كەشە ورتالىق كوممۋنيكاتسيالار قىزمەتىنە استانا قالاسى ىشكى ساياسات باسقارماسىنىڭ جەتەكشىسى بولات تىلەپوۆ قاتىسىپ, جۋرناليستەرمەن كەزدەسۋ وتكىزدى. ول الدا كەلە جاتقان استانا كۇنىنە وراي ۇيىمداستىرىلاتىن ءىس-شارالار تۋرالى كەڭىنەن اڭگىمەلەپ, توسىن سىيلارعا تولى مەرەكەلىك باعدارلامالاردىڭ تۇرعىندار ءۇشىن ماڭىزى زور ەكەنىن ايتتى.
«بۇگىندە استانا – جاي عانا ەلوردا ەمەس. شىن مانىندە, ول – تاۋەلسىز مەملەكەتىمىزگە ءتان ۇلتتىق يدەيانىڭ ەڭ باستى تۇعىرلارىنىڭ ءبىرى. سوندىقتان, «استانا كۇنى» دەگەندە ءبىز ەلوردانىڭ تاريحي جولىنان بۇرىن باس قالانىڭ ەل دامۋىنداعى ورنى مەن مەملەكەتىمىزدىڭ ءبىرتۇتاس بولۋىنداعى رولىنە نازار اۋدارۋىمىز كەرەك. ولاي بولسا, ەلوردا كۇنىن اتاپ وتۋدە ۇيىمداستىرۋشىلار ۇسىنىپ وتىرعان ءار ءىس-شارانىڭ مەرەكەلىك مازمۇنىنان باسقا ولاردىڭ يدەولوگيالىق ماڭىزى قۇندى بولماق» دەدى بولات اناپياۇلى.
سونىمەن قاتار, ول استانا كۇنىندە جىلدا ەل كوڭىلىنەن شىعىپ جۇرگەن ءداستۇرلى ءىس-شارالاردان بولەك, باعىتى جاڭا, مازمۇنى تىڭ مەرەكەلىك باستامالاردىڭ بار ەكەنىن تىلگە تيەك ەتتى. باسقارما جەتەكشىسىنىڭ ايتۋىنشا, استانانىڭ تويىنا جالپى سانى 70-كە جۋىق ءتۇرلى شارالار جوسپارلانىپ وتىر. قالا كۇنىنە وراي «ايالاعان استانا» رەسپۋبليكالىق تەلەۆيزيالىق بالالار بايقاۋى, جىل سايىنعى تەاتر فەستيۆالى, «ماڭگىلىك ەل» تاقىرىبىنداعى رەسپۋبليكالىق ءمۇشايرا جانە وتاندىق ورىنداۋشىلاردىڭ قاتىسۋىمەن وتەتىن «استاناعا تارتۋ», «ءان جۇرەگىم استانا!» كونتسەرتتىك باعدارلامالارى ۇيىمداستىرىلادى. «قازاق ەلى» مونۋمەنتى الاڭىنداعى «شۋاقتى قالا» كونتسەرتى دە كوپشىلىك كوڭىلىنەن شىعادى دەپ كۇتىلۋدە. بولات تىلەپوۆ وسىلاردىڭ ءبارىن تىزە كەلە اسپازدىق جانە تاعام فەستيۆالى, پوەزيا جانە كىتاپ مەرەكەسى سياقتى تاعى دا باسقا جاستارعا ارنالعان باعدارلامالاردىڭ بولاتىنىن ايتتى. جيىن بارىسىندا بولات تىلەپوۆ «مەرەكەلىك شارالاردىڭ اياسىندا قالا تۇرعىندارىنىڭ ەركىن قىدىرۋىنا قولايلى جاعداي جاسالادى. مەرەكەلىك باعدارلامالار وتەتىن بارلىق الاڭدا ساۋدا-ساتتىق جانە قولونەر بۇيىمدارىنىڭ كورمەسى وتەدى. ارينە, مۇنىڭ ءبارى مەرەكەلەي كەلگەن كورەرمەندەرگە تاماشا كوڭىل-كۇي سىيلاۋ ءۇشىن جاسالىپ وتىر. دەسەك تە, استانا كۇنىن دۋمانداتىپ قانا وتكىزۋگە بولمايدى. مەيرام اياسىندا ءار ادامنىڭ جايلى ءومىر ءسۇرۋىن قامتاماسىز ەتۋ ءۇشىن تۇرعىن ءۇي, اۋلاارالىق اۋماق, كىرەبەرىس جولدارىن اباتتاندىرۋ سياقتى بارلىق شارۋاشىلىق جۇمىستار جاسالادى» دەپ, الەۋمەتتىك جاعدايلاردىڭ شەشىلۋى دە مەرەكە قارساڭىندا تۇرعىنداردىڭ قۋانىشىنا سەپ بولادى دەگەن ءوز ويىن ءبىلدىردى.
نۇريسلام قۇسپانعالي
