قازاقستان حالقى اسسامبلەياسىنىڭ توراعاسى نۇرسۇلتان نازارباەۆ جانسەيىت تۇيمەباەۆتى قابىلدادى. كەزدەسۋدە قازاقستان حالقى اسسامبلەياسى مەن وڭىرلەردەگى دوستىق ۇيلەرىنىڭ قازىرگى قىزمەتى جايلى اقپارات بەرىلدى. ەلباسى قازاقستانداعى ازەربايجان مەن ارميان دياسپورالارىنىڭ تاۋلى قاراباحتاعى اسكەري ءىس-ارەكەتتەردى توقتاتۋ جونىندەگى بىرلەسكەن ۇندەۋىن قولدادى. تۇڭعىش پرەزيدەنت قاقتىعىستىڭ ۋشىعۋىنا الاڭداۋشىلىق ءبىلدىرىپ, قازاقستان ءۇشىن دوس مەملەكەتتەر اراسىندا كەلىسسوزدەردى باستاۋدىڭ ماڭىزدىلىعىن اتاپ ءوتتى. بۇل وڭىردەگى جاعدايدى تەزىرەك تۇراقتاندىرۋعا سەپتىگىن تيگىزەدى.
قازاقستان حالقى اسسامبلەياسىنىڭ توراعاسى تاۋەلسىزدىك العان كۇننەن باستاپ حالىقتىڭ بىرلىگى, قوعامداعى تۇراقتىلىق پەن كەلىسىم ەلىمىزدىڭ باستى قۇندىلىعى بولعانىن ايتتى. وسى ورايدا بيىل 25 جىلدىعىن اتاپ ءوتىپ جاتقان قحا-نىڭ ايرىقشا رولىنە توقتالدى.
ءوز كەزەگىندە قازاقستان حالقى اسسامبلەياسى توراعاسىنىڭ ورىنباسارى ج.تۇيمەباەۆ ەلباسىنا ەتنوسارالىق قاتىناستار سالاسىنداعى مەملەكەتتىك باسقارۋدى رەفورمالاۋدىڭ جانە تالداۋ جۇمىستارىنىڭ ناتيجەلەرى تۋرالى باياندادى. الەۋمەتتىك زەرتتەۋلەردىڭ سوڭعى مالىمەتتەرىنە سايكەس, قازاقستان حالقىنىڭ 92,4 پايىزى ەتنوسارالىق احۋالدى قولايلى جانە تۇراقتى دەپ باعالاعان, ال 89,2 پايىزى مەملەكەتتىڭ ەلدەگى ەتنوسارالىق كەلىسىمدى ساقتاۋ جونىندەگى ءىس-ارەكەتتەرىن قولداپ وتىر.
سونداي-اق قاۋىپسىزدىك كەڭەسىنىڭ توراعاسى نۇرسۇلتان نازارباەۆ ىشكى ىستەر ءمينيسترى ەرلان تۇرعىمباەۆپەن كەزدەستى. كەزدەسۋدە كارانتين كەزەڭىندە ەلدە قۇقىقتىق ءتارتىپتى قامتاماسىز ەتۋ بويىنشا قابىلدانعان شارالار, سونداي-اق جەكە قۇرامدى ەپيدەميادان قورعاۋ جونىندە مالىمەت بەرىلدى. نۇرسۇلتان نازارباەۆقا ىشكى ىستەر ورگاندارىنىڭ حالىقپەن ءوزارا ءىس-قيمىلىن جاقسارتۋ, ولاردىڭ جۇمىسىنىڭ اشىقتىعىن قامتاماسىز ەتۋ بويىنشا جۇرگىزىلىپ جاتقان جۇمىستار تۋرالى اقپارات ۇسىنىلدى.
