بيىل ەلوردا كۇنىن مەرەكەلەۋ اياسىندا 108 شارا وتكىزىلەدى, سونىڭ ىشىندە 73 شاراعا قاتىسۋ تەگىن.
ەڭ ماڭىزدى وقيعالار – ەلوردا كۇنىنە ارنالعان مەرەكەلىك شارالارعا باستاۋ بەرەتىن مەملەكەتتىك تۋ كوتەرۋ سالتاناتى, ديماش قۇدايبەرگەننىڭ «ارناۋ» كونتسەرتى, «ازيا جاڭعىرىعى» تسيرك ونەرىنىڭ فەستيۆالى, الەم سۋرەتشىلەرىنىڭ «Astana Art Show» كورمەسى, ماسكەۋلىك «سوۆرەمەننيك» تەاترىنىڭ گاسترولى جانە شىلدەنىڭ 5-ءى مەن 6-سى كۇندەرى «بايتەرەك» مونۋمەنتىنىڭ الدىنداعى اشىق الاڭدا وتەتىن «The Spirit of Eurasia» حالىقارالىق فەستيۆالى. رەسەيدىڭ ەڭ تانىمال تەاترى – «سوۆرەمەننيك» ۇجىمى بەيبىتشىلىك جانە كەلىسىم سارايىندا ەكى سپەكتاكل قويادى: 3-4 شىلدەدە ساعات 19:00-دە – «گورە وت ۋما», 6-7 شىلدەدە 17:00-دە – «ۆيشنەۆىي ساد». مەرەيتويلىق «استانا سامالى» ح حالىقارالىق ۇرمەلى اسپاپتار فەستيۆالى نۇر-سۇلتان قالاسىندا 4-6 شىلدە ارالىعىندا ءوتىپ, قازاقستان مەن شەت مەملەكەتتەردىڭ ۇزدىك ۇرمەلى وركەسترلەرىنىڭ باسىن قوسادى. بيىلعى قاتىسۋشىلار قاتارىندا نيجني تاگيلدىڭ ۇرمەلى وركەسترى, الماتى شەكارا اسكەرلەرىنىڭ ۇرمەلى وركەسترى, قوستاناي قالاسىنىڭ ۇرمەلى وركەسترى, قر ءىىم ۇلتتىق ۇلانىنىڭ ۇرمەلى وركەسترى, قر پرەزيدەنتتىك گۆاردياسىنىڭ ۇرمەلى وركەسترى بار.
مەرەكەلىك شارالاردى ۇلتتىق دومبىرا كۇنىنە ارنالعان ۇلكەن كونتسەرت قورىتىندىلايدى. بيىل ول 7 شىلدە كۇنى «قازاق ەلى» مونۋمەنتىنىڭ الدىنداعى الاڭدا ۇيىمداستىرىلادى. شاراعا نيەت بىلدىرگەن ءار ادام قاتىسا الادى, ول ءۇشىن دومبىرامەن «سارىارقا», «اداي», «القيسسا», «كوڭىل تولقىنى», «بالبىراۋىن» جانە «كوروعلى» كۇيلەرىن ورىنداي ءبىلۋ شارت. مەرەكەگە وراي تۇرعىنداردى سالاۋاتتى ءومىر سالتىنا تارتۋعا جانە بۇقارالىق سپورتتى دامىتۋعا باعىتتالعان 25 سپورتتىق شارا جوسپارلانعان. سونىڭ ىشىندە ەلوردا كۇنىن مەرەكەلەۋگە ارنالعان شارالار تۋرالى تولىق اقپارات www.astanaday.kz سايتىندا جاريالانادى.
