كەشە قالا مەكتەپتەرىنەن تۇلەپ ۇشقان 4978 تۇلەك جاڭا ومىرگە جولداما الدى. قولدارىنا اتتەستاتتارىن العان استانالىق تۇلەكتەر ءۇشىن ۇبت ناۋقانى 20 ماۋسىمنان باستالادى. سوڭعى ءۇش جىلدا وتكىزىلگەن ءتۇرلى عىلىمي جوبالاردىڭ, حالىقارالىق وليمپيادالار مەن كونكۋرستاردىڭ جەڭىمپازى اتانىپ, مەكتەپتى ابىرويمەن اياقتاعان تۇلەكتەردەن وزگە مەكتەپ بىتىرۋشىلەردىڭ 4526-سى الداعى ۇبت-عا قاتىسىپ, باقتارىن سىنايتىن بولادى.
مەكتەپتەگى پاندىك ەمتيحانداردى ويداعىداي تاپسىرىپ, قولدارىنا اتتەستات الاتىن تۇستا ەرەكشە تولقۋدىڭ بولاتىنى راس. وسىنداي ءبىر اسەرلى كەش قالامىزداعى عالي ورمانوۆ اتىنداعى №7 مەكتەپ-گيمنازياسىندا ءوتتى.
– بۇگىن, مىنە, ءبىزدىڭ عانا مەكتەبىمىزدە ەمەس, قالامىز, ەلىمىز بويىنشا قيالدارىن قاناتتارىنا بايلاپ, ارماندارىن ارقالاعان سان مىڭداعان بالا التىن ۇيالارىمەن قوشتاسۋدا. ۇستازدارى 11 جىل بويى ءبىلىم نارىمەن سۋسىنداتقان اياۋلى شاكىرتتەرىمەن قوشتاساتىن ءسات تە – وسى. مەكتەپ پارتاسىندا وقۋشى رەتىندە وتىرىپ تاپسىرعان سىناقتارىڭنىڭ ناتيجەسى جاقسى شىعىپ, قولدارىڭا كۋالىكتەرىڭدى الىپ, مارقايىپ وتىرسىڭدار. جولدارىڭ بولسىن! ءبىز مەكتەبىمىزدەن سەندەردەي ءبىلىمدى, تالانتتى بالالاردىڭ بىتىرگەنىن ماقتان ەتەمىز. ەكىنشى جاعىنان قيمايمىز. دەگەنمەن بۇل – ءومىر زاڭى. دۇنيەگە كىرپىش بولىپ قالانىپ, ەلىمىزدىڭ كوركەيۋىنە وزدەرىڭدەي وجەت, نامىستى, ۇلتىن سۇيەتىن ورەندەر كەرەك! – دەدى مەكتەپ ديرەكتورى جانات تۇرىسبەكقىزى قۇتتىقتاۋ ءسوزىن سويلەپ.
«جۇلدىزدى بالل» اتتى سالتاناتتى جيىندا مەكتەپتىڭ 113 وقۋشىسى اتتەستاتتارىن الىپ, ومىرگە توپشىسىن قاتايتىپ ۇشىرىپ وتىرعان ۇستازدارىمەن قوشتاستى. مەملەكەتتىك ەمتيحان قورىتىندىسى بويىنشا مەكتەپتەن 6 «التىن بەلگى» مەن 4 «ۇزدىك اتتەستات» يەلەرى وزدەرىنىڭ ۇزدىك بىلىمدەرىن دالەلدەپ, ماقساتتارىن ورىنداپتى. مەكتەپتىڭ ابىرويىن ارتتىرىپ, ۇستازدارىنىڭ ءۇمىتىن اقتاعان وزات وقۋشىلارعا مەكتەپتىڭ قولونەر شەبەرى شوقان ءشوپتىبايۇلى جاساعان جۇلدىز بەينەسىندەگى ەرەكشە ەستەلىك سىي تارتۋ ەتىلدى. بۇل ەرەكشە ساتكە ءبىلىم ۇياسىنىڭ بىلتىرعى ۇزدىك تۇلەكتەرى قاتىسىپ, بيىلعى تۇلەكتەرگە اق جول تىلەدى.
گۇلجان راحمان
