ۇلاندارى ۇلى ەلدىڭ
تەمىردەي تارتىپكە ەتى ۇيرەنگەن ۇلدان ەرتەڭ وسال ادام شىقپايدى. اسىرەسە, كيىمگە بەلگى تىگىپ, تۇيمە قاداۋدان باستالاتىن اسكەري اڭگىمەگە جاستايىنان قانىق بالا باسقا قۇرداستارىنا قاراعاندا الدەقايدا پىسىقتاۋ بولىپ ەر جەتەتىنى راس. مۇنداي ورەندەردىڭ ءبىر توبىمەن ساعادات نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنە بارعانىمىزدا تانىستىق. پرەزيدەنتتىڭ باستاماسىمەن 1999 جىلى ىرگەسى قالانعان بەدەلدى وقۋ ورداسىندا بۇل كۇنى 441 شاكىرت ءبىلىم الادى.
مەكەمەگە كىرگەنىمىزدە, وتان قورعاۋشىلار كۇنىنە ارنالعان مەرەكەلىك كەشتىڭ ۇستىنەن ءدوپ ءتۇسىپپىز. جىل سايىن وسىناۋ مەيرامدى دۇركىرەتىپ تويلاۋ جاسۇلاندىقتاردىڭ يگى ءداستۇرىنە اينالعان. مۇنتازداي فورما كيىپ, سالماقتى مىنەز قالىپتاستىرعان جاس ساربازداردىڭ ورتاسىندا وتىرۋدىڭ ءوزى اسكەردەگى اتموسفەرانى سەزىندىرەدى ەكەن. كونتسەرت بارىسىندا داۋرىعىپ, ءتارتىپ بۇزىپ جاتقان ءبىرى جوق. ءبارى دە ەرەسەك كىسىلەرشە سالقىنقاندى, كوزقاراستارى بايىپتى. ءويتكەنى, مۇندا تۇسكەندەردىڭ تۇگەلى – سان ءتۇرلى سىننان سۇرىنبەي وتكەن سايىپقىراندار. مەكتەپتە وقۋعا نيەتتى ۇمىتكەرلەردى پسيحولوگيالىق ىرىكتەۋ, دەنە دايارلىعى نورماتيۆتەرى جانە مەديتسينالىق تەكسەرىس كۇتەدى. بۇعان دەيىن 7-سىنىپ بىتىرگەن وقۋشىلار قابىلدانسا, ەندىگى ۋاقىتتا 9-سىنىپتى اياقتاعان بوزبالالار عانا «جاس ۇلان» قاتارىنا قوسىلۋعا تىلەك ءبىلدىرە الادى.
جيىننان سوڭ جانىمداعى ەكى جىگىتتى اڭگىمەگە تارتتىم. جاسۇلان مۇساەۆ تالدىقورعان ءوڭىرىنىڭ تۋماسى بولسا, حافيز اتاباي شىمكەنت قالاسىنان ەكەن. ەكەۋى دە العاشىندا ءۇيلەرىن ساعىنىپ, «اينالايىندى» اڭساعاندارىن جاسىرمادى.
– كۇندە تاڭەرتەڭ كوماندير ءبارىمىزدى ساپقا تۇرعىزىپ, جاعامىزدى تەكسەرەدى, پوگوندارىمىزدى قارايدى. باستاپقىدا كيىم جۋ مەن ۇتىكتەۋدەن قينالدىق. وندايدا جوعارى سىنىپتاعىلار اقىلدارىن ايتىپ, ءتاجىريبەلەرىمەن ءبولىسىپ, كوپ كومەكتەستى. جالپى, بىزدەر باۋىر سەكىلدىمىز. ەڭ الدىمەن, ۇستازدارىمىز تاتۋلىققا, اۋىزبىرشىلىككە باۋليدى, – دەپ جىميدى جاسۇلان.
كەي بىلمەستىك ءۇشىن ۇمىتىلماستاي ساباق الاتىن كەزدەر دە بولاتىن كورىنەدى. ونى ءحافيزدىڭ سوزىنەن اڭعاردىق.
– مەكتەپتەگى اعالارىمىز وبال مەن ىسىراپتىڭ زيانىن ءجيى ايتىپ وتىرادى. ءبىر كۇنى بايقاۋسىزدا ناننىڭ اۋزىن اشىق قالدىرىپ كەتىپپىز. ءبىرنەشە ساعات بويى تۇرىپ, قاتىپ قالىپتى. ەرتەسىنە سونى تاماققا تۋراتىپ, جەگىزگەن. ەسەسىنە ءوز ءىسىمىزدىڭ بۇرىستىعىن ءتۇسىنىپ, مۇنداي سالعىرتتىققا ساق قارايتىن بولدىق, – دەدى جۇقالتاڭ كەلگەن اقسارى بوزبالا.
شاكىرتتەردىڭ سالاۋاتتى ءومىر سالتىنا ابدەن داعدىلانىپ كەتەتىنى سونشا, قالاعا شىققاندا, دوستارىمەن كەزدەسكەندە فاستفۋد, گازدى سۋسىن سەكىلدى ءونىمدەرگە تابەتتەرى تارتپاي قالادى ەكەن.
– ۇيگە بارعاندا انامىز ءپىسىرگەن نەشە ءتۇرلى تاعامداردى اسقازانىمىز «جاتىرقايدى». ءتىپتى, قاتال رەجيمگە كوندىگىپ قالعاندىقتان, ەلدەن ەرتە ويانىپ الامىز. مەكتەپتە ءار مينۋتىمىز ەسەپتەۋلى عوي. وسى ءتاربيەنىڭ ارقاسىندا ۋاقىتتى باعالاي بىلەمىز, – دەپ قايىردى قوس كەيىپكەرىمىز.
جاسۇلاندىقتار نەگىزگى ءپاندەرمەن بىرگە العاشقى اسكەري دايىندىق كۋرسىن تەرەڭدەتە وقيدى. اۆتوماتتى 15 سەكۋندتا شاشىپ-جيناۋ دەگەنىڭ مۇنداعىلار ءۇشىن بۇيىم ەمەس. وقۋشىلار سپورتتىق شارالارعا دا بەلسەنە قاتىسادى. مەكەمەدە بوكس, كۇرەس, فۋتبول, تاەكۆوندو, ءجۇزۋ, شاڭعى تەبۋ سەكىلدى ۇيىرمەلەر جۇمىس ىستەيدى. ودان بولەك, بارابانشىلار قۇرامى دا بار. ولار سالتاناتتى ءراسىم كەزىندە ونەر كورسەتەدى.
ايتپاقشى, «جاس ۇلان» بالالارى قوعامدىق ترەندتەردەن دە قالىس قالماۋعا تىرىسادى. بيىلعى 8 ناۋرىز قارساڭىندا وسى مەكتەپتىڭ 200 شاكىرتى شافل ستيلىندە بي بيلەپ, فلەشموب ۇيىمداستىرعان. قۇتتىقتاۋ رەتىندە تۇسىرىلگەن بەينەروليك ءاپ-ساتتە قازنەتكە تاراپ, كوپشىلىك تاراپىنان قىزۋ قولداۋعا يە بولعان ەدى. بيىل دا ورەندەر 7 مامىرعا قاراي توسىن سىي دايارلاۋدا. جاڭا فلەشموبتىڭ ۆيدەوسى كوپ ۇزاماي ينتەرنەتكە جۇكتەلەدى.
بوتاگوز ماراتقىزى