بيىل بۇل مەرەكە ەلىمىزدە ەكىنشى رەت اتالىپ وتكەلى وتىر. بىلتىر ەل پارلامەنتى وسىنداي شەشىم قابىلداعان بولاتىن. سەبەبى, تاۋەلسىز قازاقستاننىڭ ىرگەتاسىن قالاپ, شەكاراسىن شەگەلەپ, بولاشاققا باعىت-باعدار بەرگەن تۇڭعىش پرەزيدەنتتىڭ حالىق الدىنداعى ەڭبەگى ۇشان-تەڭىز. وعان تومەندەگى استانالىقتار پىكىرى دە دالەل.
سۇيىندىك جۇماعۇلوۆ, استانا قالاسى ادىلەت دەپارتامەنتى باستىعىنىڭ ورىنباسارى:
– ەلىمىزدە ەكىنشى رەت تويلانعالى وتىرعان بۇل مەرەكەنىڭ تاريحي ماڭىزى وراسان زور. ويتكەنى, ەلباسىنىڭ ساليقالى ساياساتىنىڭ ارقاسىندا تاۋەلسىز قازاق ەلى قالىپتاسىپ, تاريحىمىز تۇگەندەلىپ, ءتىلىمىز, ءدىنىمىز جانە ءدىلىمىز قايتا ورالىپ, مەملەكەتىمىزدىڭ ۇلتتىق رامىزدەرى قابىلداندى. «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» قازاقستان رەسپۋبليكاسىنىڭ كونستيتۋتسيالىق زاڭى 1991 جىلى 16 جەلتوقسان كۇنى قابىلداندى. وسى زاڭ نەگىزىندە ەلىمىز ءوزىنىڭ تاۋەلسىزدىگىن جاريا ەتتى. بۇگىندە تۇڭعىش پرەزيدەنتتىڭ ارقاسىندا تورتكۇل دۇنيە قازاقستاندى تانىدى, مويىندادى. قازاق ەلىنىڭ تۋى كوككە كوتەرىلىپ, ابىرويى اسقاقتادى. وسىنداي ايتۋلى كۇن قازاق حالقىنىڭ مەملەكەت بوپ قالىپتاسۋىنىڭ ماڭىزدى كەزەڭىن ايقىندايدى. سوندىقتان, تاۋەلسىزدىك تۋى ءاردايىم بيىكتە جەلبىرەي بەرسىن!
قارلىعاش شاحمانوۆا, استانا قالاسى باسقارۋ كوللەدجىنىڭ ديرەكتورى:
– تۇڭعىش پرەزيدەنت كۇنىن جەكە باسقا قاتىستى مەرەكە دەپ سانامايمىن. ويتكەنى, وسىدان جيىرما ەكى جىل بۇرىن, ياعني 1991 جىلى تاۋەلسىزدىگىن جاڭا عانا العان ەگەمەندى ەلىمىز ءۇشىن بۇل ءبىر ەرەكشە تەبىرەنىسكە تولى ايرىقشا ايشىقتى كۇن.
قازاقستان حالقى نۇرسۇلتان ءابىشۇلى نازارباەۆقا تاعدىرىن تابىستاپ, ەل تىزگىنىن سەنىپ ۇستاتىپ, سەنىم ارتتى. بۇل رەتتە مەملەكەت باسشىسىنىڭ ەلدى دامىتۋ مەن وركەندەتۋ جولىندا توككەن تەرى, جۇمساعان قاجىر–قايراتى, سىڭىرگەن ەڭبەگى ءولشەۋسىز.
ماقسات مومىنوۆ, استانا قالاسىنداعى №51 مەكتەپ-گيمنازياسى تاريح ءپانىنىڭ مۇعالىمى:
– كۇنتىزبەدەگى جەلتوقساننىڭ 1-ءى مەن ءۇشىن وزگەشە. ولاي بولاتىن سەبەبى, بۇل – مەنىڭ تۋعان كۇنىم. جىل سايىن وسى كۇندى ءوزىمنىڭ دۇنيەگە كەلگەن كۇنىم دەپ قانا قابىلداپ كەلسەم, بىلتىردان بەرى مەملەكەتتىك مەرەكە رەتىندە دە اتاپ وتۋدەمىز
ءبىز بۇگىندە تاۋەلسىز قازاقستاننىڭ العاشقى جەتىستىكتەرىن ەلىمىزدىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ ەسىمىمەن بايلانىستىرىپ ءجۇرمىز. ارينە, ونىمىز ورىندى. بىراق, وسىعان ەتىمىزدىڭ ۇيرەنىپ كەتكەندىگى سونشالىق, ونىڭ ءتۇپ توركىنىنە ءاردايىم ءجىتى كوز جىبەرە بەرمەيمىز.
بۇگىنگى يگىلىكتەرىمىزدىڭ ءبارىن وزدىگىنەن جۇزەگە اسقانداي قابىلدايمىز. وسىنىڭ ار جاعىندا ەرەك تۇلعانىڭ كۇن-ءتۇن قاتىپ, جانىن جەپ ءجۇرىپ اتقارعان جۇمىسى, ۇلان–عايىر ۇيىمداستىرۋشىلىق ىستەرى تۇرعانىن ەسكەرە بەرمەيتىن سەكىلدىمىز. مۇنى قالىڭ جۇرتشىلىقپەن بىرگە, اسىرەسە, كەيىنگى تولقىن – جاستار جاعىنىڭ دا جاقسىراق ءبىلىپ, سەزىنىپ وسكەندەرى ءجون. سوندىقتان, تۇڭعىش پرەزيدەنت كۇنىن اتاپ ءوتىپ وتىرۋدىڭ تاعىلىمى مول.
گۇلبارشىن وكەشقىزى