استانا اكىمدىگىنىڭ دەلەگاتسياسى «اقىلدى» قالالاردىڭ بۇكىلالەمدىك ەكسپو كونگرەسىنە قاتىسىپ, يسپانياداعى UNWTO دۇنيەجۇزىلىك تۋريستىك ۇيىم باسشىلىعىمەن كەزدەستى.
ءىسساپار شەڭبەرىندە استانا قالاسى اكىمىنىڭ ورىنباسارى ەرمەك امانشاەۆ باستاعان دەلەگاتسيا مادريد جانە بارسەلونا مەرلەرىمەن, بارسەلونانىڭ دەنساۋلىق ساقتاۋ باسقارماسى جانە جەدەل جاردەم ستانساسى ماماندارىمەن كەزدەستى. ەكىجاقتى كەلىسسوزدەر ناتيجەسىندە بارسەلونا مەرىمەن دەنساۋلىق ساقتاۋ, ءبىلىم, تۋريزم جانە ساندىق ترانسفورماتسيا سالاسىندا تاجىريبە الماسۋ بويىنشا بىرقاتار كەلىسىمشارت جاسالدى. سونىمەن قاتار تاراپتار سپورت, دەنساۋلىق ساقتاۋ, تۋريزم, قالدىقتاردى جويۋ جانە كولىك سالاسىنداعى ارىپتەستىك بويىنشا دا كەلىسىمدەرگە قول قويدى. سونداي-اق قالالىق تۋريزم بويىنشا UNWTO ءسامميتىن استانادا ساپالى وتكىزۋ ماقساتىندا ەرمەك امانشاەۆ UNWTO باس حاتشىسىنىڭ ورىنباسارى مانۋەل باتلەرمەن دە كەزدەستى. ەستەرىڭىزگە سالساق, قىركۇيەكتە استانا دەلەگاتسياسى سەۋلدە وتكەن VII جاھاندىق قالالىق تۋريزم بويىنشا UNWTO سامميتىنە قاتىسقان بولاتىن. وندا VIII جاھاندىق قالالىق تۋريزم بويىنشا UNWTO-نىڭ كەلەسى ءسامميتى استانادا وتەتىنى ءمالىم بولعان-دى. كەستەگە سايكەس, استاناداعى سامميت كەلەر جىلدىڭ 7-11 قاراشاسىندا وتەدى دەپ جوسپارلانعان.
