مەملەكەت باسشىسىنىڭ تاپسىرماسىن ورىنداۋ اياسىندا استانادا Joltap جوباسى ىسكە اسىرىلىپ جاتىر. بۇل ەلوردا تۇرعىندارىنا ءوز تابىسىن ارتتىرۋعا مۇمكىندىك بەرەدى. ونىڭ قاتىسۋشىلارى مەملەكەتتىك قولداۋ شارالارى تۋرالى كەڭەس الا الادى, وقۋدان ءوتىپ, وزىنە لايىقتى جۇمىس تابا الادى.
جوبانىڭ جەتەكشىسى, استانا اكىمىنىڭ كەڭەسشىسى دانا ءجۇنىسوۆا Joltap-تىڭ نەگىزگى ماقساتتارى تۋرالى پىكىر ءبىلدىردى.
– بۇل جوباعا ەلوردا اكىمدىگى باستاماشىلىق ەتتى جانە ونى ىسكە اسىرۋ ءۇشىن ونىڭ بارلىق قۇرىلىمدارى, سونداي-اق جوبانىڭ بىرلەسكەن وپەراتورى بولعان «جاڭا مۇمكىندىك» قوعامدىق قورى جۇمىلدىرىلدى. Joltap-تىڭ نەگىزگى ماقساتى – حالىققا قولداۋ شارالارى بويىنشا كەڭەس بەرۋ. جۇمىسقا ورنالاسۋ جانە تۇراقتى تابىس تابۋ الدىندا پراكتيكالىق داعدىلاردى تەگىن وقىتۋدى قامتاماسىز ەتۋ, سونداي-اق ءوز ءىسىن اشۋ ارقىلى كىرىستى ارتتىرۋ مۇمكىندىكتەرىن تاڭداۋعا كومەكتەسۋ. بۇل جوبادا وڭىرلەردەن كەلگەن جۇمىسسىزدارعا, NEET ساناتىنداعى جاستارعا, سونداي-اق حالىقتىڭ الەۋمەتتىك وسال توپتارىنا كومەك كورسەتۋگە ەرەكشە نازار اۋدارىلادى. جالپى, جوبا ءتيىمدى ەكوجۇيە بولىپ سانالادى, وندا ءاربىر ادام وزىنە مۇمكىندىكتەر تابا الادى, – دەدى جوبا جەتەكشىسى.
Joltap جوباسىنا قاتىسۋشىلار 14 ماماندىق بويىنشا تەگىن وقىتىلادى, 52 مەملەكەتتىك قولداۋ شارالارى بويىنشا كەڭەس بەرەدى, اتاۋلى الەۋمەتتىك كومەك الۋعا جانە بيزنەس اشۋ ءۇشىن ءوتىنىم بەرۋگە جاردەمدەسەدى.
جوبا جەتەكشىسىنىڭ ايتۋىنشا, جوبانىڭ ءبىرىنشى كەزەڭىندە ەلوردادا ادامدار كوپ جينالاتىن ورىنداردا 10 «بارشاعا مۇمكىندىك» مودۋلدىك پۋنكتى ورناتىلىپ, ىسكە قوسىلدى. وتكەن جىلدىڭ قىركۇيەك ايىنان باستاپ 9 مىڭنان استام قالا تۇرعىنى وسى مودۋلدىك پۋنكتتەردە كەڭەس الدى, ءۇش مىڭ ادام اكىمدىك باسقارمالارىنا مەملەكەتتىك قولداۋ شارالارىن الۋعا ءوتىنىم بەردى.
ەكىنشى كەزەڭدە قىسقا مەرزىمدى وقىتۋدىڭ ەكى باعدارلاماسى ۇيىمداستىرىلدى. جۇمىس ماماندىقتارى بويىنشا (باريستا, ساتۋشى-كاسسير, قوعامدىق تاماقتاندىرۋدىڭ امبەباپ قىزمەتكەرى, تىگىنشى, سانگەر-كونسترۋكتور, ەلەكتر گازبەن دانەكەرلەۋشى) جانە تسيفرلىق داعدىلار (تارگەت, SMM, بەينەمونتاج, ماركەتپلەيستەر, موبيلوگرافيا, گرافيكالىق ديزاين, ۆەب-ديزاين, نەگىزگى تسيفرلىق داعدىلار).
