ۇلگىلى ەكيپاج ساتتىلىك تىلەيدى

استانا كۇنى قارساڭىندا وتكىزۋ داستۇرگە اينالعان «استانا تاڭداۋى-2014» بايقاۋىنىڭ سوڭعى كەزەڭىندە ۇيىمداستىرۋشىلار تاعى ءبىر ەرەكشە اكتسياعا باستاماشى بولدى.

ەلوردا كوشەلەرىندە جۇرەتىن قوعامدىق اۆتوبۋستاردىڭ ءبىرى «ۇلگىلى قىزمەت كورسەتەتىن ەكيپاج» اتاندى. ول №1 اۆتوبۋس پاركىنىڭ №10 باعىتتاعى اۆتوبۋسىنىڭ جۇرگىزۋشىسى بىلتىر وتكەن بايقاۋدىڭ جەڭىمپازى قانات كۇلتاەۆ. بۇل تۋرالى astana.kz سايتىنا «بايتەرەك» حالىقارالىق مەديا ورتالىعىنان حابارلادى.

«قوعامدىق كولىك ميلليونداعان ادام تۇراتىن, كوپتەگەن كاسىپورىندار ورنالاسقان ۇلكەن مەگاپوليستىڭ اجىراماس بولىگى بولىپ تابىلادى.

جولاۋشىلار ءارتۇرلى بولادى, مىنەز-قۇلقى دا اركەلكى, كوڭىل-كۇيلەرى دە باسقا. بىراق ءبىز شىدامدىلىق تانىتامىز, اۆتوبۋس سالوندارىندا جانە قالالىق جولداردا ءتارتىپ ساقتايمىز. سونىمەن قاتار, قالالىق بيلىككە قولداۋ كورسەتكەنى, جۇمىسىمىزعا قولايلى جاعداي جاساعانى ءۇشىن العىس ايتامىن» دەيدى ەلوردالىق ۇزدىك جۇرگىزۋشى.

«استانا تاڭداۋى» ءداستۇرلى بايقاۋىنىڭ جەڭىمپازدارى حالىق تانىمىنا, سونداي-اق, استانا قالاسى اكىمىنىڭ كۋبوگىنا جانە ديپلومىنا يە بولادى. ۇزدىك ماماندار تۋرالى دەرەكتى فيلمدەر تۇسىرىلەدى, قالا كوشەلەرىندە بيلبوردتار ورناتىلادى.

ەسكە سالايىق, وتىنىشتەردى قابىلداۋ 31 مامىردا اياقتالادى, ال 1-20 ماۋسىم ارالىعىندا استانا قالاسى اكىمدىگىنىڭ سايتىندا داۋىس بەرۋ باستالادى.