تۇراقتى ەنەرگەتيكانى قالىپتاستىرۋدىڭ جولى
سەيسەنبى كۇنى تاۋەلسىزدىك سارايىندا ءداستۇرلى KAZENERGY ەۋرازيالىق فورۋمى باستالدى. بيىل جەتىنشى رەت ۇيىمداستىرىلعان اۋقىمدى شاراعا الەمنىڭ 50-گە جۋىق ەلىنەن بەلگىلى ساياساتتانۋشىلار, ءىرى كومپانيالار باسشىلارى مەن حالىقارالىق ساراپشىلار قاتىسىپ, ەنەرگەتيكا سالاسىنىڭ بۇگىنى مەن بولاشاعى جونىندە وي-پىكىرلەرىن ورتاعا سالدى.
«وزگەرىستەر تورابىنداعى الەم: تۇراقتى ەنەرگەتيكالىق بولاشاقتى قالىپتاستىرۋ» تاقىرىبىندا وتكەن ەۋرازيالىق فورۋمدا يسپانيانىڭ ەكس-پرەمەرى حوسە ماريا ازنار, بولگاريانىڭ ەكس-پرەزيدەنتى پەترو ستويانوۆ, بۇكىلالەمدىك مۇناي كەڭەسىنىڭ پرەزيدەنتى رەناتو بەرتاني سىندى دۇنيەجۇزىلىك بەدەلدى تۇلعالار ءسوز سويلەپ, فورۋمعا «ەنەرگەتيكا سالاسىنداعى اسا ماڭىزدى حالىقارالىق وقيعا» دەگەن باعا بەرىپ, ونىڭ الەمدىك جانە وڭىرلىك قاۋىپسىزدىكتى ساقتاۋداعى رولىنە كەڭىنەن توقتالدى.
كەزەكتى فورۋمنىڭ اشىلۋىمەن قاتىسۋشىلاردى قۇتتىقتاعان ەلىمىزدىڭ پرەمەر-ءمينيسترى سەرىك احمەتوۆ:
– بۇگىندە KAZENERGY فورۋمى قازاقستاندىق جانە الەمدىك ەنەرگەتيكانىڭ وزەكتى ماسەلەلەرى تالقىلاناتىن نەگىزگى حالىقارالىق الاڭعا اينالىپ كەلەدى. بۇعان دەيىن وتكەن ماجىلىستەر وسى ءىس-شارانىڭ تيىمدىلىگىن كورسەتتى. مەملەكەت پەن بيزنەس اراسىنداعى بايلانىس كۇشەيىپ, قازاقستاننىڭ مۇناي-گاز كەشەنىن تۇراقتى دامىتۋعا قاجەتتى العىشارتتار جاسالدى. ەندىگى فورۋم جاھاندىق ەنەرگەتيكالىق قاۋىپسىزدىكتى قامتاماسىز ەتۋدىڭ بىرىڭعاي جانە دەر كەزىندەگى قاعيداتتاردى قۇرۋعا ىقپال ەتەتىنىنە سەنىمدىمىن, – دەپ اتاپ ءوتتى.
ال حالىقارالىق ەنەرگەتيكالىق ستراتەگياسىندا باتىس پەن شىعىس اراسىنداعى بايلانىس كوپىرى بولىپ وتىرعان قازاقستاننىڭ ءرولىن اڭگىمەلەگەن قر مۇناي جانە گاز ءمينيسترى ساۋات مىڭباەۆ ەل مۇنايىن ەكسپورتقا شىعارۋ ماسەلەلەرىنە توقتالا كەلە «ءبىز 2012 جىلى 29 ملن توننا قازاقستاندىق مۇنايدى تاسىمالداۋعا نيەتتەنىپ وتىرمىز. بۇگىندە وسى سالانى كەڭەيتۋ بويىنشا جوبا جۇزەگە اسىرىلۋدا. ونىڭ ءۇش كەزەڭى بار. ءۇشىنشى كەزەڭنىڭ سوڭى 2015 جىلى اياقتالماق. جۇمىسىمىز ۋاقىتىلى ءجۇرىپ جاتىر. بۇل جوبا جىلىنا 52 ملن توننا مۇناي تاسىمالداۋعا مۇمكىندىك بەرمەك», – دەگەن دەرەك كەلتىردى.
ەكى كۇنگە سوزىلعان VII ەۋرازيالىق فورۋم اياسىندا دۇنيەجۇزىلىك مۇناي قورىنىڭ (WPC) وتىرىسى ءوتتى.
سونىمەن قاتار دوڭگەلەك ۇستەل جيىندارى دا وتكىزىلىپ, وندا ەنەرگەتيكا سالاسىن باسقارۋشى مامانداردى دايارلاۋدىڭ سان قىرى تالقىعا سالىنىپ, الەمدىك وزىق تاجىريبەلەر تانىستىرىلدى.
قىمبات نۇرعالي