ۇكىمەت باسشىسى ولجاس بەكتەنوۆ سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زارداپتارىن جويۋ جونىندەگى رەسپۋبليكالىق شتابتىڭ وتىرىسىن وتكىزدى. شتابتىڭ نەگىزگى مىندەتى – سۋ تاسقىنىنا قارسى ءىس-شارالاردى جۇرگىزۋ جانە ازاماتتاردىڭ قاۋىپسىزدىگىن قامتاماسىز ەتۋ جونىندەگى قىزمەتتى ۇيلەستىرۋ. شتاب باسشىسى – پرەمەر-مينيستر ولجاس بەكتەنوۆ, پرەمەر-ءمينيستردىڭ ورىنباسارى قانات بوزىمباەۆ شتاب باسشىسىنىڭ ورىنباسارى بولىپ تاعايىندالدى. شتاب قۇرامىنا پرەزيدەنت اكىمشىلىگىنىڭ باسشىلىعى, ورتالىق جانە جەرگىلىكتى اتقارۋشى ورگانداردىڭ باسشىلارى كىردى.
وتىرىستا مەملەكەت باسشىسىنىڭ تاپسىرمالارىنىڭ ورىندالۋ بارىسى جانە سۋ تاسقىنىنا قارسى ءىس-شارالاردى كۇشەيتۋ شارالارى تۋرالى مينيسترلەر مەن وڭىرلەردىڭ اكىمدەرى تىڭدالدى.
توتەنشە جاعداي ايماقتارىنان بارلىعى 11306 ادام ەۆاكۋاتسيالاندى. ۋاقىتشا ورنالاستىرۋ بەكەتتەرىندە 5456 ادام بار. سۋ شايىپ كەتكەن 40 اۆتوجولدى, كوپىردى جانە 39 جول توسەمىن قالپىنا كەلتىرۋ جۇمىستارى باقىلاۋعا الىندى. كولىك قاتىناسى توقتاپ قالعان ەلدى مەكەندەرمەن بايلانىس ورناتىلىپ, اكىمدىكتەر ازىق-تۇلىك پەن ءدارى-دارمەكتىڭ قاجەتتى قورلارىن دايىندادى. تج ايماقتارىنداعى حالىققا كومەك كورسەتۋ تاۋلىك بويى, ونىڭ ىشىندە اۋە كەمەلەرىنىڭ كومەگىمەن جۇزەگە اسىرىلۋدا. جۇمىسقا 7 مىڭنان استام ادام, 2 مىڭنان استام تەحنيكا, ونىڭ ىشىندە سۋ ايداۋ قۇرالدارى, ءجۇزۋ جانە اۋە كەمەلەرى تارتىلدى.
سۋ قويمالارى مەن وزەندەردەگى جاعدايعا مونيتورينگ جۇرگىزىلۋدە. قازىرگى ۋاقىتتا اقتوبە, سازدى, اششىسۋ, جارتاس سۋ قويمالارى ترانزيتتىك رەجيمدە جۇمىس ىستەپ تۇر, بەلسەندى تۇردە سۋ جىبەرۋ جۇزەگە اسىرىلۋدا. قارعالى سۋ قويماسى جيناقتاۋ رەجيمىندە. اكىمدىكتەر سۋ تاسقىنىنىڭ قاۋپى جوعارى وڭىرلەردە الدىن الۋ شارالارىن جۇرگىزىپ جاتىر. قاجەت بولعان جاعدايدا, قوسىمشا كۇشتەر مەن قۇرالدار جىبەرىلەدى.
توتەنشە جاعداي سالدارىنان قيراعان ۇيلەردى قالپىنا كەلتىرۋ جۇمىستارى مەن سالۋعا قر ۇكىمەتى مەن جەرگىلىكتى اتقارۋشى ورگانداردىڭ رەزەرۆتەرىنەن قاراجات بولىنەدى. ءۇيى اپاتتى دەپ تانىلعان زارداپ شەككەن ازاماتتاردىڭ ءتىزىمىن جەرگىلىكتى اكىمدىكتەر جاسايدى.
«مەملەكەت باسشىسى سۋ تاسقىنىنا قارسى ءىس-شارالاردى قاناعاتتانارلىقسىز دەپ سىنعا الدى. قازىردەن باستاپ اپاتتان كەلتىرىلگەن زالالدىڭ كولەمىن باعالاۋدى باستاپ, زارداپ شەككەن ادامدارعا دەرەۋ ماتەريالدىق كومەك كورسەتۋگە كىرىسۋ كەرەك. سونداي-اق بولاشاقتا مۇنداي اۋقىمدى سۋ تاسقىنىنىڭ الدىن الۋ ءۇشىن كەشەندى شارالار ازىرلەۋ قاجەت. ءار وڭىردە ناقتى ءىس-قيمىل جوسپارى بولۋعا ءتيىس» دەپ اتاپ ءوتتى شتاب توراعاسى ولجاس بەكتەنوۆ.
