«وتىرار سازى» شاشۋى
جامبىل اتىنداعى قازاق مەملەكەتتىك فيلارمونياسىنا قاراستى ۇجىمداردىڭ «ەكسپو-2017» حالىقارالىق مامانداندىرىلعان كورمەسى اياسىندا استانادا بىرنەشە كونتسەرتى وتەدى. «استانا بالەت» تەاترىندا ۇيىمداستىرىلعان نۇرعيسا تىلەنديەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترىنىڭ كەشى سونىڭ باسى بولدى.
اتالمىش ونەر ۇجىمىنىڭ باستاۋىندا اسا كورنەكتى كومپوزيتور, دارىندى ديريجەر, كۇيشى-دومبىراشى نۇرعيسا تىلەنديەۆ تۇرعانىن ءبارىمىز بىلەمىز. اكەسىنىڭ ديريجەرلىك تاياقشاسىن ۇستاپ قالعان قازاقستاننىڭ ەڭبەك سىڭىرگەن قايراتكەرى ءدىنزۋحرا تىلەنديەۆا قازىرگى تاڭدا وركەستردىڭ كوركەمدىك جەتەكشىسى ءارى باس ديريجەرى بولىپ وتىر.
باس ديريجەر مەن ديريجەرلەر – قر ەڭبەك سىڭىرگەن ءارتىسى جالعاسبەك بەگىندىكوۆ, ءمۇسىلىم امزە كەزەك-كەزەك ساحناعا كوتەرىلىپ, وركەسترگە جەتەكشىلىك ەتتى. كونتسەرتتە قازاق كومپوزيتورلارىنىڭ شىعارمالارى جانە جورج بيزە سىندى شەتەل كلاسسيكتەرىنىڭ مۋزىكاسى ورىندالدى.
«كەشتە كوبىنەسە اكەمنىڭ اندەرى مەن كۇيلەرى, ونىڭ وركەسترگە وڭدەپ تۇسىرگەن شىعارمالارى جانە اتام تىلەندى اتابايۇلىنىڭ تۋىندىلارى ورىندالدى. اتامنىڭ بىرنەشە كۇيىن اكەم نوتاعا ءتۇسىرىپ كەتتى.
ول ايتقانداي, كونتسەرتتە نۇرعيسا تىلەنديەۆتىڭ نۇتفوللا شاكەنوۆ, تۇمانباي مولداعاليەۆ, قادىر مىرزا-ءالى سىندى اقىندارمەن بىرىگىپ جازعان «جان ساۋلەم», «اق شاعالا», «الاتاۋ», «قارلىعاشتار», «ءوز ەلىم», ت.ب. اندەرى شىرقالىپ, «اققۋ», «القيسسا», «ماحامبەت» كۇيلەرى مەن سۇگىردىڭ «بوزىنگەن» كۇيى شالقىدى. كۇي ءتاڭىرىسى – تاتتىمبەتتىڭ «سارى جايلاۋ» كۇيى مەن فرانتسيا كومپوزيتورى پول موريانىڭ تۋىندىسىن بەلگىلى سكريپكاشى ءجاميلا سەركەباەۆا جاڭا وڭدەۋدە قۇيقىلجىتتى. بۇعان قوسا, قازاقستاننىڭ ەڭبەك سىڭىرگەن قايراتكەرلەرى ءجاميلا باسپاقوۆا, گۇلزيا ستامبەك, لاريسا ناسرەتدينوۆا, حالىقارالىق بايقاۋلاردىڭ لاۋرەاتتارى باقتىگۇل بيسەمباەۆا, فارحات كۋبيەۆ, نۇرسۇلتان شاتىرحانۇلى ونەر كورسەتتى.
جامبىل اتىنداعى قازاق مەملەكەتتىك فيلارمونياسىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى جەڭىس سەيدوللاۇلىنىڭ ايتۋىنشا, «ەكسپو-2017» كورمەسى اياسىندا فيلارمونيانىڭ بارلىعى دەرلىك ۇجىمدارى, اتاپ ايتساق, باقىتجان بايقاداموۆ اتىنداعى مەملەكەتتىك حور كاپەللاسى, مەملەكەتتىك ۇرمەلى اسپاپتار وركەسترى, عازيزا جۇبانوۆا اتىنداعى مەملەكەتتىك شەكتى اسپاپتار كۆارتەتى, مەملەكەتتىك اكادەميالىق سيمفونيالىق وركەسترى جانە مەملەكەتتىك اعاش ۇرمەلى اسپاپتار كۆينتەتى ەلوردادا كونتسەرت قويادى.
امانعالي قالجانوۆ