ەلوردادا الەۋمەتتىك از قامتىلعان وتباسىلاردان شىققان وقۋشىلار رەسەيدەن كەلگەن قۋىرشاق تەاترىنىڭ قويىلىمىن تەگىن تاماشالادى. قازاقستان تاۋەلسىزدىگىنىڭ 30 جىلدىعىنا ارنالعان تەاترلار فەستيۆالى اياسىندا س.وبرازتسوۆ اتىنداعى مەملەكەتتىك اكادەميالىق ورتالىق قۋىرشاق تەاترى «تۇراندوت» سپەكتاكلىن ساحنالادى.
«تۇراندوت» ەرتەگىسى رەسەيدىڭ ەڭبەك سىڭىرگەن ونەر قايراتكەرى, «التىن ماسكا» ۇلتتىق تەاتر سىيلىعىنىڭ لاۋرەاتى, رەجيسسەر بوريس كونستانتينوۆتىڭ اۆتورلىق نۇسقاسىندا قويىلدى. سپەكتاكلدە ەكى الەم قاقتىعىسادى – كلاسسيكالىق قىتاي مەن رومانتيكالىق ۆەنەتسيا. ساحنادا قاتىگەز سۇلۋ تۇراندوت پەن حانزادا كالافتىڭ ماحابباتى باياندالادى. سول سياقتى ۆەنەتسيانىڭ كوپىرىن, سۋعا شاعىلىسقان ايدىڭ ساۋلەسىن, سىڭعىرلاعان قوڭىراۋدى, سۋ بەتىندە جۇزگەن قايىقتاردى كورۋگە بولادى. ونىڭ جەلىسى كىمدى بولسىن بەي-جاي قالدىرمايدى.
«تۇراندوت» سپەكتاكلى – ەرەسەكتەرگە ارنالعان ەرتەگى. بۇل – اقىلى تاياز ەر ادامداردىڭ باسىن العان حانشايىم جايلى. بىراق ەرتەگى جەلىسى بويىنشا جاعدايدىڭ ءبارىن تۇزەتەتىن اقساقال شىعادى جانە ول ونىڭ ايەلىنە اينالادى» دەدى س.وبرازتسوۆا اتىنداعى مەملەكەتتىك اكادەميالىق ورتالىق قۋىرشاق تەاترىنىڭ باس رەجيسسەرى بوريس كونستانتينوۆ.
رەسەيلىك قوناقتار قازاقستاننىڭ قوناقجايلىعىن ەرەكشە اتاپ ءوتىپ, الداعى ۋاقىتتا نۇر-سۇلتانعا تاعى كەلەتىنىن جەتكىزدى.
