ەلىمىزدىڭ ەڭ قاستەرلى مەرەكەسى – تاۋەلسىزدىك كۇنىن ەلىمىز جىل سايىن زور قۇرمەتپەن, ايرىقشا تاعىلىممەن اتاپ وتەدى. مەرەكەنىڭ تاريحي ماڭىزى مەن سالماعى جونىندە ءاردايىم وقۋشىلارىما ايتىپ وتىرامىن.
تاۋەلسىزدىكتىڭ بىزگە بەرگەن ايتۋلى وقيعالاردىڭ بىرەگەيى – لاتىن ءالىپبيىنە قادام باسۋىمىز. مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى ەل مادەنيەتى مەن ادەبيەتىن, سالت-ءداستۇرى مەن ۇلتتىق رۋحانياتىن قايتا جاڭعىرتۋعا مول مۇمكىندىك بەرگەنى ءمالىم. ەلباسى ماقالاسىندا قازاق ءتىلىن بىرتىندەپ 2025 جىلعا دەيىن لاتىن گرافيكاسىنا كوشىرۋ قاجەتتىگىن قاداپ ايتتى. بۇل ماسەلە بۇرىن دا بىرنەشە رەت كوتەرىلگەنى ەسىمىزدە. ەندى وسى مىندەتتى جۇزەگە اسىرۋ مىقتاپ قولعا الىندى. ال مۇنى تاۋەلسىزدىگىمىزدىڭ ءبىر يگىلىگى رەتىندە قابىلدايمىز. ويتكەنى وتارشىل بيلىكتىڭ قۇزىرىندا جازىلعان تاريحىمىزعا كوز جۇگىرتسەك, قازاق ءالىپبيىنىڭ ءۇش مارتە وزگەرگەنىن بىلەمىز. ەگەمەندىك جىلدارىنداعى لاتىن گرافيكاسىنا ۇمتىلىسىمىز بەكەر ەمەس.
قازىرگى جاھاندانۋ زامانىندا ءبىزدىڭ باستى ماقساتىمىز – الەمنىڭ دامىعان ەلدەرىنىڭ قاتارىنان تابىلۋ. لاتىن ءالىپبيى ەلىمىزدىڭ ءبىلىم سالاسىن جان-جاقتى دامىتۋعا, سونىمەن قاتار تۇركى حالىقتارىنىڭ ءبىر-بىرىمەن مادەني جانە رۋحاني جاقىنداسۋىنا دا ىقپالىن تيگىزەرى انىق.
اقجىبەك نۇرلانوۆا,
№ 65 مەكتەپ- گيمنازيانىڭ
باستاۋىش سىنىپ مۇعالىمى
