تەستىلەۋدەن ءوتۋ كۇردەلى مە؟
بيىل قر ءبىلىم جانە عىلىم مينيسترلىگى پەداگوگتاردى اتتەستاتتاۋدىڭ جاڭا جۇيەسىن ەنگىزىپ, مۇعالىمدەر ءبىرىنشى رەت ۇلتتىق بىلىكتىلىك تەست تاپسىردى. ونىڭ العاشقى كەزەڭى – وسى مامىر ايىندا بولدى. جاقىندا, دالىرەك ايتقاندا, 3-5 قاراشا كۇندەرى تەستىلەۋدىڭ ەكىنشى كەزەڭى ءوتتى.
وعان رەسپۋبليكا بويىنشا 51 مىڭنان استام ۇستاز قاتىستى. ناتيجەسىندە, 34 185 پەداگوگ تەستىلەۋدى ءساتتى تاپسىرىپ, 17 مىڭعا جۋىق مۇعالىم مەجەلى دەڭگەيدەن كورىنە المادى. الايدا, ءبىرىنشى كەزەڭمەن سالىستىرعاندا ەكىنشى كەزەڭدەگى تەستىلەۋدە شەكتى دەڭگەيدەن وتكەن پەداگوگتاردىڭ ەپتەپ بولسا دا سانى وسكەنىن بايقاۋعا بولادى.
تاياۋدا پارلامەنت سەناتىنداعى ۇكىمەت ساعاتىندا ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا بيىل 110 مىڭنان استام پەداگوگ رەسپۋبليكالىق بيۋدجەت ەسەبىنەن بىلىكتىلىكتى ارتتىرۋ كۋرسىنان ءوتىپ جاتقانىن باياندادى. «سونىڭ ىشىندە 8 مىڭنان استام ءپان مۇعالىمى جەكە پاندەردى اعىلشىن تىلىندە وقىتۋ ءۇشىن تىلدىك كۋرستاردا ءبىلىم الۋدا. ولاردىڭ 5 مىڭعا جۋىعى وسى وقۋ جىلىنان باستاپ ساباق بەرۋگە كىرىسكەن. «ۇستاز» ورتالىعى بارلىق وڭىرلەردە اعىلشىن تىلىندە ساباق بەرە باستايتىن 4,5 مىڭنان استام مۇعالىمگە قولداۋ كورسەتىپ جاتىر» دەدى ۆيتسە-مينيستر.
تاعى ءبىر جاڭالىق, بيىلعى جاڭا وقۋ جىلىنان باستاپ جاڭا جۇيە بويىنشا اتتەستاتتاۋدان وتكەن 34 مىڭ مۇعالىمگە بىلىكتىلىگىنە بايلانىستى 30-دان 50 پايىزعا دەيىن ۇستەماقى قوسىلعان.
ەندى وسى ايدىڭ باسىندا وتكەن تەستىلەۋگە كەلەيىك. بۇل سىناقتان وتە الماعان پەداگوگتارعا كەلەسى كوكتەمدە قايتا تاپسىرۋ مۇمكىندىگى بار. بىراق ءبىزدى «وسىنشاما مۇعالىم شەكتى دەڭگەيدەگى باللدى نەگە جيناي المادى؟» دەگەن سۇراق ويلاندىردى. الدە, تەستىلەۋدەن ءوتۋ كۇردەلىلەۋ مە؟ ءبىلىم جانە عىلىم مينيسترلىگىنىڭ ءباسپاسوز قىزمەتىنىڭ مامانى عانيبەت عالىمبەكۇلىنىڭ ايتۋىنشا, تەستىلەۋ سۇراقتارىنىڭ 70 پايىزى پاندىك بىلىمگە بايلانىستى بولسا, ونىڭ 30 پايىزى پەداگوگيكا مەن ادىستەمەگە باعىتتالعان ەكەن.
باس قالاداعى رەسپۋبليكالىق فيزيكا-ماتەماتيكا مەكتەبىنىڭ قازاق ءتىلى مەن ادەبيەت ءپانىنىڭ مۇعالىمى ارشاگۇل قازانباەۆا – اتالعان بىلىكتىلىك تەستىلەۋ ەمتيحانىن ويداعىداي تاپسىرعان ۇستازداردىڭ ءبىرى. ەندى سول كىسىنىڭ ايتقانىن تىڭدايىق.
«بىرىنشىدەن, مۇعالىمنىڭ ءوز پانىنەن تەست تاپسىرعانى دۇرىس دەپ ويلايمىن. ويتكەنى ەمتيحانعا دايىندالۋ ءۇشىن وتكەن ساباق تاقىرىپتارىن, اقىن-جازۋشىلاردىڭ شىعارمالارىن قايتا ءبىر قاراپ, ىزدەنىسكە تۇسەدى. كەيبىر مۇعالىمدەر مەكتەپتە ورتا سىنىپتارعا عانا ساباق بەرەدى. ال تەست سۇراقتارى كوبىنەسە جوعارى سىنىپ پاندەرىنەن كەلدى. ەكىنشىدەن, سىناقتان وتە الماعان ۇستازداردى كىنالاۋعا بولمايدى. ماسەلەن, ءبىر سۇراققا «ەكى-ءۇش دۇرىس جاۋاپ بولۋى مۇمكىن» دەپ جازىلعان. تەست سۇراقتارى بۇلاي كۇردەلى بولماسا ەكەن. ءبىر سۇراققا ءبىر جاۋاپ بولسا جەتەدى. مىسالى, مەن ءوز پانىمنەن بەرىلگەن 70 سۇراققا جاۋاپ بەرىپ, 80 بالل جيناۋىم كەرەك. ال پەداگوگيكا مەن ادىستەمەدەن 30 بالل الۋ قاجەت. پەداگوگيكا باعىتى بويىنشا كەلگەن سۇراقتارعا جاۋاپ بەرۋ – ءۇش ايلىق كۋرستا وقىعان مۇعالىمدەرگە وڭايىراق تيەدى. سوندىقتان بۇل ءۇش ايلىق كۋرستان بارلىق ۇستاز ءوتتى دەپ ايتا المايمىن. كەيبىر مۇعالىمدەردىڭ سىناقتان وتە الماي قالعانىنا وسى دا سەبەپ بولعان شىعار» دەيدى ول.
ءيا, قازىر مۇعالىمدەرگە جۇكتەلىپ وتىرعان مىندەت جەڭىل ەمەس. ولارعا پسيحولوگيالىق تۇرعىدان دا اۋىر. ەمتيحانعا دايىندالۋ ءۇشىن ۋاقىت قاجەت. كەيبىر ۇستازدار «بىلىكتىلىك تەستىلەۋى تامىز ايىندا وتكىزىلسە» دەگەن ۇسىنىستارىن ايتتى. ويتكەنى جازعى بالالاردىڭ دەمالىسىندا « ەمتيحانعا دايىندالۋعا ۋاقىت بولادى» دەيدى. قالاي بولعاندا دا, بىلىكتىلىك تەستىلەۋى پەداگوگ قاۋىمنان بىلىكتىلىك تالاپ ەتىپ وتىر.