سۋدان شىققان سۋىردى كوردىڭىز بە؟

فۋتبولدان الەم چەمپيوناتى جاھاننىڭ تۇكپىر-تۇكپىرىنەن كەلگەن كىل جۇيرىكتەردىڭ باسىن قوسقان الامان بايگە سياقتى. مۇندا دا ارعىماق اتتار جارىسىنداعىداي ناعىز ۇزدىكتەر باسىندا تىزگىندى تەجەپ ۇستاپ, سايىس ۇزاعان سايىن قىزا تۇسەدى. العاشقى ءبىر جارىم تۋردىڭ بايىبى وسىنى كورسەتىپ وتىر. سوندىعىنان بولار, بۇگىنگى ەسەپتى كەزەڭدە وينالعان 6 ماتچتىڭ 4-ەۋىندە 1:0 دەگەن ەسەپ تىركەلدى. بىراق «ساۋىسقاننان دا ساقتىق» تانىتۋ ءبىر قۇرامالار ءۇشىن قىمباتقا ءتۇسىپ قالعان سىڭايلى. وسىنداي «ابايلى ويىن» ارگەنتينانى جولدان دا شىعارىپ تاستاۋعا جاقىنداتتى. 

قازاقتا «سۋدان شىققان سۋىرداي» دەگەن تەڭەۋ-تىركەس بار. ول الدەنەدەن بەتى قايتىپ, سۇمىرەيىپ قالعان كىسىگە قاراتا ايتىلادى. بۇرناعى كۇننىڭ ءتۇن ورتاسى اۋا ارگەنتينا قۇراماسى تاپ وسىنداي كەيىپكە ءتۇستى. ونىڭ ليدەرى ليونەل مەسسيدىڭ تۇرىنە قاراۋ ءتىپتى مۇمكىن ەمەس ەدى. بىراق مۇنى ەشكىم دە ءجونسىز بولدى دەپ ايتا الماسا كەرەك. كوماندانىڭ حورۆاتيادان 0:3 بولىپ كۇيرەي جەڭىلۋى, شىن مانىندە, زاڭدىلىق سياقتى بولىپ كورىنەدى.

