ۇكىمەت ۇيىندە پرەمەر-مينيستر ورىنباسارى ەربولات دوساەۆتىڭ توراعالىعىمەن ەل ازاماتتارىنىڭ تابىسىن ارتتىرۋ مەن تۇرمىس ساپاسىن جاقسارتۋ, سونداي-اق كوپبالالى وتباسىلاردى قولداۋ شارالارىن كۇشەيتۋ جونىندەگى جۇمىس توبىنىڭ كەزەكتى وتىرىسى ءوتتى.
جۇمىس كەڭەسى اياسىندا حالىقتىڭ ءالسىز توپتارىن, اسىرەسە كوپبالالى وتباسىلاردى قولداۋدىڭ قوسىمشا تەتىكتەرىن ازىرلەۋ جانە الەۋمەتتىك ءال-اۋقاتىن قامتاماسىز ەتۋ بويىنشا قابىلدانىپ جاتقان شارالاردىڭ تيىمدىلىگىن ارتتىرۋ ماسەلەلەرى تالقىلاندى. ەلىمىزدىڭ وڭىرلەرىندە كوپبالالى وتباسىلارمەن كەزدەسۋلەر جانە اۋلالاردى ارالاۋ بارىسىندا جۇرتشىلىقتان تۇسكەن ناقتى ۇسىنىستار قارالدى.
ە.دوساەۆ قازاقستاندىقتاردىڭ ءال-اۋقاتىن ارتتىرۋ مەن تۇرمىس ساپاسىن جاقسارتۋ ۇكىمەت جۇمىسىنىڭ مەملەكەت باسشىسى نۇرسۇلتان نازارباەۆ 2018 جىلعى 5 قازانداعى جولداۋىندا اتاپ كورسەتكەن باستى باسىمدىعى ەكەنىن ءمالىم ەتتى. تيىسىنشە, تابىس كولەمىنىڭ ءوسۋىن قامتاماسىز ەتۋ جانە تۇرمىس ساپاسىن ارتتىرۋ جونىندەگى مىندەتتەر – ورتالىق جانە جەرگىلىكتى اتقارۋشى ورگانداردىڭ باستى جۇمىستارىنىڭ ءبىرى. ۆيتسە-پرەمەر تۇرعىندار جاعدايىن جاقسارتۋ بويىنشا بىرنەشە ۇسىنىسىن العا تارتتى.
– ءبىرىنشى, بۇل الەۋمەتتىك ءال-اۋقاتتى قامتاماسىز ەتۋ بويىنشا قابىلداناتىن شارالاردىڭ تيىمدىلىگىن ارتتىرۋ, ەكىنشى, جاعدايى تومەن توپتاردى قولداۋدىڭ قوسىمشا تەتىكتەرىن ازىرلەۋ. ءبىز وتكەن اپتادا جۇمىس توبىنىڭ ءبىرىنشى وتىرىسىن وتكىزدىك. بۇل ماسەلەگە تەك ورتالىق جانە جەرگىلىكتى مەملەكەتتىك ورگانداردى عانا ەمەس, سونىمەن قاتار ازاماتتىق قوعام وكىلدەرىن دە شاقىردىق, – دەدى ەربولات دوساەۆ وتىرىس بارىسىندا.
ول وسى اپتادا كوپبالالى وتباسىلارمەن كەزدەسۋ بارىسىنداعى اكىمدىكتەردەن الىنعان ۇسىنىستاردى جيناۋ اياقتالاتىنىن اتاپ ءوتتى.
– استاناداعى قايعىلى وقيعا ءبىراز ماسەلەنىڭ بەتىن اشىپ بەردى. ال بيلىك ەندى انا مەن بالا پروبلەماسىنا كوز جۇمىپ قارامايدى. ءبىزدىڭ جۇمىسىمىزدىڭ نەگىزگى باعىتتارى رەتىندە بيۋروكراتيالىق راسىمدەردى وڭايلاتۋ ارقىلى اتاۋلى الەۋمەتتىك كومەك الۋدى جەڭىلدەتۋ, مەملەكەتتىڭ قولداۋىنا مۇقتاج كوپبالالى وتباسىلارعا جاردەماقى تولەۋ تەتىگىن جەتىلدىرۋ, جەرگىلىكتى اتقارۋشى ورگاندار جەكەلەي كوپبالالى وتباسىدان شىققان بالالاردى باستاۋىش سىنىپتا تەگىن ىستىق تاماقپەن, قوعامدىق كولىكتە جول ءجۇرۋ بيلەتىمەن قامتاماسىز ەتۋدى جانە ت.ب. كەڭەيتۋ ماسەلەسى قاراستىرىلادى. سونداي-اق اسا مۇقتاج كوپبالالى وتباسىلاردىڭ تۇرعىن ءۇي جاعدايىن جاقسارتۋ تۇرعىسىنان مۋنيتسيپالدى ارەندالىق تۇرعىن ۇيگە قولجەتىمدىلىكتى ارتتىرۋ مۇمكىندىگى جەكەلەي تالقىلانادى, – دەدى ۆيتسە-پرەمەر.
