كەشە استانادا توعىزقۇمالاقتان ءىV الەم چەمپيوناتى باستالدى. قىركۇيەكتىڭ 8-ىنە دەيىن جالعاساتىن حالىقارالىق تۋرنيرگە الەمنىڭ 25 ەلىنەن 70-تەن استام سپورتشى قاتىسىپ جاتىر.
الەمدىك دەڭگەيدەگى ءىرى جارىستى دۇنيەجۇزىلىك توعىزقۇمالاق فەدەراتسياسى, قر مادەنيەت جانە سپورت مينيسترلىگى جانە استانا قالاسى اكىمدىگى بىرلەسىپ ۇيىمداستىردى. فەدەراتسيانىڭ پرەزيدەنتى ءاليحان بايمەنوۆتىڭ ايتۋىنشا, توعىزقۇمالاق ادامزات وركەنيەتى مەن ۇلت مادەنيەتىنىڭ دامۋىنا ايرىقشا ۇلەس قوسقان. سوندىقتان دا ول ۇلتتىق ويىندى دامىتىپ, حالىقارالىق دارەجەگە كوتەرۋ ءۇشىن قىرۋار جۇمىس جاسالعانىن تىلگە تيەك ەتتى.
– زياتكەرلىك ويىندار – ۇزدىكتەردى انىقتايتىن سپورتتىق جارىس ءتۇرى عانا ەمەس, وسكەلەڭ ۇرپاق تاربيەسىندە, ۇلتتاردىڭ ينتەللەكتۋالدىق الەۋەتىن كوتەرۋدە ەرەكشە فەنومەن. ويتكەنى جۇيەلى جانە قيسىندى ويلاۋ, ءبىلىم مەن عىلىمعا بەيىمدىلىك نەگىزدەرىن قالاۋدا ءارى ىجداھاتتىلىق پەن تاباندىلىققا تاربيەلەۋدە توعىزقۇمالاق سەكىلدى زياتكەرلىك ويىندار تاپتىرماس تاربيە قۇرالى, – دەدى ول.
ونىڭ ايتۋىنشا, توعىزقۇمالاققا دەگەن قىزىعۋشىلىق جىلدان-جىلعا ارتىپ كەلە جاتىر. ماسەلەن, بيىلعى چەمپيوناتقا اۆستريا, كامەرۋن, پولشا, ۋكراينا سىندى ەلدەر تۇڭعىش رەت قاتىسىپ وتىر.
سەرىك جولداسباي