جالپى, بۇل ارگەنتينانى چەمپيوناتتىڭ ءفاۆوريتى ساناپ كەلگەندەرگە ۇلكەن سىن بولدى. ونىڭ قارىم-قابىلەتىنە قاتىستى كۇدىك مۇنىڭ الدىندا يسلانديامەن وتكىزگەن كەزدەسۋىنەن كەيىن-اق بوي كوتەرگەن. ال سوڭعى ويىن La Albicelestes جاساعىندا تۇتاس ۇجىم دا, ولاردى بىرىكتىرەتىن ۇيلەسىمدىلىك تە, ءتىپتى ءار ۇشىراسۋ ءۇشىن جاسالعان جەكە جوسپار دا جوق ەكەنىن بايقاتتى. وسى جەردە بۇدان الدىن ديەگو مارادونانىڭ باس باپكەر حورحە ءسامپاوليدى ويىنشىلاردى مەنەدجەر سياقتاندىرىپ ءبولىپ قويعانىمەن, ولارعا نە ىستەۋ كەرەكتىگىن ءتۇسىندىرۋدى ۇمىتىپ كەتتى دەگەن سىڭايدا سىناعانى ەسكە تۇسەدى. شىنىندا, «دويبىشىلار» وزدەرىن پرەسسينگتى سۇراپىل سەرپىنمەن قولدانا بىلەتىن, قورعانىستا مىعىم, شابۋىلدا وتكىر, تارتىستى كۇرەسكە دايىن بولىپ قالىپتاسقان ۇجىم رەتىندە كورسەتتى. مۇنداي بەس قارۋى ساي جاۋىنگەر جاماعاتقا قارسى ويناۋعا «اسپان تۇستەس اقشىل-كوك» جىگىتتەر دايار بولماي شىقتى. ويىن دەڭگەيىندەگى وسى ايىرماشىلىق اقىر سوڭىندا تابلوداعى ەسەپ قالپىندا كورىنىس تاپتى. ءبىرىنشى ويىندا بەتى قايتىپ قالعان ارگەنتينا حورۆاتيامەن كەزدەسۋگە سحەماسىن وزگەرتىپ شىقتى. ادەتتە, مۇنداي تۋرنيردە ءبىرىنشى ماتچتان كەيىن ويىن وزگەرتىلە بەرمەيدى. ال حورحە سامپاولي ونى تۇبىرىنەن تۇلەتىپ جىبەردى. ءسويتىپ, بۇگىندە وتە سيرەك قولدانىلاتىن 3-4-3 سحەماسىن ۇستاندى. مۋنديالدى كوتەرىڭكى كوڭىل كۇيمەن باستاعان زلاتكو ءداليچتىڭ شاكىرتتەرى نيگەريانى ۇتقان قۇراممەن, سول 4-2-3-1 سىزباسىمەن ويىنعا كىرىستى. الاڭداعى تورەشى, وزبەكستاندىق راۆشان يرماتوۆتىڭ ىسقىرىعى ەستىلىسىمەن شابۋىلعا كوشكەن ارگەنتينالىقتار باسىندا ءبارىن جاپىرىپ وتە شىعاتىنداي بولىپ كورىنگەن. ولار, بۇعان قوسا, الاڭنىڭ بارلىق نۇكتەسىندە پرەسسينگ جاساۋ ءتاسىلىن قولداندى. مۇنىڭ ەسەسىنە, حورۆاتتار بارىنشا سالقىنقاندىلىق تانىتتى. ولار باسەكەلەستەرىنىڭ قىسپاعىنان سىتىلىپ شىقتى دا, كەڭ اۋقىمدى شابۋىلعا ۇزەڭگى قاقتى. ال ارگەنتينالىقتار سول كەزدەردە ابىرجىپ جۇرگەن جانداردىڭ كەسكىنىن بايقاتىپ الدى. وسى كۇيگەلەكتىك ولاردى سازعا وتىرعىزدى. ويىننىڭ 5-مينۋتىندا-اق يۆان پەريشيچ سول قاپتالدان سۋىرىلىپ كەلىپ, قاقپاعا قاراي قاقىراتا دوپ ۇردى. قاقپانى تۋرالاپ كەلگەن قاۋىپتەن گولكيپەر ۆيلفرەدو كابالەرو قورعاپ قالدى. ويىننىڭ ۋاقىتى ۇزاعان سايىن حورۆاتتاردىڭ ارتىقش ىل ىعى ايقىندالا بەردى. بىراق ولارعا ءبىرىنشى تايمدا ەسەپ اشۋدىڭ ورايى كەلمەدى. ەكىنشى تايمد ا دا سول باسىمدىق ساقتالىپ تۇردى. ال العاشقى گول كۇتپەگەن جەردەن سالىندى. قورعاۋشى گابرەل مەركادو ارتقا, قاقپاشىعا دوپ تاستادى. سول كەزدە وزىنە قاراي ۇمتىلعان انتە رەبيچتەن قورعانعان كابالەرو تەز تەبەمىن دەپ, ونى وزىنەن كوپ ۇزاتا المادى. مىنە, سونى جولاي ءىلىپ اكەتكەن حورۆات فۋتبولشىسى اشىق قاقپاعا ارقىراتا ۇردى. كەلەسى گول ويىننىڭ 80-مينۋتىندا سوعىلدى. ونى ايىپ الاڭىنىڭ سىرتىندا دوپ العان كوماندا كاپيتانى لۋكا مودريچ الىستان ۇرىپ ءتۇسىرۋ ارقىلى جاسادى. ول ءوزىنىڭ الدىندا جۇرگەن بىرنەشە ويىنشىنىڭ جانىنان زۋلاتا جونەلتىپ, قاقپاشىنى دا قاپى قالدىردى. وسىدان كەيىن ارگەنتينا قۇراماسى مۇلدەم قاۋقارسىز دا قورعانسىز سياقتى بولىپ قالدى. ولاردىڭ ادەپكىدە جانتالاسا العا شاۋىپ, جىلدامىراق ەسە قايتارماق سياقتى بولىپ كورىنگەن. سول شابۋىلداردىڭ بىرىندە پاۋلو ديبالا ءبىر دوپتىڭ قايىرىمىن قايتارا جازدادى. بىراق قاقپاعا قاراي ۇراتىن مەزەتتى سوزىپ الىپ, ءساتتىڭ قولايىن جىبەرىپ قويدى. حورۆاتتار مۇنىڭ جازاسىن تەز بەردى. اۋەلى يۆان راكيتيچ الىستان دوپ ۇردى, كابالەرو ونى قايتاردى, سول كەزدە دوپتى قاعىپ اكەتكەن ماتەو كوۆاچيچ قايتادان راكيتيچكە بەرە قويدى. يۆان سوسىن دوپتى اشىق تورعا سۇڭگىتە سالدى. تالقانداۋ تاۋانى وسىلاي جاسالدى. ەندى بۇل توپتىڭ تولىق تاعدىرىن يسلانديا مەن نيگەريا اراسىنداعى ويىننىڭ قورىتىندىسى شەشىپ بەرەدى.