حالىققا قاجەتتى كومەك كورسەتىلەدى
سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زارداپتارىن جويۋ جونىندەگى رەسپۋبليكالىق شتاب اپاتتان زارداپ شەككەن وڭىرلەردەگى حالىققا مەديتسينالىق كومەك كورسەتۋ ماسەلەسىن ەرەكشە باقىلاۋدا ۇستايدى.
مەديتسينالىق ۇيىمدار كۇشەيتىلگەن رەجيمدە جۇمىس ىستەۋدە, دارىگەرلەر مەن جەدەل مەديتسينالىق جاردەم بريگادالارى قوسىمشا تارتىلۋدا. بارلىق ەۆاكۋاتسيالانعانداردى دارىگەرلەر قاراپ-تەكسەرۋدە, ولاردىڭ جاعدايى تۇراقتى, قانداي دا ءبىر جاراقات الۋ تۋرالى شاعىم تۇسكەن جوق. جۇكتى ايەلدەر مەن بالالاردىڭ جاعدايىنا باقىلاۋ جۇرگىزىلۋدە. بوسانۋ ۋاقىتى تاياعان ايەلدەر اۋداندىق جانە وبلىستىق ورتالىقتارعا كوشىرىلدى. دەنساۋلىق ساقتاۋ مينيسترلىگىندە جاعدايدىڭ كۇندەلىكتى مونيتورينگى جۇرگىزىلۋدە. سۋ تاسقىنىنان زارداپ شەككەن وڭىرلەردىڭ تۇرعىندارى ءۇشىن مەديتسينالىق جانە پسيحولوگيالىق كومەكتىڭ قوسىمشا بريگادالارىن اشۋ ءۇشىن قىزمەتتەردىڭ دايىندىعى قامتاماسىز ەتىلدى.
حالىقتى ۋاقىتشا جيناۋ پۋنكتتەرىندە تاۋلىك بويى مەديتسينالىق پوستتاردىڭ جۇمىسى قامتاماسىز ەتىلدى, دارىلىك زاتتار مەن مەديتسينالىق بۇيىمداردىڭ قاجەتتى قورلارى دايىندالدى. بارلىق وڭىردە سانيتاريالىق-ەپيدەميولوگيالىق احۋالدى باقىلاۋ جانە مونيتورينگ كۇشەيتىلدى.
سونىمەن قاتار جەرگىلىكتى جەرلەردە دەنساۋلىق ساقتاۋ ماسەلەلەرى بويىنشا بايلانىس ورتالىقتارىنىڭ جۇمىسى بىرىڭعاي الگوريتممەن تاۋلىك بويى جۇمىس ىستەۋ رەجيمىنە اۋىستىرىلدى.
شىعىندى وتەۋ تەتىكتەرى تالقىلاندى
ۇكىمەتتە سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زارداپتارىن جويۋ جونىندەگى رەسپۋبليكالىق شتابتىڭ وتىرىسى ءوتتى. وندا سۋ تاسقىنىنان زارداپ شەككەندەرگە كەلتىرىلگەن شىعىندى وتەۋ تەتىكتەرى مەن قارجىلاندىرۋ كوزدەرى تالقىلاندى.
شتاب جۇمىسى اياسىندا پرەمەر-مينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ تابيعي سيپاتتاعى توتەنشە جاعدايلاردان زارداپ شەككەندەرگە كەلتىرىلگەن زياندى وتەۋگە قاراجات جەرگىلىكتى اتقارۋشى ورگاندار رەزەرۆىندە كوزدەلگەنىن باياندادى. زالالدىڭ الدىن الا مولشەرىن جەرگىلىكتى اتقارۋشى ورگان, ونەركاسىپ جانە قۇرىلىس, سونداي-اق توتەنشە جاعدايلار مينيسترلىكتەرى ايقىندايدى. قوسىمشا قاجەتتىلىك تۋىنداعان جاعدايدا, قارجىلاندىرۋ ۇكىمەتتىڭ رەزەرۆىنەن قاراستىرىلادى. ءىس-ارەكەت الگوريتمى:
1) ماتەريالدىق زارداپ شەككەندەر تج تۋىنداعان كۇننەن باستاپ كۇنتىزبەلىك 30 كۇن ىشىندە جەرگىلىكتى اتقارۋشى ورگانعا ماتەريالدىق زالالدى وتەۋ تۋرالى ءوتىنىش بەرەدى.
