استاناداعى «باستاۋ» سپورت كەشەنىندە قازاق كۇرەسىنەن ۇلتتىق قۇراما بالۋاندارى باق وكىلدەرىنە شەبەرلىك ساباعىن وتكىزدى.
27-29 قازان كۇندەرى استانادا وتەتىن Qazaq Kuresi World Championship بايراقتى باسەكەسىنە جاتتىعىپ جاتقان بالۋاندار شارا بارىسىندا جامباس, شالۋ, كەۋدەدەن اسىرىپ لاقتىرۋ, ارقاعا سالىپ لاقتىرۋ سياقتى قازاق كۇرەسىنىڭ ءادىس-تاسىلدەرىنەن ونەر كورسەتتى. 9 سالماق دارەجەسى بويىنشا وتەتىن اقش, قىتاي, رەسەي, بەلگيا سياقتى الەمنىڭ قىرىق ەلدىڭ كىل مىقتىلارى باق سىنايتىن بايراقتى باسەكەدە ايبەك نۇعىماروۆ, مۇحيت تۇرسىنوۆ, رۋسلان ابدىرازاقوۆ, الەكساندر كوساچەۆ سىندى بالۋاندار ەلىمىزدىڭ نامىسىن قورعاماق. حالىقارالىق قازاق كۇرەسى فەدەراتسياسىنىڭ كەڭەسشىسى ۇلان رىسقۇلدىڭ ايتۋىنشا, چەمپيوناتقا قاتىساتىن بالۋانداردىڭ دايىندىعى ءوز دەڭگەيىندە. بەلدەسۋلەرگە شەتەلدىك تورەشىلەر دە تورەلىك جاساماق.
جاقىندا عانا «الەم بارىسى» اتانعان ايبەك نۇعىماروۆ وسى جولعى چەمپيوناتتىڭ دا ءجونى بولەك ەكەنىن ايتادى.
– موڭعول, ورىس, وزبەك, تاجىك بالۋاندارى مىقتى قارسىلاس بولۋى مۇمكىن. الايدا ءار سپورتشىنىڭ ماقساتى – جەڭىسكە جەتۋ. سوندىقتان ءوز جەرىمىزدە وتەتىن چەمپيوناتتا جاسىنداي جارقىلداپ, جەڭىستى قولدان بەرمەۋگە تىرىسامىز, – دەيدى بالۋان.
