بايلىقتىڭ ەڭ ۇلكەنى – حالىق اراسىنداعى دوستىق. ءبىز وسى دوستىقتى نىعايتىپ, ءبىر-ءبىرىمىزدى قۇرمەتتەپ, ەلىمىزدىڭ ەرتەڭى ءۇشىن قىزمەت ەتۋدەمىز. بۇل – قوناقجاي, باۋىرمال حالىق ەكەنىمىزدىڭ ايقىن كورىنىسى. «بولىنگەندى ءبورى جەيدى» دەگەن بابالار ءسوزى تەگىننەن-تەگىن ايتىلماسا كەرەك. ءبىز وزىمىزبەن بىرگە تۇرىپ جاتقان وزگە ۇلت وكىلدەرى جايلى جاقسى پىكىردەمىز. ال قازاقستاندا تۇرىپ جاتقان ولار ءبىز جايلى نە ويلايدى ەكەن؟ وزدەرىنەن سۇراپ بىلەيىك.
استانا مەديتسينا ۋنيۆەرسيتەتى ستۋدەنتتەرى يوگەش كۋماۆات پەن گحاشنايام چودحاري ءۇندىستاننان 2016 جىلدىڭ قىركۇيەك, قاراشا ايلارىندا كەلىپتى. استاناعا كەلگەندەرىنە از بولسا دا, قالاعا ۇيرەنىپ, تانىپ-ءبىلىپ قالعان ەكەن. قازاق دوستارى دا كوپ كورىنەدى. ۋنيۆەرسيتەتتىڭ 2-كۋرس ستۋدەنتى يوگەش كۋماۆات:
– ەلورداعا وقۋ ءۇشىن كەلدىم. استانا مەديتسينا ۋنيۆەرسيتەتىندە جالپى مەديتسينا ماماندىعىندا وقيمىن. جوعارى وقۋ ورنىنا تۇسەتىن كەزدە استانانى ءوزىم تاڭدادىم. الەۋمەتتىك جەلىدەن اسەم قالانى كورىپ, تاڭعالدىم. ەڭ العاش كەلگەنىمدە, كۋرستاستارىم مەنى جىلى قارسى الدى. اڭگىمەگە تارتىپ, سويلەسكىلەرى كەلدى. بىراق ەركىن ءتىل تابىسىپ كەتۋ ماعان قيىندىق تۋعىزدى. قازىر قازاق ءتىلىن ۇيرەنىپ جاتىرمىن, وزىمە قازاقشا سويلەگەن ۇنايدى. قازاقتار باۋىرمال, دوستىققا بەرىك حالىق ەكەن. سالت-ءداستۇردى, ادەت-عۇرىپتى ۇستاناتىن دوستارىمدا قوناقتا بولدىم. قازاقتىڭ ۇلتتىق تاعامدارى – ەت, ناۋرىز كوجە, باۋىرساقتىڭ ءدامىن ەش ۇمىتپاسپىن, – دەدى.
ال گحاشنايام چودحاري وسى قالانى تاڭداپ, ءبىلىم الىپ جاتقانىنا ەش وكىنبەيتىنىن ايتادى. تيمۋر ەسىمدى دوسىنىڭ ارقاسىندا باسقا بالالارمەن تانىسىپ, ورتاعا ۇيرەنىسىپ قالعان ەكەن. «ولار مەنى وزگە ۇلت دەپ بولمەدى. ارالارىنا قوسىپ, باۋىرمالدىق تانىتتى. ءتىلدى دە ۇيرەنۋگە كومەكتەسەدى» دەيدى ول. «استانا ساعان نەسىمەن كورىكتى؟» دەپ سۇراعانىمدا «تۇنگى استانا وتە ادەمى. «حان شاتىر», «ءبايتەرەك» سياقتى عيماراتتار ەرەكشە كوزگە تۇسەدى» دەپ جاۋاپ بەردى.
– ناۋرىز مەيرامىن دۋمانداتىپ تويلاپ جۇرگەندە, اقجاۋلىقتى اپا ماعان ءوز باتاسىن بەردى. مەن دە قاراپ قالماي, العىسىمدى ءبىلدىرىپ, ول كىسىگە تاتتىلەردى ۇسىندىم. سالت-داستۇرلەردىڭ بىرازىمەن تانىسىپ ۇلگەردىم. تۇساۋكەسەر سالتى قاتتى ۇنادى. ەندى عانا ءجۇرىپ كەلە جاتقان بالاعا اق جول تىلەۋ, الداعى ۋاقىتتا الدىندا ەشقانداي كەدەرگىگە تاپ بولماسىن دەگەندەي تىلەك ءتىلەۋ كەرەمەت ەكەن, – دەپ ءسوزىن تۇيىندەدى ول.
وزگە ۇلت وكىلدەرىمەن تىلدەسكەندە ءبىر بايقاعانىم, قازاق مادەنيەتىنە, سالت-داستۇرگە, تىلگە قاتتى قىزىعادى ەكەن. قازاق ءتىلى – باي, ءيىرىمدى ءتىل. ناقىشىنا كەلتىرىپ سويلەسەڭ, وتە عاجاپ ءتىل. «باسقا ۇلتپىن, قازاق ەمەسپىن» دەمەي, قازاقستاندا تۇرىپ, ەلدى, ءتىلدى قۇرمەتتەپ جاتقانىنا ريزا بولدىم.
ايدانا جانعابىلوۆا,
№68 ورتا مەكتەپتىڭ
11-سىنىپ وقۋشىسى