2) جەرگىلىكتى اتقارۋشى ورگان ءوتىنىش تىركەلگەن كۇننەن باستاپ 10 جۇمىس كۇنى ىشىندە كەلتىرىلگەن زالالدىڭ مولشەرىن باعالاۋدى ۇيىمداستىرادى. تۇرعىن ءۇيى قاۋىپتى دەپ تانىلعان زارداپ شەككەن ازاماتتاردىڭ ءتىزىمىن جەرگىلىكتى اكىمدىكتەر قالىپتاستىرادى.
ساباق ونلاين فورماتقا كوشىرىلەدى
سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ زارداپتارىن جويۋ جونىندەگى رەسپۋبليكالىق شتاب جۇمىسىنىڭ اياسىندا 88 ءبىلىم بەرۋ ۇيىمى ءتورتىنشى توقساندى قاشىقتان وقۋ فورماتىندا باستايدى. بۇل تۋرالى قر وقۋ-اعارتۋ مينيسترلىگىنىڭ رەسمي وكىلى حابارلادى. قاشىقتان وقىتۋ سۋ تاسقىنى قاۋپى سەيىلمەگەن اۋماقتارداعى 56 مەكتەپتە, سونداي-اق ەۆاكۋاتسيالىق پۋنكتتەر رەتىندە ايقىندالعان 32 مەكتەپتە ۇيىمداستىرىلىپ وتىر.
«وسى دۇيسەنبىدەن باستاپ 3 ملن-نان استام قازاقستاندىق وقۋشى ءۇشىن 2023-2024 وقۋ جىلىنىڭ ءتورتىنشى توقسانى باستالادى. بۇل رەتتە سۋ تاسقىنى جاعدايى ساقتالعان وڭىرلەردەگى وقۋشىلار قاشىقتان وقۋعا كوشىرىلەدى. جەرگىلىكتى جەرلەردە وقۋ-اعارتۋ مينيسترلىگىنىڭ اۋماقتىق ءبىلىم بەرۋ سالاسىندا ساپانى قامتاماسىز ەتۋ دەپارتامەنتتەرى مەن وڭىرلىك ءبىلىم باسقارمالارى جۇمىس ىستەۋدە. ەۆاكۋاتسيالىق بەكەتتەردەگى بالالارعا قاجەتتى كومەك كورسەتۋ ءۇشىن پسيحولوگيالىق قىزمەتتەر ىسكە قوسىلدى. بالالار قاشىقتان وقۋ ءۇشىن قاجەتتى وقۋ قۇرالدارىمەن, كيىم-كەشەكپەن جانە تەحنيكالىق قۇرالدارمەن قامتاماسىز ەتىلدى. ەۆاكۋاتسيالانعان 1-4-سىنىپ وقۋشىلارىن تاماقتانۋمەن قامتۋ ماسەلەسى بويىنشا جۇمىستار جۇرگىزىلۋدە» دەپ اتاپ ءوتتى ۆەدومستۆونىڭ رەسمي وكىلى مەرەكە امانگەلدىقىزى.
وقۋ-تاربيە پروتسەسى مەملەكەتتىك جالپىعا بىردەي ءبىلىم بەرۋ ستاندارتتارىنا سايكەس ۇيىمداستىرىلادى. سونداي-اق تاۋەكەلدەردى ازايتۋ جانە توتەنشە جاعدايدا ءبىلىم بەرۋ پروتسەسىن جالعاستىرۋدى قامتاماسىز ەتۋ ءۇشىن اقتوبە وبلىسىنداعى كوللەدجدەر قاشىقتان وقىتۋ فورماتىنا اۋىستىرىلدى.
سۋ تاسقىنىنان زارداپ شەككەن وڭىرلەر تۇرعىندارى دەنساۋلىق ساقتاۋ باسقارمالارىنىڭ call-ورتالىقتارى بويىنشا كەلەسى نومىرلەرگە جۇگىنە الادى:
اقتوبە وبلىسى: +7 (7132) 41 02 13
قوستاناي وبلىسى: +7 (7142) 52 40 70
باتىس قازاقستان وبلىسى: +7 (7112) 24 00 06
قاراعاندى وبلىسى: +7 (7212) 95 55 59
اباي وبلىسى: +7 (7222) 56 64 50
ۇلىتاۋ وبلىسى: +7 (7102) 99 95 09
اقمولا وبلىسى (109)
