سۋلى-نۋلى سەرۋەنجول جاڭعىرادى
استانانىڭ ەڭ كورىكتى جەرى – «نۇر جولى». تامىز ايىنىڭ باسىندا اتالمىش اۋماقتى جاڭعىرتۋ جۇمىستارى باستالدى. بۇگىندە قۇرىلىس الاڭى قورشالىپ, ونداعى ەسكى تاقتاتاستار تۇگەل الىنۋدا.
مەملەكەت باسشىسىنىڭ تاپسىرماسىنا سايكەس قولعا الىنعان جوبا رەسپۋبليكالىق بيۋدجەت ەسەبىنەن قارجىلاندىرىلۋدا. اۋماعىنىڭ ۇلكەندىگىنە قاراي سۋلى-
نۋلى سەرۋەنجولدى جاڭارتۋ تۇتاستاي العاندا 33 گەكتار ءتورت جەر تەلىمىنە بولىنگەن. قۇرىلىس-مونتاج جۇمىستارى كەزەڭ-كەزەڭىمەن جۇزەگە اسادى. استانا قالاسى ەنەرگەتيكا جانە كوممۋنالدىق شارۋاشىلىق باسقارماسىنىڭ باس مامانى ۆيتالي پۋستوۆەتوۆ: «قازىر ءتورتىنشى اۋماقتىڭ جۇمىستارى قارقىندى جۇرگىزىلۋدە. بۇل ورىنبور جانە تۇركىستان كوشەلەرىنەن دوستىق پەن قوناەۆ كوشەلەرىنە دەيىنگى اۋماقتى قامتيدى. ازىرگە تەحنيكا تارتىلا قويمادى. مۇندا جۇمىسشىلار قولداپ جۇمىس ىستەۋدە. بەتوندار مەن ەسكى تاقتاتاستار رەتىمەن الىنىپ, سىرتقا شىعارىلۋدا. اۋماقتىڭ قۇرىلىس جۇمىستارىن قارا كۇزگە دەيىن اياقتاۋ كوزدەلۋدە. جالپى, اقوردادان باستالىپ, «قازمۇنايگاز» عيماراتىنا دەيىن سوزىلىپ جاتقان سۋلى-نۋلى سەرۋەنجول قۇرىلىسى 2014 جىلى بىتەدى دەپ جوسپارلانۋدا» دەيدى.
جوبا بويىنشا جاڭا كوگالدار مەن گۇلدەر, شىرشا, قايىڭ, قاراعاي جانە تەرەك وتىرعىزىلادى. بۇدان بولەك, جارىقتاندىرۋ, قوعامدىق دارەتحانالاردى اۋىستىرۋ, ديسپەتچەرلىك ورىن مەن باقىلاۋ كامەرالارىن ورناتۋ قاراستىرىلعان. قالا قۇرىلىسىنا جاۋاپتى ماماندار بارلىق كومپوزيتسيا ۇلتتىق ناقىشتا جاسالاتىنىن ايتادى.
گۇلميرا ايماعانبەت