ب.مومىشۇلى داڭعىلىنداعى بىرنەشە ءۇيدىڭ اۋلاسىندا بالالاردىڭ ويىن الاڭدارى بولمادى. ماسەلە جىلدار بويى شەشىلمەي كەلە جاتقاندىقتان, تۇرعىندارعا قالالىق ءماسليحات دەپۋتاتى گايدار قاسەنوۆتىڭ كومەگىنە جۇگىنۋگە ءماجبۇر بولدى.
«الماتى اۋدانى اكىمدىگىنىڭ قولداۋىمەن بيىل ب.مومىشۇلى, 10/1, 10/2 ۇيلەردىڭ اۋلاسىندا جوندەۋ جۇمىستارى جۇرگىزىلىپ, بالالاردىڭ ويىن الاڭدارى سالىندى. تاعى ءۇش مەكەنجايدا كوشە ترەناجەرلەرى ورناتىلدى. ر.قوشقارباەۆ, 40-ءۇيدىڭ اۋلاسىندا فۋتبول الاڭى پايدا بولدى» دەيدى دەپۋتات.
وتكەن جىلدىڭ قىركۇيەگىندە دەپۋتاتقا بالبىراۋىن جانە بالقانتاۋ كوشەلەرىنە اسفالت توسەۋ بويىنشا ءوتىنىش كەلىپ ءتۇستى. بۇل ماسەلە دە شەشىمىن تاۋىپتى. «وسى كوشەلەردىڭ اۋماعىندا قوناقۇي تۇر. ونىڭ يەلەرى كولىك جۇرەتىن جولعا قورشاۋ ورناتىپ تاستاپ, اسفالت توسەۋگە كەدەرگى كەلتىردى. اۆتوموبيل جولدارى باسقارماسىنىڭ وكىلدەرىمەن كەزدەسكەننەن كەيىن قورشاۋ جىلجىتىلدى» دەيدى گ.قاسەنوۆ.
تۇرعىنداردىڭ ءبىر «باس اۋرۋى» اۋلالاردا كولىكتى قاڭتاراتىن ورىن بولىپ وتىرعانى جاسىرىن ەمەس. حالىقتى ويلاماي, كولىكتى كەز كەلگەن ورىنعا قويا سالۋ ءجيى كەزدەسەدى. «جانۇيا سەرۆيس» پيك ءتورايىمى ءامينا بەكباسوۆانىڭ ايتۋىنشا, وسى سەبەپتەن ىشكى اۋلالىق اۋماقتىڭ سانيتارلىق جاعدايىنا نۇقسان كەلۋدە. ءتىپتى قارتتار مەن بالالاردىڭ ومىرىنە قاۋىپ تونە باستادى. «اۋلالاردى اباتتاندىرعاندا بارشا تۇرعىندارعا جايلى بولۋىن ويلاۋ كەرەك» دەيدى ول. وسى جاعدايمەن دە دەپۋتاتقا كوپ شاعىم تۇسەدى ەكەن. پيك ءتورايىمىنىڭ سوزىنشە, دەپۋتاتپەن كەزدەسكەن سوڭ ا.بايتۇرسىنوۆ كوشەسىندە جولدىڭ قۇرىلىسى ماسەلەسى شەشىلدى. الايدا ءالى كەيبىر كوشەلەر مەن اۆتوبۋس ايالدامالارىن جارىقتاندىرۋ ماسەلەسى كەزەكتە تۇر.
«ايا» پيك-ىنەن دەپۋتاتقا كولىكتەر جۇرەتىن جولداردا يەسى جوق قۇدىقتار جايلى شاعىم ءتۇستى. گ.قاسەنوۆ بۇل ماسەلەنى باقىلاۋعا الۋعا ۋادە بەردى.
