قالالىق توتەنشە جاعدايلار دەپارتامەنتى كوكتەمگى سۋ تاسقىنىنىڭ الدىن الۋ ماقساتىندا ەلوردانىڭ شەكارالىق اۋماعىن تىكۇشاقپەن اينالىپ ۇشۋ شارالارىن ۇيىمداستىردى. وعان نۇر-سۇلتان قالاسىنىڭ اكىمى باقىت سۇلتانوۆ, ىشكى ىستەر ءمينيسترىنىڭ ورىنباسارى يۋري يلين, توتەنشە جاعدايلار دەپارتامەنتى باستىعىنىڭ مىندەتىن ۋاقىتشا اتقارۋشى مارعۇلان امانباەۆ, «ەسىل باسسەينى ينسپەكتسياسى» رمم, «قازگيدرومەت» مكقك, ەسىل وزەنىنىڭ ارناسىن جوبالاۋشى «ورتا» جشس وكىلدەرى قاتىستى. بۇل شارا سۋ تاسقىنىنىڭ قاۋپى تۋرالى اقپارات جيناۋ جانە تابيعي سيپاتتاعى توتەنشە جاعدايلاردىڭ تۋىنداۋىنا جول بەرمەۋ ءۇشىن قاجەتتى ءىس-قيمىلداردى ازىرلەۋ ماقساتىندا وتكىزىلدى.
– اۋماقتى تىكۇشاقپەن ارالاۋ بارىسىندا مايبالىق كولى, ۆياچەسلاۆ سۋ قويماسى اۋدانى, قاراعاندى جانە اقمولا وبلىستارىنىڭ ەلدى مەكەندەرىندەگى قار جانە ىلعال قورىنىڭ اۋقىمى ناقتىلاندى. بۇل جۇمىستار ۆياچەسلاۆ سۋ قويماسى, استانالىق سۋ باقىلاۋ رەتتەگىشىندە سۋدىڭ اعىنىن الدىن الا ەسەپتەۋگە ءارى جەرگىلىكتى اتقارۋشى ورگاندارعا, توتەنشە جاعدايلار دەپارتامەنتى مەن «قازسۋشار» مەملەكەتتىك مەكەمەسىنە سۋ تاسقىنىنا الدىن الا دايىندالۋعا مۇمكىندىك بەرەدى. سونداي-اق سۋ تاسقىنىنىڭ الدىن الۋ ءۇشىن قالا اكىمدىگىمەن بىرلەسە وتىرىپ, ەلوردا اۋماعىنداعى تاسقىن سۋلاردى جۇيەلى وتكىزۋ بويىنشا كەشەندى ءىس-شارالار جوسپارى ازىرلەندى, – دەلىنگەن قۇزىرلى دەپارتامەنتتىڭ حابارلاماسىندا.
بۇگىنگى تاڭدا سۋ باسۋى مۇمكىن 34 ۋچاسكە بار. ءار ۋچاسكە بويىنشا اتقارىلاتىن جۇمىس تۇرلەرى, قاجەتتى ماتەريالداردىڭ كولەمى انىقتالىپ, جاۋاپتى ورىنداۋشىلار بەلگىلەندى. قالا اۋماعىنداعى اۆتوكولىك جولدارىنىڭ بارلىق سۋ تاسقىنى قاۋپى بار جانە قار باساتىن ۋچاسكەلەرىن, سونداي-اق زارداپ شەككەندەرگە جۇمىلدىرىلاتىن كۇشتەر مەن قۇرالداردى, جىلىتۋ نۇكتەلەرىن ەنگىزە وتىرىپ, تابيعي جانە تەحنوگەندىك سيپاتتاعى توتەنشە جاعدايلاردىڭ ىقتيمالدىلىعى كارتاسى ازىرلەنگەن. سونىڭ ىشىندە يلينكا, ءوندىرىس, كوكتال, تەمىرجولشىلار, پريگورودنىي, وڭتۇستىك-شىعىس تۇرعىن الاپتارى, جاڭا تەمىرجول ۆوكزالى, اۋەجاي, گاز اپپاراتۋراسى زاۋىتىنىڭ اۋداندارى دا ەسكەرىلگەن.
قالالىق قىزمەتتەردىڭ جۇمىسىن ۇيلەستىرۋ ماقساتىندا اۋماقتار مەن ەلدى مەكەندەردى تاسقىن سۋلاردىڭ زياندى اسەرىنەن قورعاۋدى قامتاماسىز ەتۋ باعىتىندا ءىس-شارالاردى وتكىزۋ كەزىندەگى مەملەكەتتىك ورگانداردىڭ ءوزارا ءىس-قيمىل الگوريتمى بەكىتىلدى. سونداي-اق توتەنشە جاعدايلاردان زارداپ شەككەن حالىقتى كوشىرۋ بويىنشا مەملەكەتتىك ورگانداردىڭ ءوزارا ءىس-قيمىل الگوريتمى بەكىتىلگەن. تۇرعىنداردى قاۋىپسىز جەرگە كوشىرۋ قاجەت بولعان جاعدايدا حالىقتى ۋاقىتشا ورنالاستىراتىن جەرلەر انىقتالدى. ناقتىراق ايتساق, ولار تەمىرجول ۆوكزالى, ساپارجاي, مەكتەپتەردىڭ سپورت زالدارى, قوناقۇيلەر مەن جاتاقحانالارعا ورنالاسادى. سۋ تاسقىنى كەزىندە قاجەتتىلىك تۋىنداعاندا پايدالانۋعا بولاتىن 73 حالىق جينالاتىن ەۆاكۋاتسيالىق نۇكتەلەر بار.
سۋ تاسقىنىنا قالانىڭ ازاماتتىق قورعاۋ جۇيەسىن دايىنداۋ ماقساتىندا كوممۋنالدىق قىزمەتتەر مەن ىشكى ىستەر ورگاندارىنىڭ اۆتوكولىكتەرى مەن ينجەنەرلىك تەحنيكاسىنىڭ جالپى توبى جاساقتالعان. ونىڭ جەكە قۇرامىندا 663 ادام, 191 بىرلىك تەحنيكا, 14 ءجۇزۋ قۇرالدارى, 67 موتوپومپا, 1 تىكۇشاق بار. ينەرتتى ماتەريالداردىڭ قورىنا كەلسەك, 18000 توننا قۇم, ۇساق تاس, جانار-جاعارماي جانە ازىق-تۇلىكتەر دايىندالعان. قازىرگى كەزدە استانا سۋ قويماسىنىڭ سۋ شىعىنى 13,89 م3/سەكۋندتى قۇرايدى, سۋ تولىمدىلىعى – 233, 31 ملن تەكشە مەتر, بۇل – جوبالىق قۋاتتىڭ 56,78 پايىزى. سۋ باقىلاۋ رەتتەگىشىنىڭ ناقتى سۋ تولىمدىلىعى كولەمى – 2,6 ملن تەكشە مەتر. 27 ناۋرىزداعى جاعدايعا سايكەس, رەتتەۋشى سىيىمدىلىقتىڭ نەگىزگى سۋ جىبەرۋ ارقىلى سۋ شىعارۋدىڭ كولەمى – 1,5 تەكشە مەتر/سەكۋند. №1 سۋ شىعارۋ نۇكتەسى ارقىلى وتەتىن ەسىل وزەنىنىڭ تۇرمىستىق شىعىنى – 0,8 تەكشە-مەتر/سەكۋند.
