ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ۇيىمداستىرۋىمەن استاناداعى «زودياك» بيليارد كلۋبىندا بايلانىس جانە اقپارات قىزمەتكەرلەرى كۇنىنە وراي جۋرناليستەر قاۋىمى اراسىندا اقسەلەۋ سەيدىمبەكتى ەسكە الۋعا ارنالعان ءداستۇرلى تۋرنير ءوتتى.
جىلداعى ءداستۇر بويىنشا جارىسقا قاتىسۋشىلار ەكى توپقا ءبولىنىپ وينادى. الپىس جاستان اسقان قالامگەرلەر جانە الپىس جاسقا دەيىنگىلەر ءوزارا سايىسقا ءتۇستى. ءسويتىپ, ەكى توپتىق باسەكەدەن سۋىرىلىپ شىققان تاستاياق شەبەرلەرى جۇلدەلى ورىنداردى ساراپقا سالدى. جارىس قورىتىندىسىندا الپىس جاستان اسقاندار اراسىنان ەۇۋ پروفەسسورى, زاڭ عىلىمدارىنىڭ دوكتورى جۇمابەك بۇسىرمانوۆ جەڭىمپاز اتانسا, ەكىنشى ورىندى «قازاق راديوسىنىڭ» ارداگەر ءجۋرناليسى عالىم ەسەنساريەۆ يەلەندى. ال ءۇشىنشى ورىن بەلگىلى تەلەجۋرناليست نۇرتىلەۋ يمانعاليۇلىنا بۇيىردى.
الپىس جاسقا دەيىنگىلەر اراسىنداعى ەكىنشى توپتان ءبىرىنشى ورىندى تاعى دا كورنەكتى فوتوگراف شۇكىر شاحاي جەڭىپ السا, ەكىنشى ورىندى تانىمال جۋرناليست سەرىك جانبولات, ءۇشىنشى ورىندى ءنۇردىلدا وراز يەلەندى. سونداي-اق, ەرەكشە ويىندارىمەن كوزگە تۇسكەن نەسىپ ءجۇنىسباي, ۇلىقبەك ەسداۋلەت, عالىم ومارحان جەڭىسكە دەگەن ۇمتىلىستارى ءۇشىن ماراپاتتالدى.
جەڭىمپازداردى ماراپاتتاۋ راسىمىندە ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ اقسەلەۋ سەيدىمبەكتىڭ ەشكىمگە ۇقسامايتىن ەرەكشە ءبىتىم-بولمىسى مەن ادامگەرشىلىك تۇلعاسى تۋرالى ايتا كەلىپ, دارا بولمىس يەسىنىڭ ەسىمىن ۇرپاق جادىندا جاڭعىرتىپ وتىرۋ ماقساتىنداعى شارانىڭ ءمان-ماڭىزىنا توقتالدى. اقسەلەۋ سەيدىمبەك اتىنداعى تاعىلىمدى ءارى تارتىستى ءتۋرنيردى جەتى جىل بويى ۇيىمداستىرىپ كەلگەن پروفەسسور نامازالى وماشەۆقا العىس جاريالادى.
احاڭنىڭ الدىن كورگەن ءىزباسارلارىنىڭ ءبىرى ۇلىقبەك ەسداۋلەت تەكتى تۇلعانىڭ جۇرت بىلە بەرمەيتىن ەرەكشەلىگىنىڭ ءبىرى – مەرگەندىگىنە توقتالىپ, تاستاياقتىڭ عاجايىپ شەبەرى بولعانىن ەسكە الدى. ال ءىنىسى اسىلحان سەيدىمبەك ءوز سوزىندە اعاسىنىڭ قانداي كۇردەلى كەزەڭدەردە دە ۇلتىنىڭ ءسوزىن سويلەگەنىن, ۇلت مۇددەسىنە قىزمەت ەتكەن ارداقتى ازامات بولعانىن ايتا كەلىپ, ونىڭ ەل رۋحانياتىن دامىتۋعا قوسقان ەڭبەگىن, ارتىنا قالدىرعان ولشەۋسىز مۇرالارىن دارىپتەپ كەلە جاتقان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە العىس سەزىمىن جەتكىزدى.
تۋرنير سوڭىندا ۇيىمداستىرۋ القاسى بارلىق قاتىسۋشىلارعا العىس ءبىلدىردى.
ورىنبەك وتەمۇرات
