استانا قالاسى ءماسليحاتىنىڭ دەپۋتاتى باۋىرجان سمايىلوۆ ءوز سايلاۋ وكرۋگىنىڭ ازاماتتارىن قابىلدادى. تۇرعىندار تاراپىنان جەكە سيپاتتاعى جانە سارىارقا اۋدانىڭ تىنىس-تىرشىلىگىنە قاتىستى ماسەلەلەر كوتەرىلدى.
سونىڭ ىشىندە جالعىزباستى زەينەتكەرلەر باسپاناعا يە بولۋى ءۇشىن ولاردى جەكە ساناتقا بولۋگە سەپتەسۋدى سۇرادى. كوتەرىلگەن ماسەلەلەردىڭ قاتارىندا ينتەرنەت پەن كوشەدەگى بەينەباقىلاۋ كامەرالارى جۇمىسىنا بايلانىستى «كوكتال-1» تۇرعىن الابىنىڭ تۇرعىنى 2021 جىلدان بەرى كامەرالار جانە ءالسىز ينتەرنەت جايلى ماسەلەنى كوتەرىپ كەلە جاتقانىن اتاپ ءوتتى. وعان ءماسليحات دەپۋتاتى بۇل ماسەلەگە قاتىستى جاۋاپتى باسقارما وكىلىن شاقىرىپ, تىڭداۋدى ۇسىندى. وتكەن جىلى «كوكتال-1»-دە 34 كامەرا ورناتىلعانىن, بۇل ماسەلەنى ەرەكشە باقىلاۋدا ۇستايتىنىن جەتكىزدى.
سونداي-اق سايلاۋشىلار تاراپىنان سۇلۋكول كوشەسىندەگى جولداردىڭ, تروتۋارلاردىڭ جانە اۆتوبۋستارعا ارنالعان بۇرىلۋ جولىنىڭ بولماۋى ايتىلدى. بۇعان سەبەپ, بىلتىر وسى كوشەدەگى ۇيلەرگە ورتالىق جىلىتۋ جۇرگىزۋ كەزىندە جول توسەمى, تروتۋارلار مەن ولاردىڭ جيەكتەرى اشىلعان. ەندى ونى قالپىنا كەلتىرۋ كەرەك.
تاعى ءبىر ماسەلە – ابايدىڭ 150 جىلدىعى كوشەسىندەگى جول توسەمىنىڭ قۇرىلىسىن اياقتاۋ. باۋىرجان سمايىلوۆ بۇل ماسەلەنى قالا اكىمىنىڭ قاتىسۋىمەن وتكەن ءماسليحات وتىرىستارىندا بىرنەشە رەت كوتەرگەنىن اتاپ ءوتتى. ءتيىستى تاپسىرمالار بەرىلدى. الدا جاڭا سمەتالىق قۇجاتتاما دايىندالىپ, تەندەر وتەدى جانە جاڭا مەردىگەر ايقىندالادى. بۇل جۇمىستار 2025 جىلعا قاراي اياقتالادى. سونداي-اق وكرۋگتەگى ۇزاق ۋاقىت بويى اياقتالماي تۇرعان بىرنەشە قۇرىلىس ورنى مەن كوندومينيۋم نىسانىنا قاتىستى ماسەلەلەر كوتەرىلدى.
سونىمەن قاتار قالالىق ءماسليحات دەپۋتاتى باۋىرجان سمايىلوۆ شايمەردەن قوسشىعۇلۇلى كوشەسى, 19/1, 19/2, 19/3 جانە 19/4 مەكەنجايلارىندا تۇراتىن تۇرعىندارمەن كەزدەستى. بۇل كوپپاتەرلى ۇيلەر مەملەكەتتىك باعدارلاما اياسىندا 2011 جىلى سالىندى. تۇرعىندار كوشەنى جارىقتاندىرۋ, ءورت ءسوندىرۋ جۇيەسى, اۆتوتۇراق, بالالار الاڭدارى, كوگالداندىرۋ جانە جالپى ءۇي ماڭىنداعى اۋماقتى اباتتاندىرۋ ماسەلەلەرىن كوتەردى.
بۇل دەپۋتاتتىڭ اتالمىش ۇيلەردىڭ تۇرعىندارىمەن العاشقى كەزدەسۋى ەمەس. باۋىرجان سمايىلوۆ ماسليحاتقا سايلاۋ ناۋقانىندا دا ولارمەن كەزدەسىپ, ماسەلەلەرىن تىڭدادى. اتالعان ماسەلەر جول كارتاسىنا ەندى.
«بۇگىنگى تاڭدا تۇرعىن ۇيلەردىڭ ارتىندا سالىناتىن اۆتوتۇراق ماسەلەسى وڭ شەشىلدى. قوعامدىق تالقىلاۋلاردىڭ ناتيجەسىندە تۇرعىنداردىڭ كوپشىلىگى ءۇيدىڭ جانىنداعى بوس قالعان جەردە سكۆەردى ۇيىمداستىرۋعا داۋىس بەرگەن ەدى. مەنىڭ ويىمشا, قالانى ەگجەي-تەگجەيلى جوسپارلاۋ جوسپارىنا وزگەرىستەر ەنگىزۋگە جانە تۇرعىنداردىڭ ءوتىنىشى بويىنشا قوعامدىق كەڭىستىك قۇرۋعا ەشتەڭە كەدەرگى ەمەس» دەيدى ءماسليحات دەپۋتاتى.
جالپى وسى ۇيلەردىڭ اينالاسىنداعى بوس كەڭىستىكتە بالاباقشا سالۋ جوسپارلانعان. بىراق تۇرعىندار بالالار مەن ەرەسەكتەردىڭ بوس ۋاقىتىن وتكىزۋگە ارنالعان ورىنداردىڭ جوعىنا بايلانىستى وسى جەردە دەمالىس الاڭىن سالۋدى سۇراپ وتىر.