تىكەلەي مودۋلدىك پۋنكتتەردە كەڭەسشىلەر جۇمىس ىستەيدى, ولار ادامدارمەن كەزدەسەدى, ولارمەن تانىسادى جانە بارلىق قىزمەتتەر بويىنشا كەڭەس بەرەدى (مەملەكەتتىك قولداۋ شارالارى, وقۋعا نەمەسە جۇمىسقا جىبەرىلەدى). وسىدان كەيىن ءوتىنىش بەرۋشىلەرمەن بىرگە جۇرەدى جانە ولارمەن بايلانىستا بولادى.
– وقىتۋ بارلىق قاجەتتى زاتتارمەن جابدىقتالعان جەكەلەگەن وقۋ سىنىپتارىندا جۇرگىزىلەدى. وقىتۋشىلار قولدانبالى تاجىريبەسى بار بىرقاتار تاجىريبەشىلەردەن تاڭدالدى. مىسالى, «باريستا» كۋرسى 15 جىلدىق تاجىريبەسى بار بىرنەشە ءىرى كوفەحانالار جەلىسىنىڭ قازىرگى باريستاسىن, «تىگىنشى» كۋرسىن ەۋرازيالىق ديزاينەرلەر وداعىنىڭ قۇرامىنا كىرەتىن قازىرگى تىگىنشى, ال «ساتۋشى-كاسسير» كۋرسىن ەلدەگى ەڭ ءىرى سۋپەرماركەتتەر جەلىسىنىڭ پراكتيك-مۇعالىمدەرى وقىتادى. «ەلەكتروگازبەن دانەكەرلەۋشى» كۋرسى بويىنشا Unobtanium وقۋ ورتالىعىمەن ىنتىماقتاستىق جولعا قويىلعان, ول 10 جىلدان استام جۇمىس بارىسىندا 100 مىڭنان استام قىزمەتكەردى وقىتقان, – دەدى دانا ءجۇنىسوۆا.
كەشە, ياعني 8 ساۋىردە جوبا اياسىندا استانادا «بۋحگالتەرلىك ەسەپ نەگىزدەرى» اتتى جاڭا وقىتۋ كۋرسى باستالدى. ءبىر كۇندە كۋرستان وتۋگە نيەت بىلدىرۋشىلەردەن 300 ءوتىنىم جينالدى.
وسى جىلدىڭ 1 قاڭتارىنان باستاپ 2 مىڭ ادام وقىتىلدى, جىل سوڭىنا دەيىن 10 مىڭ تۇرعىندى قامتۋ جوسپارلانىپ وتىر.
ەلوردادا «بارشاعا مۇمكىندىك» مودۋلدىك پۋنكتتەرى اشىلعان بولاتىن. ولار كەلەسى مەكەنجايلاردا ورنالاسقان:
«جاستار» سارايى, رەسپۋبليكا داڭعىلى, 34
«Ailand» ودو, قورعالجىن تاسجولى, 2
«ۆسترەچا» ءسۇ, ابىلاي حان داڭعىلى, 31
«ازيا پارك» سوو, قابانباي باتىر داڭعىلى, 21
«تۇلپار» سو, ش.ءۋاليحانوۆ كوشەسى, 24
«Euromall» ءسۇ, قوسشىعۇلۇلى كوشەسى, 23
«Mechta» ءسۇ, سىعاناق كوشەسى, 3
«راحمەت» ءسۇ, تىلەنديەۆ داڭعىلى, 15
ەمو, بەيبىتشىلىك كوشەسى, 9
«راحمەت» ءسۇ, مومىشۇلى داڭعىلى, 10
«جانۇيا», بەيبىتشىلىك كوشەسى, 14.
ەلوردا تۇرعىندارى وسى مەكەنجايلاردا ورنالاسقان «بارشاعا مۇمكىندىك» مودۋلدىك پۋنكتتەرىندە ۇسىنىلاتىن بارلىق مۇمكىندىكتەردى پايدالانۋ ارقىلى تەگىن وقىپ, جاڭا كاسىپتى مەڭگەرە الادى