قىسقا-نۇسقا

* ماۋسىمنىڭ 22-سىنە دەيىن چەمپيوناتتا 23 ماتچ وينالدى.

* بۇل ويىنداردا ەڭ كوپ كەزدەسكەن ەسەپ – 1:0. ول 10 رەت تىركەلدى.

* 23 ماتچتا 51 گول سوعىلدى. سوندا ءار ماتچقا ورتا ەسەپپەن 2,21 دوپتان كەلىپ تۇر.

* وسى ارالىقتا 1 فۋتبولشى الاڭنان قۋىلىپ, 69 فۋتبولشىعا ەسكەرتۋ بەرىلدى. دانيالىق يۋسسۋف پوۋلسەن ەكى ويىندا ەسكەرتۋ الدى.

* 23 ماتچتى 2014862 ادام كوردى. بۇل – ءار كەزدەسۋدە ورتا ەسەپپەن 44120 كورەرمەن بولدى دەگەن ءسوز.

* «لۋجنيكيدە» وينالعان رەسەي – ساۋد ارابياسى, گەرمانيا – مەكسيكا, پورتۋگاليا – ماروككو ارا
سىنداعى ويىنداردى 78011 جانكۇيەر تاماشالادى. بۇل – ەڭ جوعارعى كورسەتكىش.

* ەڭ از كورەرمەن ەكاتەرينبۋرگتە وتكەن ەگيپەت – ۋرۋگۆاي اراسىنداعى كەزدەسۋدە تىركەلدى. وعان 27015 ادام جينالدى.

* وسى كەزگە دەيىن قاقپاعا 11 پەنالتي بەلگىلەنىپ, ولاردىڭ 9-ى گولعا اينالدى. ارگەنتينا – يسلانديا ماتچىندا ارگەنتينالىق ليونەل مەسسي ۇرعان دوپتى يسلانديالىق قاقپاشى حاننەس حاللدوۋرسسون قاعىپ الدى. ال پەرۋ – دانيا كەزدەسۋىندە دات كريستيان كۋەۆا قاقپادان جوعارى تەۋىپ جىبەردى.

* چەمپيوناتتا 1 حەت-تريك, 4 دۋبل جاسالدى, 5 اۆتوگول سوعىلدى.

تۋرنير تابلوسى

2-تۋر

20 ماۋسىم

ماسكەۋ, «لۋجنيكي». پورتۋگاليا – ماروككو 1:0

گول: كريشتيانۋ رونالدۋ (4)

دونداعى روستوۆ. ۋرۋگۆاي – ساۋد ارابياسى 1:0

گول: لۋيس سۋارەس (23)

21 ماۋسىم

قازان. يران – يسپانيا 0:1

گول: ديەگو كوستا (54)

سامارا. دانيا – اۆستراليا 1:1

گولدار: كريستيان ەريكسەن (7) – ميلە ەديناك (28, پەنالتي)

ەكاتەرينبۋرگ. فرانتسيا – پەرۋ 1:0

گول: كيلليان مباپپە (34)

22 ماۋسىم

نيجني نوۆگورود. ارگەنتينا – حورۆاتيا 0:3

گولدار: انتە رەبيچ (53), لۋكا مودريچ (80), يۆان راكيتيچ (90+1)

سەرىك ءپىرنازار