ە.راحماديەۆ اتىنداعى مەملەكەتتىك اكادەميالىق فيلارمونياسىندا وسى ونەر ۇجىمىنىڭ «سارىارقا» فولكلورلىق ءانسامبلىنىڭ كونتسەرتمەيستەرى, رەسپۋبليكالىق جانە حالىقارالىق بايقاۋلاردىڭ لاۋرەاتى, كومپوزيتور, دومبىراشى ەرجان توقسابانوۆتىڭ «ەرجاننىڭ توكپەسى» كونتسەرتى ءوتتى.
ەرجان توقسابانوۆتىڭ ورىنداۋشىلىق شەبەرلىگى قازاق ۇلتتىق ونەر ۋنيۆەرسيتەتىندە وقىپ جۇرگەن كەزىندە-اق جوعارى باعالاندى. دارىندى مۋزىكانت نۇرعيسا تىلەنديەۆ اتىنداعى جانە ەسىر ايشۋاقۇلى اتىنداعى رەسپۋبليكالىق بايقاۋلاردا توپ جاردى. ونىڭ تالانتى كۇيشى-ۇستاز, فولكلورتانۋشى, قازاقستاننىڭ ەڭبەك سىڭىرگەن قايراتكەرى ايتجان توقتاعاننىڭ «سەرپەر» دومبىراشىلار انسامبلىندە كەڭ كولەمدە اشىلدى.
«ەرجاننىڭ توكپەسى» كەشى كومپوزيتور شىعارماسىنىڭ اتىمەن اتالادى. بۇل – «سارىارقا» ءانسامبلىنىڭ العاشقى كوركەمدىك جەتەكشىسى نۇرلان ءحامزيننىڭ جوعارى باعاسىنا يە بولعان اۆتوردىڭ العاشقى شىعارماسى. سودان بەرى ەرجان توقسابانوۆ كوپتەگەن كۇي جازدى.
«سارىارقا» ءانسامبلىنىڭ كوركەمدىك جەتەكشىسى, مادەنيەت سالاسىنىڭ ۇزدىگى توعجان ءجاحيننىڭ ايتۋىنشا, ەرجان توقسابانوۆ – ۇجىمنىڭ جان-جاقتى شىعارماشىل تۇلعاسى. «ونىڭ شىعارمالارى ءوز مادەنيەتىنە, سالت-ءداستۇرى مەن تاريحىنا دەگەن شىنايى سۇيىسپەنشىلىككە تولى. ەرجان توقسابانوۆتىڭ كوپتەگەن شىعارمالارىنا رۋحاني اۋەزدىلىك, تەمپەرامەنت جانە نازىك ليريكا ءتان. مەنىڭ سۇيىكتى تۋىندىم – «بالا ەرتىس» شىعارماسى. وندا التاي ولكەسىنىڭ تابيعاتىن, باتىرلارىمىزدىڭ شىنايى رۋحىن, قازاق قىزدارىنىڭ سىمباتىن بەينەلەيتىن بەينەلەردى كورەمىن. ەرجان توقسابانوۆتىڭ «سىر تولعاۋ», «وسپان باتىر», «تۇعىرلى ەل», «قۇلاندار», «زامان-اي», «ورتەكە», «ەرجاننىڭ توكپەسى» سياقتى شىعارمالارى ەلىمىزدىڭ فولكلورلىق-ەتنوگرافيالىق انسامبلدەرىنىڭ رەپەرتۋارىنا ەنەتىنىنە سەنىمدىمىن».
«ەرجاننىڭ توكپەسى» كونتسەرتى ەرجان توكسابانوۆتىڭ جان-جاقتى شىعارماشىلىعىمەن قاتار پەداگوگيكالىق قىرىن دا اشتى. كونتسەرتتە ونىڭ شاكىرتتەرى – «دارىن» دومبىراشىلار ءانسامبلى ونەر كورسەتتى.
كەش بارىسىندا ەرجان توقسابانوۆتىڭ «بالا ەرتىس», «سىر تولعاۋ», «قامىس سامار», «جەلدىرمە», ەسىردىڭ «اقجارما», قازانعاپتىڭ «35 جاسار بالجان ايەل», وسكەنبايدىڭ «بۇلبۇل اقجەلەڭ», تۇركەشتىڭ «بايجۇما», قۇرمانعازىنىڭ «تەرىسقاقپاي» شىعارمالارى ورىندالدى. «سارىارقا» فولكلورلىق ءانسامبلى, «سەرپەر» (كوركەمدىك جەتەكشىسى – بەكايدار قاليەۆ) جانە «دارىن» (كوركەمدىك جەتەكشىسى – ەرجان توقسابانوۆ) دومبىراشىلار انسامبلدەرى, «شالقىما» حالىق بي ءانسامبلى (كوركەمدىك جەتەكشىسى – «قۇرمەت» وردەنىنىڭ يەگەرى, مادەنيەت قايراتكەرى ءابدىراسۋل ەسەكەەۆ) قاتىستى.
