www.deposit-kdif.kz دەپوزيتتىك پورتالى كوممەرتسيالىق ماقساتتى كوزدەمەيدى, قور قىزمەتكەرلەرى مۇنىڭ سالىمشىلارعا كوممەرتسيالىق بانكتەر ۇسىنىستارىنا قاتىستى دۇرىس تاڭداۋ جاساۋىنا كومەكتەسەدى دەپ ەسەپتەيدى.
وتكەن اپتادا الماتىدا «قازاقستاننىڭ دەپوزيتتەرگە كەپىلدىك بەرۋ قورى» اق (قدكبق) ءوزىنىڭ جاڭا جوباسى, ياعني جەكە تۇلعالاردىڭ دەپوزيتتەرى بويىنشا بىرىڭعاي شوعىرلاندىرىلعان مالىمەتتەر بازاسىنىڭ تۇساۋىن كەستى. بۇل قولدانۋشىلارعا بانكتىك قىزمەت كورسەتۋ نارىعىنداعى ۇسىنىستار ىشىنەن وزىنە ىڭعايلى دەپوزيت تاڭداۋىنا مۇمكىندىك بەرەدى. قىزمەت كورسەتۋ «دەپوزيتتىك پورتال» دەپ اتالادى, وعان دەپوزيتتەرگە كەپىلدىك بەرۋ جۇيەسىنىڭ قاتىسۋشىلارى – 30 بانكتىڭ قدكبق-نا ەسەپ بەرۋ نەگىزىندە قالىپتاسقان مالىمەتتەرى ەنگىزىلدى.
قدكبق پورتالدىڭ تەك قانا اقپاراتتىق ماقساتتا اشىلعانىن اتاپ وتەدى: قدكبق ۇلتتىق بانكتىڭ قارجىلىق ساۋاتتىلىقتى جەتىلدىرۋ جانە سانالى تۇردە قارجىلىق شەشىم قابىلداۋ بويىنشا باعىتىن قولدايدى. «قازىرگى تاڭدا قازاقستاندا دەپوزيتتەر بويىنشا اقپاراتتاردىڭ باسىن بىرىكتىرۋگە ارەكەت ەتىپ جاتقان رەسۋرستار بار, بىراق ولار, نەگىزىنەن, كوممەرتسيالىق ماقساتتى ۇستانادى. ال ءبىز سالىمشىلارعا بارلىق بانكتەردىڭ ونىمدەرىن ءبىر رەسۋرستان كورىپ, سالىستىرۋعا مۇمكىندىك بەرەتىن تولىق ءارى سەنىمدى مالىمەتتەرى بار پورتال اشتىق», – دەيدى باقىت قوعىلوۆ.
قدكبق توراعاسى باقىت قوعىلوۆتىڭ ايتۋىنشا, جاڭا ينتەرنەت-پورتالدا قازىرگى بارلىق دەپوزيتتىك ونىمدەر تۋرالى مالىمەتتەر بار. ءاربىر سالىمشى بەلگىلى ءبىر پارامەتردى تاڭداي وتىرىپ, ءوزى قىزىعۋشىلىق تانىتاتىن دەپوزيتتى تاڭداي الادى. بانك, دەپوزيت ءتۇرى, دەپوزيت مەرزىمى, سىياقى مولشەرلەمەسى, سىياقى تولەمىنىڭ كەزەڭى, باستاپقى سالىم جارناسى سياقتى, سونداي-اق ءاربىر بانك ۇسىناتىن شارتتىڭ مەرزىمىن اۆتوماتتى ۇزارتۋ, ارا-قاشىقتىقتان قىزمەت كورسەتۋ, ۆاليۋتا ايىرباستاۋ مۇمكىندىگى سياقتى قوسىمشا ولشەمدەردى تاڭداساڭىز, ارنايى سۇزگىش ءتيىستى دەپوزيتتى تاڭداۋعا كومەكتەسەدى. بۇدان باسقا, دەپوزيتتىك پورتالدان ەسەپتەلگەن بونۋستاردى كورۋگە, سونداي-اق ەرىكتى ساقتاندىرۋ, cashback-ءتىڭ بولۋى, سىيلىققا تولەم كارتالارىن الۋ سياقتى دەپوزيتتىك ونىمدەر بويىنشا بانكتىڭ اكتسيالارىمەن تانىسۋعا بولادى. سونىمەن قاتار, دەپوزيتتىك پورتال ولاردىڭ نەگىزگى قارجىلىق كورسەتكىشتەرىن زەرتتەۋگە مۇمكىندىك بەرەدى. وسىنىڭ بارلىعى ۇيدەن شىقپاي-اق دەپوزيتتى مۇقيات تاڭداۋعا كومەكتەسەدى.
قدكبق باسشىسىنىڭ ايتۋىنشا, سىياقى مولشەرلەمەسىنىڭ جوعارى بولۋى دەپوزيتتىك ءونىم ساپاسىن باعالاۋدا ءاردايىم باستى ولشەم بولا المايدى. بۇل, كوپ جاعدايدا, كەرىسىنشە, سالىمشى ءۇشىن تاۋەكەل بولۋىن بايقاتۋى مۇمكىن.
«ادامدار كوپ جاعدايدا ءبىر جىلعا جاقسى ءونىم بولىپ تابىلاتىن بارىنشا جوعارى سىياقى مولشەرلەمەسى, كۇندەلىكتى كاپيتالداندىرۋ, اكتسيالار, سىيلىقتار, بونۋستار سياقتى مالىمەتتەردى ءبىر جاقتى عانا قارايدى. ال ەگەر مۇنىڭ قانداي بانك ەكەنىن كورىپ, ونىڭ قارجىلىق جاعدايىنا نازار سالساڭىز, بۇل تاڭداۋدان باس تارتقان بولار ەدىڭىز» دەيدى ب. قوعىلوۆ.
