ەلوردادا تانىمال رەجيسسەر اقان ساتاەۆتىڭ «توميريس» تاريحي كينو تۋىندىسىنىڭ تانىستىرىلىمى ءوتتى.
تاريحي كينوتۋىندىنى قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى جانە «Sataifilm» كومپانياسى بىرلەسە تۇسىرگەن, باس پروديۋسەرى – ءاليا نازارباەۆا. كينوتۋىندى ءبىزدىڭ زامانىمىزعا دەيىنگى VI عاسىردا بولعان وقيعانى سۋرەتتەيدى. كەيىپكەرلەر كونە تۇركى تىلىندە, ال پارسى پاتشاسى كير كونە پارسى تىلىندە سويلەيدى. ءتوميريستىڭ رولىنە كوپتەگەن ۇمىتكەرلەردىڭ اراسىنان الميرا تۇرسىن بەكىتىلسە, 15 جاستاعى ءرولىن سالتانات سەركەباەۆا, ال 10 جاسار باستى كەيىپكەردى ليا فومينا سومدادى. ال باستى رولدەردى ەلىمىزدىڭ تانىمال كينو جۇلدىزدارى اسىلحان تولەپوۆ, بەرىك ايتجانوۆ, ازامات ساتىبالدى, ءادىل احمەتوۆ, كامشات جولدىباەۆا, عاسان ماسۋد, ايان وتەپبەرگەن, مۇرات بيسەنبين سومدادى. كيردىڭ رولىنە ريدلي سكوتتىڭ «تسارستۆو نەبەسنوە» فيلمىندە سالادين پاتشانىڭ ءرولى ارقىلى تانىلعان گولليۆۋد اكتەرى گاسان ماسۋد شاقىرىلعان. ءفيلمنىڭ ءتۇسىرىلىم جۇمىستارى قازاقستاننىڭ كوركەم جەرلەرىندە الماتى وبلىسى زارەچنىي اۋىلى, جاركەنت, شونجى, بۋراباي مەن باياناۋىلدا جۇرگىزىلدى.
«ءبىزدىڭ باستى ماقساتىمىز – تاريحتىڭ قىر-سىرىن مەيلىنشە كەڭىرەك كورسەتۋ. ياعني ءبىزدىڭ داۋىرىمىزگە دەيىنگى V – VI عاسىردا ورتالىق ازيادا تۇرىپ جاتقان ساقتاردىڭ, ماسساگەتتەردىڭ, سونداي-اق باسقا دا تايپالاردىڭ تۇرمىس-تىرشىلىگىن, سوعىسىن جانە ونەرىن, سول سياقتى قازاق حالقىنىڭ, مادەنيەتىنىڭ مىڭداعان عاسىرلىق تاريحى بارىن كورسەتۋ. بۇل جوبادا ءبىز ەكى جىل كولەمىندە تەر توكتىك. اڭىزعا اينالعان توميريستىڭ تاعدىرى ءبىزدىڭ كورەرمەندەرىمىزگە عانا ەمەس, شەتەلدىكتەرگەدە قىزىق بولادى دەپ سەنەمىن» دەدى اقان ساتاەۆ.
جادىرا مۇراتبەكوۆا
