كەشە استانادا «ەكسپو-2017» كورمەسى اياسىندا «ساحنادان سالەم!» V حالىقارالىق تەاتر فەستيۆالى شىمىلدىعىن ءتۇردى. بۇل جولى ساحنا ساڭلاعى, كسرو حالىق ءارتىسى, حالىق قاھارمانى ءا.مامبەتوۆتىڭ 85 جىلدىعىنا ارنالىپ وتىرعان تەاترلار مەرەكەسى 17 ماۋسىمعا دەيىن جالعاسادى.
فەستيۆالدىڭ العاشقى كۇنى قاتىسۋشىلار «جاستار» تەاترى رەپەرتۋارىنداعى ۋ.شەكسپيردىڭ «اساۋعا تۇساۋ» كومەدياسىن تاماشالادى. قويىلىمنىڭ قويۋشى رەجيسسەرى, اتالمىش تەاتردىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى – نۇرقانات جاقىپباي.
جالپى, بيىلعى فەستيۆالگە قازاقستان, رەسەي, وزبەكستان جانە ازەربايجان ەلدەرىن قوسا العاندا 10 تەاتر قاتىسادى. قازىلار القاسىنىڭ قۇرامىنا دراماتۋرگ, ونەرتانۋ كانديداتى ەركىن جۋاسبەك, تەاتر جانە كينو رەجيسسەرى, قازاقستاننىڭ حالىق ءارتىسى تالعات تەمەنوۆ, تەاترتانۋشى, ونەرتانۋ كانديداتى, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «تەاتر ونەرىنىڭ تاريحى جانە تەورياسى» كافەدراسىنىڭ مەڭگەرۋشىسى, قر ەڭبەك سىڭىرگەن قايراتكەرى ءسانيا قابديەۆا كىردى. سونداي-اق, تەاترتانۋشى, تەاتر سىنشىسى, يۋنەسكو جانىنداعى تەاتر سىنشىلارىنىڭ حالىقارالىق قاۋىمداستىعىنىڭ مۇشەسى نينا مازۋر (گەرمانيا), يليا مەملەكەتتىك ۋنيۆەرسيتەتى جانىنداعى قازىرگى زامانعى گرۋزين تەاترىن زەرتتەۋ ورتالىعىنىڭ ديرەكتورى, ونەرتانۋ دوكتورى لاشا چحارتيشۆيلي (گرۋزيا), ونەرتانۋ دوكتورى, پروفەسسور, مولدوۆا رەسپۋبليكاسىنىڭ ونەر شەبەرى, تەاتر سىنشىلارىنىڭ حالىقارالىق قاۋىمداستىعىنىڭ (يۋنەسكو) مۇشەسى اندجەلينا روشكا سىندى بەلگىلى سىنشىلار شاقىرىلدى.
بۇگىن فەستيۆال اياسىندا ازەربايجان مەملەكەتتىك جاس كورەرمەن تەاترىنىڭ (باكۋ) ارتىستەرى «سوعىس» دراماسىن, م.گوركي اتىنداعى مەملەكەتتىك اكادەميالىق ورىس دراما تەاترى «ماڭگۇرت. ماڭگى قۇل» ميستەرياسىن كوپشىلىك نازارىنا ۇسىنادى. ال 14 ماۋسىمدا م.گوركي اتىنداعى مەملەكەتتىك ورىنبور وبلىستىق دراما تەاترى «ماحاببات پەن كوگەرشىندەر» كومەدياسىن, ن.ءجانتورين اتىنداعى ماڭعىستاۋ وبلىستىق قازاق مۋزىكالىق دراما تەاترى «شىڭىراۋ» دراماسىن قويادى.
15 ماۋسىمدا س.مۇقانوۆ اتىنداعى سولتۇستىك قازاقستان وبلىستىق قازاق مۋزىكالىق دراما تەاترى «قاسىرەت» پسيحولوگيالىق دراماسىن جانە جامبىل وبلىستىق ورىس دراما تەاترى «دون جۋان» كومەدياسىن ساحنا تورىنە شىعارادى. 16 ماۋسىمدا «تۋنگۋچ» اتتى جاستار ەكسپەريمەنتالدىق تەاترى (بىشكەك) «يلەگيلەك» پسيحولوگيالىق دراماسىن, سونداي-اق, ا.بريانتسەۆ اتىنداعى سانكت-پەتەربۋرگ مەملەكەتتىك جاس كورەرمەن تەاترى «قۇنداقتاۋلى ادام» قويىلىمىن ساحنالايدى. تەاتر مەرەكەسىن 17 ماۋسىم كۇنى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى «قاراش-قاراش» دراماسىمەن اياقتايدى. قويىلىمدار «جاستار» تەاترى, م.گوركي اتىنداعى مەملەكەتتىك اكادەميالىق ورىس دراما تەاترى جانە ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ساحناسىندا وتەدى.
