باس قالادا «MEGA Silk Way» ساۋدا, ويىن-ساۋىق ورتالىعىندا «Elbasy jáne Elorda» اتتى فوتوكورمە اشىلدى. اتالعان شاراعا نۇر-سۇلتان قالاسى اكىمىنىڭ ورىنباسارى ەرلان كاناليموۆ قاتىستى.
بۇل مادەني شارا قر تۇڭعىش پرەزيدەنتى نۇرسۇلتان نازارباەۆتىڭ ەڭ جوعارى لاۋازىمدى قىزمەتىنە 30 جىل تولۋىنا وراي ۇيىمداستىرىلدى. كورمەگە ەلباسىنىڭ ازاتتىق العان جىلدان باستاپ, ەگەمەن ەلدىڭ قالىپتاسۋى, نىعايۋى جانە دامۋى جولىنداعى ىرگەلى ىستەر مەن ءرولىن كورسەتەتىن 80-نەن اسا فوتوسۋرەت قويىلعان. بۇل سۋرەتتەردەن وتكەن جىلدارداعى تاريحتىڭ ايقىن ءىزىن كورەسىز.
تاعىلىمدىق ءمانى بار شارانىڭ اشىلۋىندا قالا اكىمىنىڭ ورىنباسارى ەرلان كاناليموۆ كورمەنىڭ ماقساتى ەلوردانىڭ جارقىن جەتىستىكتەرىن كورسەتۋ ەكەندىگىن ايتتى.
«ساۋلەتى مەن داۋلەتى كەلىسكەن ەلوردانى كوشىرۋ ەلباسىنىڭ تىكەلەي يدەياسىمەن جۇزەگە استى. قازىر ەركە ەسىلدىڭ جاعاسىنداعى اسەم شاھار – قازاقستاننىڭ جاڭا بەينەسىنە اينالدى» دەدى ول.
كەلۋشىلەردىڭ قىزىعۋشىلىعىن وياتقان فوتوسۋرەتتەر ەلباسىنىڭ جەكە مۇراعاتى مەن قالالىق مەملەكەتتىك ارحيۆىنەن الىنعان.
كورمە 10 شىلدەگە دەيىن جالعاسادى.
ايجان قامباتىروۆا,
ل. گۋميلەۆ اتىنداعى
ەۋرازيا ۇلتتىق
ۋنيۆەرسيتەتىنىڭ ستۋدەنتى
