ەلوردا تىرشىلىگىن, جاستار قالاسىنىڭ ءومىرىن ءجىتى باقىلاپ جۇرگەن زەرتتەۋشىلەردىڭ مالىمەتىنە قاراعاندا, ەلوردامىزدىڭ ءاربىر ءتورتىنشى تۇرعىنى دەنە شىنىقتىرۋ جانە سپورتپەن اينالىسادى ەكەن. زەرتتەۋ ناتيجەسىندە قالا تۇرعىندارىنىڭ 35 پايىزىنىڭ جۇزۋگە باراتىنى, ءاربىر بەسىنشى تۇرعىن بوكس, كۇرەس سەكىلدى جەكپە-جەك تۇرلەرىن تاڭدايتىنى, جاستاردىڭ باسىم بولىگىنىڭ فۋتبول وينايتىنى بەلگىلى بولىپ وتىر. سوڭعى كەزدەرى جاستار اراسىندا فيتنەس, جەڭىل اتلەتيكا جانە ۆەلوسپورتقا اۋەستەنۋشىلەر سانى ارتقان. 2019 جىلدىڭ ءبىرىنشى جارتى جىلىنىڭ مالىمەتى بويىنشا 319540 قالا تۇرعىنى نەمەسە 29,2 پايىزى ءجۇيەلى تۇردە دەنە شىنىقتىرۋ جانە ساۋىقتىرۋمەن اينالىسادى.
وسى رەتتە «حالىقارالىق جارىستاردىڭ ەلوردادا ءوتۋى سپورتقا دەگەن كوزقاراسىمىزدى جاڭا دارەجەگە كوتەرەتىنى ءسوزسىز. تۋريستەر مەن ينۆەستيتسيانىڭ قالاعا اعىلۋىنا ىقپالىن دا تيگىزەدى. اسىرەسە, جاستاردىڭ بۇقارالىق سپورتقا دەگەن قىزىعۋشىلىعىن ارتتىرادى» دەگەن نۇر-سۇلتان قالاسىنىڭ اكىمى التاي كولگىنوۆ باس قالامىزداعى بۇقارالىق سپورتتىڭ دامۋىنا ەرەكشە ماڭىز بەرىپ وتىر.
ەلوردا سپورتى – ەل سپورتى
ەلوردادا, اسىرەسە, بۇقارالىق سپورت تۇرلەرىن ۇيىمداستىرۋعا ەرەكشە كوڭىل بولىنگەن. مىسالى, نۇر-سۇلتان قالاسىندا وتكەن «JASTAR BIKE» بۇقارالىق ۆەلوجۇگىرىسكە اۋەسقوي سپورتشىلار عانا ەمەس, قالا تۇرعىندارى دا بەلسەنە قاتىستى. «نۇر-سۇلتان دۋاتلون-2019» جارىسىنا دا 16 جاستان اسقاندار قاتىسىپ, ءجۇزۋ, جۇگىرۋ جانە ۆەلوجارىستان ءۇش قاشىقتىقتى باعىندىردى. ەلوردالىقتاردىڭ جەكەلەي سپورتتاعى جەتىستىكتەرى جەتكىلىكتى. سونىڭ ءبىرى – بيىلعى جىلدىڭ 20-23 ماۋسىمىندا وڭتۇستىك كورەياداعى كەندجۋ قالاسىندا بارلىق ازيا كونتينەنتىنىڭ كاسىبي ترياتلەتتەرى مەن پاراترياتلەتتەرى اراسىندا ترياتلون بويىنشا ازيا چەمپيوناتى وتكەن كەزدە ەلوردالىق سپورتشى, U23 جاس ساناتىندا جارىسقا تۇسكەن دارىن قونىسباەۆ 14 مەملەكەت وكىلدەرى اراسىندا ءبىرىنشى ورىندى جەڭىپ الدى. سول جارىستا نۇر-سۇلتان قالاسىنىڭ وكىلى ارينا شۋلگينا دا قولا جۇلدەگە يە بولدى.
بۇقارالىق سپورتقا ءبارى تارتىلادى
مەملەكەت باسشىسىنىڭ تاپسىرماسىمەن نۇر-سۇلتان قالاسىنىڭ اكىمدىگى مۇگەدەك سپورتشىلارعا رەسپۋبليكالىق جانە حالىقارالىق جارىستاردا ەلوردانىڭ جانە ەلىمىزدىڭ نامىسىن قورعاۋعا مۇمكىندىك بەرۋ ماقساتىندا جاتتىعۋعا جاعداي جاساۋ شارالارىن قولعا الدى. جالپى, باسىمدى باعىت جەكە باستامالاردى قولداۋعا, وتباسىلىق ويىن-ساۋىق ءىس-شارالارىن ۇيىمداستىرۋعا, سونداي-اق ءىس-شارالارعا بەلگىلى سپورتشىلاردى تارتۋعا, اۋەسقوي سپورتتىق جارىستاردى ۇيىمداستىرۋعا, ويىن سپورت تۇرلەرىنەن مەكتەپ ليگالارىن ۇيىمداستىرۋعا باعىتتالعان. قالادا سپورتتىڭ فۋتبول, گاندبول, ۆولەيبول, باسكەتبول, شايبالى حوككەي تۇرلەرىنەن ءداستۇرلى مەكتەپ ليگالارى قالىپتاستى. سونداي-اق مەملەكەتتىك قىزمەتشىلەر, مەديتسينا قىزمەتكەرلەرى, سالىق سالاسىنىڭ قىزمەتكەرلەرى, قىلمىستىق جازاسىن وتەۋشىلەر, ستۋدەنتتەر اراسىندا ۋنيۆەرسيادا جانە سپارتاكيادالار وتكىزىلەدى.
