ەلوردانىڭ ە.راحماديەۆ اتىنداعى مەملەكەتتىك اكادەميالىق فيلارمونياسىنىڭ كامەرالىق حورى «استانا وپەرا» تەاترىندا «تال بەسىكتەن – جەر بەسىككە» اتتى جاڭا فورماتتاعى تەاترلاندىرىلعان ساحنالىق قويىلىمىن ۇسىندى. كامەرالىق حوردىڭ كوركەمدىك جەتەكشىسى-باس ديريجەرى, قازاقستاننىڭ ەڭبەك سىڭىرگەن قايراتكەرى گۇلميرا قۇتتىباداموۆا.
كەش بارىسىندا نارەستەنىڭ دۇنيە ەسىگىن اشقان كۇننەن باستاپ, ادامنىڭ ءوسىپ, ازامات بولۋى, قارتتىققا دەيىنگى ساتتەر اسەم ءان مەن ۇيلەسىمدى ارەكەت ارقىلى باياندالىپ, تەاترلاندىرىلعان كورىنىس ارقىلى كورسەتىلدى. حور ۇجىمى ءان ايتىپ, ولەڭ وقي ءجۇرىپ, «بەسىككە سالۋ», «تۇساۋ كەسۋ», «سىرعا سالۋ», «سىڭسۋ», «جار-جار», «توي باستار» سياقتى قازاق حالقىنىڭ سالت-داستۇرلەرىن پاش ەتتى.
كەشتە فيلارمونيانىڭ كامەرالىق حورىمەن قاتار «سارىارقا» ءانسامبلى, «حالىق ءانى» ءبولىمىنىڭ ارتىستەرى ونەر كورسەتتى. «بەسىك جىرى», «احاۋ, كەرىم», «بالاپان قاز», «ءشيلى وزەن» سەكىلدى حالىق اندەرى, اباي قۇنانبايۇلىنىڭ «قاراڭعى تۇندە تاۋ قالعىپ», ءبىرجان سالدىڭ «تەمىرتاس», ساكەن سەيفۋليننىڭ «تاۋ ىشىندە», احمەت جۇبانوۆتىڭ «قارلىعاش», باقىتجان بايقاداموۆتىڭ «ون التى قىز» سىندى اندەرىمەن قاتار قۇرمانعازى مەن ماحامبەتتىڭ كۇيلەرى ورىندالدى.
بايان اسىلبەكوۆا
