ءتۇس اۋەلەتىندە الدە ءبىر تانىسىم قوڭىراۋلاتىپ قالدى.
سالعان جەردەن:
– تەلەۆيزورىڭدى قوسشى, بۇگىن «قالاۋلىم» قىزىق بولادى, – دەدى.
– ۇيدە تەلەديدار جوق, – دەگەنىمە قارقىلداپ كۇلىپ الدى.
– شىن ايتىپ تۇرسىڭ با, تەلەديدار جوعى نەسى؟ تەحنيكانىڭ دامىعان زامانىندا تەلەديدار قارامايتىنىڭ قىزىق ەكەن.
تانىسىممەن تەلەديدار تۋرالى اڭگىمەلەسىپ تۇرعانىمدى ەستىگەن وتاعاسى وزىمەن-ءوزى كۇبىرلەي كەتتى.
– بار نارسەنى قۇرتتىڭ عوي. شىنىندا دا, بالالارعا وبال جاسادىڭ. يا, بار تەلەديداردى قۇرتقان ءوزىم ەدىم. ويتپەگەندە قايتەيىن؟ ادامعا ءتالىم-تاربيە بەرەتىن باعدارلامالار جوقتىڭ قاسى. نە دۇرىستاپ كينو كورە المايسىڭ. بەس مينۋت سايىن كورسەتەتىن جارنامالارىنىڭ ءوزى بالالارىمدى بۇزىپ ءبىتتى. «ولبەيس» دەيسىز بە, «ەركەكتىڭ قۋاتىن ارتتىراتىن تابلەتكالار» دەيسىز بە, اشىق جارنامالايدى. بالانىڭ ويلاۋ جۇيەسى اق پاراقتاي اپپاق بولادى ەمەس پە؟ نەنى كورسە, نەنى وقىسا ساناسىنا سول جازىلادى. ولبەيس پەن الگىندەي ارسىز جارنامالاردى كورە بەرگەسىن شىعار, سولاردىڭ ءسوزىن قايتالاپ ايتىپ جۇرگەنىن كورىپ جۇرەگىم اۋىرعان. «ولاي ايتپا, ول جامان ءسوز, ۇيات بولادى» دەۋىن دەدىك قوي.
– جامان ءسوز بولسا, بۇكىل ەل كورەتىن تەلەديدارعا نەگە شىعارادى؟ – دەپ, قارسى سۇراق قويعاندا نە دەرىمىزدى بىلمەي قالدىق.
كورسەتەتىنى انايى جارنامالار, ودان قالسا, شەت ەلدىڭ سونىڭ ىشىندە ءبىزدىڭ سالت-داستۇرىمىزگە ۇلتتىق قۇندىلىعىمىزعا مۇلدەم جۋىسپايتىن شەت ەلدىڭ سەريالدارىن كورسەتەتىن ەلىمىزدەگى ارنالارعا كەيىنگى كەزدە قاپالانعانىم راس ەدى. شەت ەلدىڭ قاڭسىعىنا وكپەلەپ, «ءبىزدىڭ قازاقتار نەگە وسى دۇرىس باعدارلاما بەرمەيدى» دەپ جۇرگەنىمىزدە, ءبىزدىڭ ءبىلارماندار دا ءبىرشاما شوۋ باعدارلامالاردى ويلاپ تاۋىپ, كورەرمەندەردىڭ نازارىنا ۇسىنا باستادى. «قالاۋلىم» دەيسىز بە, «كەل, كەلىنىم», «ءوز ويىم» سياقتى ادامعا بەرەرى جوق باعدارلامالاردى قاراپ وتىرىپ, وكپەم قارا قازانداي بولدى. بوي جەتىپ وتىرعان قىزدىڭ جۇرت الدىندا ەشكىمنەن قىمسىنباي كۇيەۋ ىزدەگەنى نەمەسە جاسى كەلگەن ايەلدەردىڭ بۇكىل ەل الدىندا ۇلىنا كەلىن ىزدەگەنى قاي بابامىزدان قالعان سالت ەدى؟ جۇزىندە جىلىلىق, جۇرەگىندە يماندىلىق, بويىندا قىزعا ءتان قاسيەتى جوق ءزاميرا سىندى شوپجەلكەلەر كوگىلدىر ەكران الدىندا بار مىنەزىن كورسەتىپ دورەكى سويلەگەنى, كۇيەۋىمەن قايتىپ-قالاي اجىراسىپ كەتكەنىن ايتۋى, ەر ادامعا «ايىرامىن» دەپ ايقايلاعانى, قانشا ەركەكتى كورگەنىن ايتۋى كىمگە وپا, كىمگە تاربيە؟ بەتىنە بەس باتپان بوياۋدى جاعىپ الىپ بولاشاق ەنەم مەن بولاشاق كۇيەۋىمە وسىنداي دەپ شارت قويامىن دەپ, ەكىلەنىپ تۇرىپ سويلەگەن جالبىرشاشتاردى كورسەتۋ ارقىلى ءبىزدىڭ ارنالار نە ۇتتى ەكەن؟ كەۋدەسىن پلاستيكالىق وپەراتسيا ارقىلى وزگەرتكەن قىزدار مەن ەركەكتەن ايەلگە اينالعان كوگىلدىر ەركەكتەردى ەل الدىنا شىعارعاندا نە تاپتى؟ ونىسىمەن قويماي, «قىزدىعىمدى ساتامىن» دەپ جاھانعا جار سالعان قىز تۋرالى ءتۇسىرىلىم جاساعانى نە؟ قازاقتىڭ قاي قىزى ءوز-ءوزىن اشىق جارنامالاپ ەدى؟ قازاقتىڭ قاي قىزى ۇلكەننىڭ بەتىنەن الىپ, ەر ادامدى جەردەن الىپ جەرگە سالىپ ەدى؟ بۇل ادامدار شىنايى ومىردە مۇنداي ەمەس, بۇلار جاي ارتىستەر, شوۋ عوي دەۋلەرىڭىز مۇمكىن. شوۋ بولسىن, ارتىستەر بولسىن – كورەرمەن ولاردى شىنايى قابىلدايدى ەمەس پە؟
ءوسىرىپ وتىرعان بالالارىمنىڭ ادامعا بەرەرى جوق سۇرقيا باعدارلامالارمەن ساناسىن ۋلاعىم كەلمەيدى. وسى سەبەپتى ۇيدەگى بار تەلەديداردىڭ شنۋرىن قيىپ, سىرتقا شىعارىپ تاستاعانمىن. قازىر الەۋمەتتىك جەلىدەن تەلەباعدارلامالاردىڭ اڭداتپاسىن كورگەن سايىن سويتكەنىم دۇرىس بولىپتى دەپ ويلايمىن.
سالتانات ابىلبەكوۆا
