رەسەي قۇراماسى
رەسەيلىك فۋتبولشىلار چەمپيوناتتى وتكىزۋشى ەل ەسەبىندە بۇل جولى ىرىكتەۋ تۋرنيرىنە قاتىسقان جوق. مۇنىڭ ەسەسىنە, ەكى جىلدىڭ ىشىندە الەمنىڭ ارگەنتينا, برازيليا, فرانتسيا, يسپانيا جانە بەلگيا سىندى ەڭ الدىڭعى قاتارداعى قۇرامالارىمەن كۇش سىناسىپ كوردى. بۇل رەسەي قۇراماسى ءۇشىن ءتورتىنشى مۋنديال بولعالى تۇر. ول بۇعان دەيىن ءبىر رەت تە توپتان شىعىپ كورگەن جوق.
كوماندانى ستانيسلاۆ چەرچەسوۆ باسقارادى.
ۋرۋگۆاي قۇراماسى
بار-جوعى 3,5 ملن حالقى بار شاعىن ەلدىڭ قۇراماسى وڭتۇستىك امەريكا قۇرلىعىنداعى باستى فۋتبول دەرجاۆالارىنىڭ بىرىنەن سانالىپ كەلەدى. ول 2018 جىلعى الەم چەمپيوناتىنىڭ ەلەكتىك جارىسىندا ءوز توبىندا ەكىنشى ورىن الدى. تۋرنيردە ەدينسون كاۆاني – 10, لۋيس سۋارەس 5 گول سوقتى. ال الداعى بايراقتى باسەكە ۋرۋگۆايلىقتارعا التىن ءتاجدى جەڭىپ الۋ ءۇشىن جاسالعان 13-ءشى جورىق بولعالى تۇر.
ۋرۋگۆاي قۇراماسى بۇعان دەيىن ەكى دۇركىن الەم چەمپيونى بولىپ ۇلگەردى. ول الدىمەن 1930 جىلى ءوز ەلىندە وتكەن ءبىرىنشى جاھاندىق جارىستا توپ جارسا, ەكىنشى رەت 1950 جىلى ريو-دە-جانەيرودا الاڭ يەلەرى – برازيليالىقتاردى 2:1 ەتىپ ۇتىپ, ايدى اسپاننان ءبىر-اق شىعارعان. ال جاڭا عاسىرداعى بيىك تابىسى 2010 جىلى وڭتۇستىك افريكادا وتكەن مۋنديالدا 4-ورىن الۋى بولدى.
ۋرۋگۆاي بۇدان بولەك, ەكى رەت (1924, 1928) وليمپيالىق ويىندار چەمپيونى اتانعان بولسا, امەريكا كۋبوگىن 15 رەت ۇتقان ەدى.
كوماندانى وسكار تابارەس جاتتىقتىرادى.
ەگيپەت قۇراماسى
مىسىرلىقتار سوڭعى 28 جىلدان كەيىن الەم چەمپيوناتىنا قايتادان جولداما الىپ وتىر. ول بۇعان شەشۋشى ماتچتا موحاممەد سالاحتىڭ دۋبلىمەن كونگونى 2:1 ەتىپ ۇتۋ ارقىلى قول جەتكىزدى. بۇكىل ەگيپەت بۇل جەڭىستى قۋانا تويلادى. ال پرەزيدەنت ابدەل فاتتاح اس-سيسي ءاربىر فۋتبولشىعا 83 مىڭ دوللاردان سىيلىق بەرۋگە وكىم شىعاردى.
ەگيپەتتىكتەر وسىمەن 3-ءشى رەت الەم چەمپيوناتىنا قاتىسادى. ولار افريكا ۇلتتار كۋبوگىن جەتى رەت (1957, 1959, 1986, 1998, 2006, 2008, 2010) جەڭىپ العان.
كوماندانى ارگەنتينالىق مامان ەكتور كۋپەر دايىندادى.
ساۋد ارابياسى
توپتاعى ەكىنشى اراب مەملەكەتىنىڭ فۋتبولشىلارى سوڭعى ەكى چەمپيوناتتى وتكىزىپ بارىپ, جاھاندىق جارىسقا قايتا ورالدى. ول شەشۋشى توپتىق تۋرنيردە اۆستراليا جانە ءباا كوماندالارىن ارتتا قالدىردى. وسىدان كەيىن بىردەن جانجال شىقتى دا, قۇراما باس جاتتىقتىرۋشىسى, نيدەرلاندتىق بەرت ۆان مارۆەيك قىزمەتىنەن كەتتى. كەيىن ونىڭ ورنىن ارگەنتينالىق حۋان انتونيو باستى.
ساۋدتاردىڭ جۇلدىزى ەسەبىندە فورۆارد موحامماد ءال-ءساحلاۆيدىڭ اتى اتالادى.
قۇراما الەم چەمپيوناتىنىڭ فينالىنا شىققاننان كەيىن ونىڭ ءاربىر ويىنشىسىنا 1,1 ملن ەۋرو كولەمىندە سىيلىق بەرىلدى.
كوماندا ءۇش رەت (1984, 1988, 1996) ازيا كۋبوگىن ۇتتى.
فۋتبولدان الەم چەمپيوناتىنىڭ باستالۋىنا 16 كۇن قالدى
وتكەن جىلدىڭ 4 جەلتوقسانى كۇنى ماسكەۋدە جەرەبە تارتىلىپ, الەم چەمپيوناتىنىڭ فينالدىق سايىسىنا قاتىساتىن كوماندالار توپتارى بەلگىلەنگەندە, ا توبىنا «ومىرگە قۇشتارلار قۇشاعى» دەگەن انىقتاما بەرىلدى. ماماندار مۇنى شوعىرداعى قۇرامالاردىڭ جالپى دەڭگەيى ءبىر-بىرىمەن شامالاس ءارى باسقا لەكتەرگە قاراعاندا, تومەندەۋ ەكەنىنە قاراي ايتقان-تىن.
شىنىندا دا سولاي. ەگەر ناقتى تسيفرلارعا سۇيەنسەك, بۇل كوماندالار فيفا رەيتينگىسىندە ورتاشا 45-ءشى ورىندا تۇرعان بولىپ شىقتى. توپتىڭ «باستى» كومانداسى بولىپ بەلگىلەنگەن رەسەيدىڭ ءوزى 65-ءشى ساتىدا. بىراق ودان ۋرۋگۆاي مەن ساۋد ارابياسى جاساقتارى جوعارى تۇر. ساراپشىلار سۋارەس – كاۆاني سەكىلدى الەمدەگى ەڭ مىقتى فورۆاردتار دۋەتى بار ۋرۋگۆايلىقتار ساۋدتاردى ەمىن-ەركىن ۇتادى دەپ ەسەپتەيدى. بۇلاردىڭ سوڭعىلارى توپتا دا ارتقى ورىندا قالاتىن شىعار. ال ەكىنشى ورىن ءۇشىن تالاس ەگيپەت پەن الاڭ يەلەرى اراسىندا وتۋگە ءتيىس. ەگەر مىسىرلىقتار ساپىندا «ليۆەرپۋلدىڭ» ليدەرى موحاممەد سالاح پەن بىرقاتار پرەمەر-ليگادا ونەر كورسەتەتىن ساڭلاقتار وينايتىنىن ەسكە الساق, رەسەيلىكتەردىڭ پوزيتسياسى سونشالىقتى بەرىك بولىپ كورىنە قويمايدى.
