استاناداعى وقۋشىلار سارايىندا «ءبىلىم شىڭى» اتتى اشىق قالالىق چەمپيونات ءوتتى.
بۇل ءىس-شارانىڭ ماقساتى – بالالاردىڭ تەحنيكالىق شىعارماشىلىعىن دامىتۋ. چەمپيوناتتىڭ اشىلۋىندا وقۋشىلار سارايىنىڭ ديرەكتورى ەربول ىرگەباي تەحنيكالىق سالاعا جاس ۇرپاقتى مەكتەپ تابالدىرىعىنان باستاپ باۋلۋدىڭ ماڭىزى تۋرالى ايتتى.
ءبىلىم سايىسى ەكى باعىت بويىنشا ۇيىمداستىرىلدى. ءبىرىنشى – روبوتوتەحنيكالىق جارىس. مۇندا وقۋشىلار «كەگەلرينگ-كۆادرو», «ءتۇزۋ بويىمەن جارىس», «ارقان تارتىس», «سۋمو» اتالىمدارى بويىنشا سىناستى. وعان قالاداعى 43 مەكتەپتەن 156 وقۋشى قاتىستى. ەكىنشى – تەحنيكالىق شىعارماشىلىق بويىنشا كورمە-بايقاۋ. بۇعان مەكتەپتەن 126 وقۋشى قاتىسىپ, ولاردان 60 جۇمىس تۇسكەن.
شارا بارىسىندا جارىستىڭ تالابى مەن كۇردەلىلىگىنە قاراماستان وقۋشىلار ءوز بىلىمدەرىن جاقسى كورسەتە ءبىلدى.
چەمپيوناتتىڭ قورىتىندىسى بويىنشا, باس جۇلدەنى №58 مەكتەپ-گيمنازياسىنىڭ وقۋشىلارى قانجىعاسىنا بوكتەردى. ءبىرىنشى ورىندى وقۋشىلار سارايىنىڭ جەتكىنشەكتەرى جەڭىپ الدى. ەكىنشى ورىندى №72 جانە №60 مەكتەپ-ليتسەيى يەلەندى. ءۇشىنشى ورىندى №76 جانە №54 مەكتەپ-ليتسەيى مەن «شۇعىلا» ورتالىعىنىڭ جاسوسپىرىمدەرى قاناعات تۇتتى.
