استانادا دەنەنى جاساندى قىزدىراتىن (سولياري) سالوندار كوپ. الايدا وعان ءجيى باراتىن سۇلۋلاردىڭ 75 پايىزى قاتەرلى اۋرۋدى ارتتىرادى ەكەن. بۇل تۋرالى دەرماتولوگيا ورتالىعىنىڭ ماماندارى جىل سايىن وتەتىن «مەلانوما كۇنى» اكتسياسى اياسىندا ءمالىمدەدى.
– اۋرۋدىڭ الدىن الۋدى كوزدەيتىن شارا كەزىندە كەز كەلگەن قالا تۇرعىنى تەكسەرىلىپ, تەگىن كەڭەس الدى. دۇنيەجۇزىلىك دەنساۋلىق ساقتاۋ ۇيىمىنىڭ شەشىمىمەن جىل سايىن الەمدە مەلانوماعا قارسى اكتسيالار ۇيىمداستىرىلىپ, ونكولوگيالىق اۋرۋدىڭ الدىن الادى. ءبىز ۇيىمداستىرعان شارا بارىسىندا 240 ادام ونكولوگ, دەرماتوۆەنەرولوگ سەكىلدى مامانداردىڭ تەكسەرۋىنەن ءوتتى, – دەيدى ورتالىق باسشىسى جۇلدىز دانباەۆا. ونىڭ ايتۋىنشا, بۇگىندە اۋرۋ جاسارىپ كەلەدى. دارىگەرلەردىڭ قابىلداۋىنا ۇلكەندەرمەن قاتار, كىشكەنتاي بالالاردىڭ كەلۋى جيىلەپ كەتكەن.
ەگەر 2015 جىلى استانا قالاسىندا 14 جاعداي تىركەلسە, 2016 جىلى 21 ادام اۋرۋعا شالدىققان.
«دەنەگە مەلانومانىڭ پايدا بولۋى اعزاداعى گارموندىق وزگەرىستەرگە بايلانىستى. كۇننىڭ استىندا ۇزاق بولۋ, جاساندى قىزدىرىنۋ جانە ەكولوگيالىق جاعداي دا اسەر ەتەدى. ءدال قازىر دەمالىس ۋاقىتى. قاۋىپتىڭ الدىن الۋ ءۇشىن بارلىق ساقتىق شارالارىن, اتاپ ايتقاندا, باس كيىم كيۋ, كۇنگە قارسى كوزىلدىرىك تاعۋ, ارناۋلى كوسمەتيكالىق جاقپا مايلاردى قولدانعان ءجون» دەيدى جۇلدىز سەيىتقامزاقىزى.
اكتسيا اياسىندا قالا تۇرعىندارى ارنايى دەرماتوسكوپيالىق جانە ۆيدەوتەرماتوسكوپيالىق اپپاراتتىڭ كومەگىمەن تەكسەرىلدى. ولاردىڭ بارىنە كۇنگە قارسى قولداناتىن جاقپا ماي تاراتىلدى.
تۇرعىنداردىڭ تەڭ جارتىسىنا ونكولوگتىڭ باقىلاۋىندا بولۋ قاجەتتىلىگى ەسكەرتىلسە, دەنەلەرىندە پاپيللوما, فيبروما, دەرماتوفيبروما بار ادامدارعا حيرۋرگيالىق جولمەن الدىرىپ تاستاۋ ۇسىنىلدى. قالعان ازاماتتاردىڭ دەرماتولوگ دارىگەرلەردىڭ باقىلاۋىندا بولاتىنى ايتىلدى.
گۇلميرا ايماعانبەت
