B توبى: پورتۋگاليا. يسپانيا. ماروككو. يران
توپتاعى تالاسسىز فاۆوريت بولىپ تابىلاتىن پيرەنەي تۇبەگىنەن شىققان ەكى قۇراما – پورتۋگاليا مەن يسپانيا دەربيى ءبىرىنشى تۋردا-اق شىن مانىندە كىمنىڭ كۇشتى ەكەنىن انىقتاۋعا ءتيىس. ءبىر ايماقتاعى ەكى جاساق اراسىنداعى تەكەتىرەستە يسپانداردىڭ باسىم كورىنەتىنى دە راس. بۇل ءۇشىن ولاردىڭ ءوز ءۆيزاۆيىن 2010 جىلى الەم چەمپيوناتىندا, 2012 جىلى ەۋروپا بىرىنشىلىگىندە جولدان شىعارىپ تاستاعانىن ايتساق تا جەتكىلىكتى. ەندى كريشتيانۋ مەن ونىڭ كومانداسى ەسە قايتارۋعا بارىن سالۋعا ءتيىس.
پورتۋگاليا قۇراماسى
پورتۋگالدار 2016 جىلعى ەۋروپا چەمپيوناتىنىڭ ىرىكتەۋ سايىسىندا يسلاندتارمەن, اۆستريالىقتارمەن, ۆەنگىرلەرمەن وتكىزگەن ءۇش ويىنىن دا تەڭ اياقتاپ, دوپ ايىرىمىنا (4:4) بايلانىستى ءۇشىنشى ورىنمەن كەلەسى كەزەڭگە ءوتتى. ەڭ قىزىقتىسى, ولار جارتىلاي فينالدا ءبىر عانا كوماندانى – ۋەلستى نەگىزگى ۋاقىتتا 2:0 ەتىپ جەڭىپ, اقىرىندا چەمپيون اتاندى. ال فينالدا الاڭ يەلەرى – فرانتسۋزداردى 109-مينۋتتاعى ەدەردىڭ گولىمەن ۇتتى.
كوماندا 1/8 فينالدا حورۆاتتاردى 1:0 ەتىپ ۇتۋ ءۇشىن قوسىمشا ۋاقىتتى كەرەك ەتتى. بۇدان كەيىن 1/4 فينالدا پولشامەن 1:1 ەسەبىمەن تەڭ ءتۇسىپ, ماتچتان كەيىنگى پەنالتي سەرياسىندا 5:3 ەتىپ جەڭىپ العا شىقتى.
بىرىنشىلىكتە كريشتيانۋ رونالدۋ 9 كەزدەسۋدە 15 گول سالىپ, مەرگەندەر كوشىندە ەكىنشى بولدى. ءبىرىنشى ساتىعا 10 ماتچتا 16 دوپ سالعان گەرمانيالىق روبەرت لەۆاندوۆسكي كوتەرىلدى.
الداعى جاھاندىق جارىس پورتۋگالدار ءۇشىن جەتىنشى چەمپيونات بولماق. پورتۋگاليا 1966 جىلى الەمنىڭ قولا جۇلدەگەرى, 2016 جىلى ەۋروپا چەمپيونى اتاندى.
يسپانيا قۇراماسى
يسپاندار 2014 جىلى الەم, 2016 جىلى قۇرلىق چەمپيوناتتارىندا ساتسىزدىككە ۇشىراعاننان كەيىن قايتادان بۇرىنعىشا كومبيناتسيالىق ستيلگە ورالىپ, تابىسقا جەتە باستادى. «قىزىل فۋريا» ىرىكتەۋ جارىسىندا 10 ماتچتا 36 گول سوعىپ, بار-جوعى 3 دوپ قانا جىبەرىپ الدى.
يسپانيا قۇراماسى فۋتبول تاريحىنداعى رەسمي ويىندارداعى جەڭىلىسسىز ماتچتار سەرياسىنىڭ رەكوردىن دا جاسادى. ول 2010 جىلدان 2013 جىلعا دەيىنگى قاتارىنان 29 ماتچتا جەڭىلىستىڭ اششى ءدامىن تاتقان جوق. وسى ۋاقىتتاردا كوماندا جولداستىق كەزدەسۋلەردە ارگەنتينا, پورتۋگاليا, يتاليا جانە انگليا كوماندالارىنا عانا ەسە جىبەردى.
بيىلعى مۋنديال يسپانداردىڭ 15-ءشى دۇنيە جۇزىلىك دوپ دوداسى بولعالى تۇر. يسپانيا 2010 جىلى الەم چەمپيونى, 1964, 2008, 2012 جىلدارى ەۋروپا, 1992 جىلى وليمپيالىق ويىنداردىڭ چەمپيونى بولدى.
ماروككو قۇراماسى
افريكالىق ارابتار شەشۋشى توپتىق ەلەكتىك ءتۋرنيردى وتە ساقتىقپەن وتكىزدى. كوماندا ءۇش رەت ۇتىپ, ءۇش مارتە تەڭ ويناپ, 11:0 دەگەن دوپ ايىرىمىمەن كوت-د’يۆۋار, گابون جانە مالي قۇرامالارىن ارتتا قالدىردى.
ماروككو (ماعريب) قۇراماسى اراعا 20 جىل سالىپ, مۋنديالعا قايتىپ ورالىپ وتىر. بۇل «اتلاس ارىستاندارىنىڭ» بەسىنشى باسەكەسى بولماق. قۇراما 1976 جىلى افريكا ۇلتتىق كۋبوگىنىڭ يەگەرى اتانعان.
يران قۇراماسى
پارسى ەلىنىڭ جاساعى ازيا ايماعىنداعى ىرىكتەۋ تسيكلىن وتە جاقسى ناتيجەمەن اياقتادى. ول تۋرنيردە بىردە-ءبىر رەت جەڭىلگەن جوق, ءوزىن قورعانىسى مىقتى, شابۋىلى وتكىر كوماندا رەتىندە تانىتتى.
قۇراما ىرىكتەۋ جارىسىندا ءوز قاقپاسىنا دوپ وتكىزبەۋ جونىنەن دە رەكورد جاسادى. ول 1121 مينۋت بويى داربازاسىن «قۇرعاق» ساقتادى.
پارسىلار بەسىنشى الەم چەمپيوناتىندا كۇش سىناسقالى وتىر. سونىڭ ىشىندە قاتارىنان ەكىنشى رەت مۋنديالعا جولداما جەڭىپ الدى.
يراندىقتار ءۇش رەت (1968, 1972, 1976) ازيا كۋبوگىنىڭ يەگەرى بولدى.