ەلباسى ن.نازارباەۆتىڭ قويعان باستى تاپسىرمالارىنىڭ ءبىرى 2020 جىلعا دەيىن جۇيەلى تۇردە دەنە شىنىقتىرۋ جانە سپورتپەن شۇعىلداناتىن حالىق سانىن 30 پايىزعا دەيىن ءوسىرۋ بولاتىن. وسى تۇرعىدا ەلوردامىزدا جۇيەلى جۇمىستار جۇرگىزىلۋدە. قازىرگى ۋاقىتتا قالامىزدا 719 سپورتتىق نىسان بار. ونىڭ 324-ءى – اشىق جانە جازىقتاعى سپورتتىق الاڭدار, وندا ءار تۇرعىن ءۇي اۋلاسىندا, ساياباقتاردا ورنالاسقان جاتتىعۋ الاڭدارى جانە باسكەتبول, فۋتبول الاڭدارى قاراستىرىلعان.
«Fitness Park Nur-Sultan» قاتىسۋشىلارى كوبەيىپ كەلەدى
جازعى ۋاقىتتا قالا تۇرعىندارىنىڭ بوس ۋاقىتىن ءتيىمدى وتكىزۋ ءۇشىن «Fitness Park Nur-Sultan» جوباسى ىسكە اسىرىلعان. بۇل كەز كەلگەن ادامعا ارنالعان اشىق اسپان استىنداعى تەگىن جاتتىعۋلار, ياعني زۋمبا فيتنەس, كروسسفيت, بوكس, دجيۋ-دجيتسۋ, يوگا, جۇگىرۋ بويىنشا قالانىڭ 4 ساياباعىندا, اتاپ ايتقاندا, «استانالىق», «جەتىسۋ», «جەرۇيىق» جانە بوتانيكالىق ساياباقتا ءار جەكسەنبى ساعات 10:00-دەن 12:00-گە دەيىن وتكىزىلەدى. اتالعان سپورت تۇرلەرى بويىنشا جاتتىعۋلاردى كاسىبي جاتتىقتىرۋشىلار جۇرگىزەدى. سونىمەن قاتار ۆەلوسيپەد ماۋسىمىنىڭ اشىلۋىنا وراي قالادا جازعى ۋاقىتتا شامامەن 5 ۆەلوجۇگىرىس ۇيىمداستىرىلادى. ولاردىڭ ارقايسىسى 500-دەن 2000-عا دەيىنگى اۋەسقوي سپورتشىلاردى جينادى. جىل سايىن قىركۇيەك ايىندا «استانا مارافون» جەڭىلاتلەتيكالىق جۇگىرىس وتكىزۋ دە داستۇرگە اينالعان. وعان 5 مىڭعا جۋىق اۋەسقوي مەن كاسىبي جەلاياق قاتىسادى. جۇگىرۋ قاشىقتىعى 10, 21, 42 شاقىرىمدى قۇرايدى. ال قىسقى ۋاقىتتا ەسىل وزەنىنىڭ بويىندا ءداستۇرلى تۇردە «بۇرقاسىن» شاڭعى فەستيۆالى وتەدى. فەستيۆال اياسىندا شاعىن فۋتبول, بەلبەۋ كۇرەسى, گىر تاسىن كوتەرۋ, قول كۇرەسى, ارقان تارتىس, موتوكروسس سىندى سايىس تۇرلەرىنەن جارىس ۇيىمداستىرىلادى. بۇل ءىس-شارالار وتباسىمەن, ۇجىممەن تازا اۋادا قىسقى دەمالىس وتكىزۋگە ۇلكەن مۇمكىندىك بەرەدى. جالپى, نۇر-سۇلتان قالاسى تۇرعىندارىنىڭ اسىعا كۇتەتىن سپورتتىق شارالارى كوبەيىپ وتىر.
P.S. ەلوردادا 2019 جىلدىڭ ءبىرىنشى جارتىجىلدىعىندا ۇيىمداستىرىلعان 400-دەن اسا سپورتتىق ءىس-شارا نۇر-سۇلتان قالاسىنىڭ تۇرعىندارى, مەيماندارى, اسىرەسە بالالار مەن جاستار اراسىنداعى قارىم-قاتىناستى نىعايتۋعا, بۇقارالىق سپورتتىڭ قالالىق داستۇرگە اينالۋىنا ىقپال جاساعانى ءسوزسىز. ەڭ باستىسى, سالاۋاتتى ءومىر سالتىنا ۇمتىلعان, بۇقارالىق جانە جوعارى شەبەرلىكتەگى سپورتپەن اينالىسامىن دەگەن جۇرتشىلىققا جاعداي جاسالىپ وتىر. ولاي بولسا ەلوردامىزدىڭ سپورتشى قالا بولۋىنا بارشامىزدىڭ ىقىلاستى بولعانىمىز ابزال دەمەكپىز.
جادىرا شامۇراتوۆا