كەڭەسكە «نۇر وتان» پارتياسىنىڭ وكىلدەرى, پارلامەنت ءماجىلىسىنىڭ دەپۋتاتتارى, الەۋمەتتىك-ەكونوميكالىق بلوك, ينفراقۇرىلىمدىق دامۋ, ىشكى ىستەر ورگاندارىنىڭ, سونداي-اق سەلەكتور رەجيمىندە جەرگىلىكتى اتقارۋشى ورگانداردىڭ باسشىلارى جانە ساراپتامالىق قاۋىمداستىق پەن ۇەۇ وكىلدەرى قاتىستى.
ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا ەلىمىزدىڭ بارلىق وڭىرىندە وپەراتيۆتىك شتابتار قۇرىلعانىن جەتكىزدى. ونىڭ ايتۋىنشا, حالىقپەن جانە باستاماشى توپتارمەن كەزدەسۋلەر وتكىزىلىپ جاتىر, سونىمەن قاتار كوپبالالى وتباسىلاردىڭ تۇرعىن ءۇي-تۇرمىس جاعدايىن تەكسەرۋ ماقساتىندا اۋلالاردى ارالاۋ جۇمىستارى جۇرگىزىلۋ ۇستىندە. بۇگىندە جەرگىلىكتى جەرلەردە ۇسىنىلاتىن ءتۇرلى الەۋمەتتىك قىزمەتتەر, دەنساۋلىق ساقتاۋ قىزمەتتەرى, ءبىلىم بەرۋ, تۇرعىن ءۇي جاعدايلارى, الەۋمەتتىك قورعاۋ سالالارىنا قاتىستى 1500-دەن اسا ۇسىنىس جيناقتالعان. ازاماتتار اكىمدىكتەرگە جۇگىنۋ ارقىلى قوسىمشا ۇسىنىستارىن جەتكىزە الادى.
يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك ازاماتتاردىڭ تۇرعىن ءۇي جاعدايلارىن جاقسارتۋ ماسەلەلەرى تۋرالى باياندادى. ءسوز اراسىندا حالىقتىڭ الەۋمەتتىك وسال توپتارىنا تۇرعىن ءۇيدىڭ قولجەتىمدىلىگىن ارتتىرۋ بويىنشا قوسىمشا ناقتى تەتىكتەرى ازىرلەنىپ جاتقانىن قوزعاپ ءوتتى. ءبىلىم جانە عىلىم ءمينيسترى ەرلان ساعاديەۆ جاڭا مەكتەپتەر سالۋ, باستاۋىش سىنىپتاردىڭ وقۋشىلارىن تەگىن تاماقپەن قامتۋ ۇلەسىن كەڭەيتۋ, سونداي-اق اۋىلدىق ەلدى مەكەندەردە ءبىلىم بەرۋدىڭ قولجەتىمدىلىگىن ارتتىرۋ ماقساتىندا اتقارىلىپ جاتقان جۇمىستار تۋرالى باياندادى. دەنساۋلىق ساقتاۋ ءمينيسترى ەلجان ءبىرتانوۆ مەديتسينالىق قىزمەتتەردىڭ ساپاسىن جاقسارتۋ, ولاردىڭ قولجەتىمدىلىگىن ارتتىرۋ جانە بالالاردى دەنساۋلىق ساقتاۋ جۇيەسىمەن قامتۋ بويىنشا ورىندالىپ جاتقان جۇمىستار تۋرالى مالىمدەدى. ۇلەستەۋ تەتىگى كوپبالالى وتباسىلاردىڭ مۇشەلەرىنە, حالىقتىڭ الەۋمەتتىك ءالسىز توپتارىنا قىمبات تۇراتىن پروتسەدۋرالاردى, ءدارى-دارمەك تۇرلەرىن, ستوماتولوگيالىق قىزمەتتەردى جانە ت.ب. الۋىنا مۇمكىندىك بەرەتىنى اتالىپ ءوتتى. ءوز كەزەگىندە قارجى ءمينيسترى ءاليحان سمايىلوۆ بيۋدجەتتىڭ الەۋمەتتىك باعىتى تۋرالى باياندادى. رەسپۋبليكالىق بيۋدجەتتەن 2019 جىلعا الەۋمەتتىك سالاعا 4,8 ترلن تەڭگە بولىنبەك, بۇل بيۋدجەتتىڭ بارلىق شىعىندارىنىڭ 45 پايىزىن قۇرايدى. سونىمەن قاتار, الەۋمەتتىك سالا شىعىستارىنىڭ ۇلەسىن ودان ءارى ارتتىرۋ جۇمىستارى جالعاسپاق. جۇمىس توبىنىڭ كەلەسى وتىرىسى 21 اقپاندا وتكىزىلمەك.
