ج.سابىرجانۇلى: بىلتىر ەۋروپا ەلدەرىنەن, سونىڭ ىشىندە گەرمانيا مەن بەلگيادان دەلەگاتتار كەلدى. سونداعى سەميناردا مەن ءسوزىمدى بىلاي باستاعانمىن: «ءبىزدىڭ ۇلان-بايتاق جەرىمىز دۇنيە ءجۇزى بويىنشا توعىزىنشى ورىن الادى. سەگىز گەرمانيا سىيادى ەكەن بىزگە. 52 گوللانديا سىيادى ەكەن. سونى ءبىز قالاي ساقتاپ قالدىق؟ جەكپە-جەكتى, قازاقشا كۇرەستى دامىتىپ وتىرىپ, ساقتادىق. كۇرەسپەن تىرەسكەندى الىپ ۇردىق. مەرگەندىكپەن قاشقاننىڭ ارقاسىنا وق تيگىزدىك. سوسىن ميىمىزدى توعىز قۇمالاق ويناپ, دامىتتىق. اسىق ويناپ, ايلاسىن تاپتىق» دەدىم. سويتسەم, الگىلەر كۇلەدى… سول سەكىلدى, ءبىز وسى ۇلان-بايتاق جەرىمىزدى ۇلتتىق ويىندارىمىزدىڭ ارقاسىندا ساقتاپ قالعانبىز. اتا-بابامىز سونىمەن شىنىعىپ وتىردى.

جالپى, قازىر جاعدايىمىز جامان ەمەس قوي. قازاق كۇرەسى, باسقا دا ويىندار دامىپ جاتىر. سپورتشىلارعا تىگىلەتىن جۇلدەلى سىيلىقتار دا جەتەرلىك.

ج.قابىلحان: راسىندا, جاعداي قازىر جامان ەمەس. ۇكىمەتتەگى سپورت مەكەمەلەرىن باسقاراتىن باسشىلار دا بۇل سالاعا جاقسى كوڭىل ءبولىپ وتىر.

بىراق, مەنىڭ ويىمشا, سپورت عيماراتتارى ايماقتاردا دا كوپتەپ اشىلۋى كەرەك. قازىر ءىرى ورتالىقتاردا عانا بار. بۇگىندە, مىسالى, جالعىز مەكتەپتەن 11 ادام ازيا ويىندارىنا قاتىسايىن دەپ وتىر. ال بىزدە ءار وبلىستان 11 ادام شىقسا, جاقسى ەدى عوي. ال ءار وبلىستان مىقتىلار شىعۋى ءۇشىن, ءار ايماقتاعى اكىمدەر سپورتقا دۇرىس كوڭىل ءبولىپ, دامىتۋ كەرەك.

سول سياقتى مەنىڭ كوكەيىمدە ءبىر ارمان بار. بىزدە, استانادا قازىر «الاۋ» مۇز ايدىنى, «استانا ۆەلوترەك», باسقا دا ءتۇرلى سپورتتىق ۇلكەن ورتالىقتار بار. بىراق نەگە ۇلتتىق سپورت تۇرلەرىنە ارنالعان ورتالىقتار جوق؟ نەگە كۇرەس سارايى جوق؟ ءومىر باقي قازاقتى تانىتىپ كەلە جاتقان بوكسقا ارنالعان ساراي نەگە جوق؟ ءبىزدىڭ جانىمىزدى ساقتاپ كەلە جاتقان وسى جەكپە-جەكتەر عوي. نەگە سولاردى دارىپتەمەيمىز؟..

ماعان كەيدە «سەن قازاق سپورتىنىڭ وكىلى ەمەسسىڭ, نەگە سونى ايتا بەرەسىڭ» دەيدى. نەگە ايتپايمىن؟ ءبىز قازاقپىز عوي. جومارت اعامىز سياقتى مەن دە قازاقتىڭ ۇلتتىق سپورتى دەسە, جايناپ شىعا كەلەتىن ازاماتتاردىڭ ءبىرىمىن. ءبىز, قازاقتىڭ ءاربىر ازاماتى, قاي سالادا جۇرسەك تە ءبىرىنشى مىندەتىمىز قازاقتىڭ ابىرويىن اسقاقتاتۋ ەكەنىن ەستەن شىعارماساق ەكەن دەيمىن. ءبىزدىڭ بالالار, مىسالى, قازىر ابايدى جاتقا وقيدى. ءان ايتىپ, ساحناعا دا شىعا الادى. سولاي رۋحى تاربيەلەنىپ, رۋحى شىڭدالعان بالالار مىقتى بولۋعا ءتيىس. كەشەگى ءبىرجان سال, بايعابىل, سەگىز سەرى, بالۋان شولاق – ءبارى جەتى ونەردىڭ يەسى بولعان. ءبىز دە سپورتشىلارىمىزدى سولاي, ۇلتتىق رۋحتا, جان-جاقتى تاربيەلەسەك دەپ وتىرمىز.

ويتكەنى, جومارت اعامىز ايتقانداي, وسىنداي الەم بويىنشا توعىزىنشى ورىندى الاتىن كەڭ جەرىمىزدى ءبىز سەگىز قىرلى ءبىر سىرلى بابالارىمىزدىڭ ارقاسىندا ساقتاپ قالىپ وتىرمىز.

***

ع.قوجابەكوۆ: قۇرمەتتى قوناقتار, رەداكتسيامىزدىڭ شاقىرۋىن ىقىلاسپەن قابىلداپ, «بايتەرەك» تۇبىندەگى باسقوسۋعا بەلسەنە قاتىسقاندارىڭىز ءۇشىن العىسىمىزدى ايتىپ, كاسىبي مەرەكەلەرىڭىز – سپورت كۇنىمەن بارشاڭىزدى جانە سىزدەردىڭ ارىپتەستەرىڭىزدى دە قۇتتىقتايمىز.