قازىرگى تاڭدا قدكبق ۇسىنعان تەڭگە دەپوزيتى بويىنشا سىياقى مولشەرلەمەسى 14%-دى قۇرايدى – بۇل جىلدىق ءتيىمدى سىياقى مولشەرلەمەسى جانە نارىقتا مۇنداي دەپوزيتتىك ونىمدەر بار. ب.قوعىلوۆتىڭ ايتۋىنشا, جوعارى سىياقى مولشەرلەمەسىن ۇسىناتىن بانكتەردى تاڭداۋ بارىسىندا ولاردىڭ قارجىلىق جاعدايىن سالىستىرعان ءجون. «14%-دى جاقسى بانك تە, ناشار بانك تە ۇسىنۋى مۇمكىن. ال ءبىز جاقسى بانكتە جوعارى سىياقى مولشەرلەمەسى بار جاقسى ءونىم تاڭداۋ قاجەتتىلىگىنە وي سالامىز» دەيدى ول.
جيناق اقشالاردى ساقتاۋ بويىنشا قارجى قۇرالى رەتىندەگى بانكتىك دەپوزيتتەرگە دەگەن قىزىعۋشىلىقتاردىڭ ارتقانىن ەسكەرسەك, جاڭا پورتال اسا قاجەت بولۋى مۇمكىن. قدكبق ۇسىنعان مالىمەتتەر بويىنشا, 2016 جىلدىڭ 1 قاراشاسى مەن 2017 جىلدىڭ 1 قاراشاسى ارالىعىندا جەكە تۇلعالاردىڭ دەپوزيتتىك بازاسى 10%-عا وسكەن. بۇگىندە جەكە تۇلعالاردىڭ بانكتەرگە سالعان جالپى دەپوزيتتەرىنىڭ سوماسى 8,1 ترلن. تەڭگەنى قۇرايدى. كورسەتىلگەن مەرزىمدەگى جەكە تۇلعالالاردىڭ بانكتىك شوتىنىڭ ەسەبى 6,5%-عا ۇلعايعان جانە 2017 جىلدىڭ 1 قاراشاسىندا 45,5 ملن. سومانى قۇرادى.
اتاپ وتەتىن جاعداي, ۆاليۋتاداعى دەپوزيتتەر مولشەرى ازايىپ, تەڭگە سالىمدارى كوبەيۋدە. ماسەلەن, 2017 جىلدىڭ 1 قاراشاسىندا تەڭگەمەن سالىنعان دەپوزيتتەر سوماسى 43%-دى قۇراسا, وتكەن جىلى وسى ۋاقىتتاعى كورسەتكىش 35% بولاتىن. شەتەل ۆاليۋتاسىنداعى دەپوزيتتەر ازايۋدا: قازاقستاندىقتاردىڭ شەتەل ۆاليۋتاسىنداعى قاراجات جيناقتارى بيىل 57%-دى قۇراسا, بىلتىر قاراشادا 65% بولعان ەدى.
قدكبق مالىمەتتەرىنە قاراساق, بانكتەردەگى جەكە تۇلعالار جيناقتارىنىڭ قۇرىلىمىندا (اقشاعا شاققاندا) مەرزىمدى سالىمدار اسا كوپ (87,6%) ەكەن, تالاپ ەتىلگەنگە دەيىنگى جانە شارتتى سالىمدار ۇلەسى – 0,3% جانە 3,1%, وسىعان ساكەس, اعىمداعى شوتتار مەن كارتاداعى اقشا – 9%. جەكە تۇلعالاردىڭ تەڭگەمەن اشقان شوتتارىنىڭ ۇلەسى ايتارلىقتاي جوعارى دەڭگەيدە: 2017 جىلدىڭ 1 قاراشاسىنداعى جاعداي بويىنشا تەڭگەمەن اشىلعان شوتتار سانى 95%-دى قۇراسا, شەتەل ۆاليۋتاسىنداعى شوتتار سانى – بار بولعانى 5%.
نارىقتاعى جاعداي وزگەرۋى مۇمكىن بولعاندىقتان, دەپوزيتتىك پورتالداعى مالىمەتتەر ۇدايى وزگەرىپ وتىراتىن بولادى. دەپوزيتتەرگە كەپىلدىك بەرۋ جۇيەسىنىڭ قاتىسۋشىلارى – بارلىق بانكتەر قدكبق-نا دەپوزيتتىك سىزعىشتاعى بارلىق وزگەرىستەر مەن جاڭا ونىمدەردىڭ پايدا بولعانى تۋرالى مالىمەتتەر بەرىپ وتىرۋعا مىندەتتى.
زاڭناماعا سايكەس, سوت شەشىمىمەن بانك قىزمەتىن ماجبۇرلەپ توقتاتقان جاعدايدا, قازاقستاننىڭ دەپوزيتتەرگە كەپىلىك بەرۋ قورى جەكە تۇلعالار مەن جەكە كاسىپكەرلەردىڭ دەپوزيتتەرىن قايتارىپ بەرۋگە كەپىلدىك بەرەدى. دەپوزيتتەر بويىنشا كەپىلدىك بەرىلگەن ەڭ جوعارى سوما ۇلتتىق ۆاليۋتادا 10 ملن. تەڭگەنى قۇراسا, ال شەتەل ۆاليۋتاسىنداعى دەپوزيتتەر بويىنشا 5 ملن. تەڭگە بالامادا بولادى.
