كەشە استانا قالاسى پروكۋراتۋراسىندا زاڭدىلىقتى, قۇقىق ءتارتىبىن جانە قىلمىسپەن كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ كەڭەيتىلگەن وتىرىسى وتكىزىلدى.
كەڭەسكە استانا قالاسى اكىمىنىڭ ءبىرىنشى ورىنباسارى س.حوروشۋن, استانا قالاسىنىڭ پروكۋرورى
ب.دەمباەۆ, ۇلتتىق قاۋىپسىزدىك كوميتەتى استانا قالاسى دەپارتامەنتىنىڭ باسشىسى ا.تولەۋوۆ, استانا قالاسى ىشكى ىستەر دەپارتامەنتىنىڭ باستىعى ا.اۋباكىروۆ, سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ استانا قالاسى بويىنشا دەپارتامەنت باستىعى ش.قابدۋلا, تاعى دا باسقا لاۋازىمدى تۇلعالار قاتىستى.
القالى جيىندا ۇلەستىك قۇرىلىس سالاسىندا قوردالانعان ماسەلەلەر مەن ازاماتتاردىڭ اقشاسىن جىمقىرۋ, سونداي-اق, وسى ساناتتاعى قىلمىستىق ىستەردى تەرگەۋدە كەزدەسەتىن قيىندىقتاردىڭ سەبەپتەرىنە جاسالعان تالداۋدىڭ قورىتىندىلارى تالقىلاندى.
ەلىمىزدىڭ باس قالاسى استانادا ۇلەسكەرلەر ماسەلەسى توڭىرەگىندە داۋ-داماي ازايماي وتىرعانى بەلگىلى. الاقول قۇرىلىسشىلاردىڭ كەسىرىنەن بۇگىنگى تاڭدا تەك قالادا عانا 13500 ادام زارداپ شەگىپ, 31 ادامنىڭ ۇستىنەن قىلمىستىق ءىس قوزعالعان. ولاردىڭ توعىزى سوت ۇكىمىمەن ءتۇرلى مەرزىمگە باس بوستاندىعىنان ايىرىلدى.
الايدا ۇلەسكەرلەردىڭ قارجىلارىن الداپ الىپ, باسقا ماقساتتارعا پايدالانۋ نەمەسە جەكە مۇددەلەرىنە جۇمساۋ فاكتىلەرى ازايماي كەلەدى. وسى باعىتتا حالىقتىڭ اراسىندا ۇگىت-تۇسىنىك جۇمىستارى دا جۇرگىزىلۋدە. قۇقىقتىق كومەك بەرۋ ماسەلەلەرى دە ۇيىمداستىرىلدى. الدانعان ۇلەسكەرلەرگە ارنالىپ ەكى جارمەڭكە وتكىزىلدى. ءۇشىنشىسىن الداعى قاراشا ايىندا ۇيىمداستىرۋ جوسپارلانىپ وتىر.
ۇلەسكەرلەر تالابىنا وراي حالىققا قىزمەت كورسەتۋ ورىندارىندا ءمان-جايدى تۇسىندىرەتىن ارنايى ورتالىقتار اشىلدى. قازىردىڭ وزىندە 190 ادام وسى ورتالىقتىڭ كومەگىنە جۇگىنگەن.
ارينە, «ازبۋكا جيليا», «العا, توقبولات», «ورال ديزاين ستروي سەرۆيس», «تامىز ينۆەست» سياقتى قۇرىلىس كومپانيالارىنىڭ باسشىلارى سوت ۇكىمىمەن ءتيىستى جازالارىن الدى. الايدا ۇلەستىك قاتىسۋشىلاردىڭ ءتۇيىندى تۇيتكىلدەرى تۇپكىلىكتى شەشىلمەي كەلەدى. وسىعان بايلانىستى 2016 جىلى قابىلدانعان «تۇرعىن ءۇي قۇرىلىسىنا ۇلەستىك قاتىسۋ تۋرالى» قر جاڭا زاڭىن حالىق اراسىندا كەڭىنەن ءتۇسىندىرۋ جۇمىستارىن جۇرگىزۋدى ناقتى قولعا الۋ جايى ايتىلدى.
ۇيلەستىرۋ كەڭەسىنىڭ وتىرىسىندا قالا پروكۋرورىنىڭ ورىنباسارى ا.بايشولاقوۆ, استانا قالاسى پروكۋراتۋراسى 2-ءنشى باسقارماسىنىڭ باستىعى د.ەرمەكوۆ, استانا قالاسى ىشكى ىستەر دەپارتامەنتى باستىعىنىڭ ورىنباسارى س.ءادىلوۆ, تاعى دا باسقا لاۋازىمدى تۇلعالار بايانداما جاساپ, وي-پىكىرلەرىن ورتاعا سالدى.
كەڭەس قورىتىندىسىندا ورىن العان كەلەڭسىزدىكتەردى الداعى ۋاقىتتا بولدىرماۋ ماقساتىندا ەلوردانىڭ بارلىق قىلمىستىق تەرگەۋ ورگاندارىندا اتالعان ماسەلەلەردى رەتتەپ وتىراتىن ارناۋلى ءبولىم قۇرۋ قاجەتتىگى ايتىلىپ, مەملەكەتتىك جانە قۇقىق قورعاۋ ورگاندارىنا ءتيىستى تاپسىرمالار بەرىلدى.
