«ەكسپو-2017» مامانداندىرىلعان كورمەسىنىڭ اياسىندا 6-8 شىلدە كۇندەرى «داۋلەت» سپورت كەشەنىندە قر پرەزيدەنتى ن. نازارباەۆتىڭ جۇلدەسى ءۇشىن ەرلەر مەن ايەلدەر اراسىندا سامبو جانە اسكەري سامبودان الەم كۋبوگىنىڭ كەزەڭى ءوتتى. ناتيجەسىندە قازاقستان قۇراماسى جالپىكوماندالىق ەسەپتە توپ جاردى.
ءبىزدىڭ كوماندانىڭ قورجىنىنا جالپى 54 جۇلدە ءتۇستى. ناقتىراق ايتساق, 13 التىن, 12 كۇمىس, 29 قولا مەدال. فينالدا قازاقستاندىق سپورتشىلار 3 التىن جانە 3 كۇمىس يەلەندى.ودان كەيىنگى ورىندى 7 التىنمەن گرۋزيا يەلەندى. ال رەسەيلىكتەر جارىستىڭ سوڭعى كۇنى 2 التىن جەڭىپ الىپ, جالپى 3 التىنمەن وزبەكستاندى باسىپ وزىپ, ءۇشىنشى ورىننان كورىندى.
تۋرنير سىيلىعى 9 سالماق دارەجەسىندە: 52, 57, 62, 68, 74, 84, 90, 100 كگ جانە 100+ كگ ساراپقا سالىندى. وتانداستارىمىز اسكەري سامبودان ەرەكشە كوزگە ءتۇستى. ولار قورجىنعا 7 التىن, 3 كۇمىس, 9 قولا مەدال سالدى.سونداي-اق, ايەلدەر قۇراماسى دا ارتىلعان سەنىمدى ارتىعىمەن اقتادى. الەم كۋبوگى قورىتىندىسى بويىنشا ولاردا – 3 التىن, 3 كۇمىس جانە 11 قولا مەدال. ال ەرلەر 3 التىن, 6 كۇمىس جانە 9 قولا مەدال جەڭىپ الدى.
جارىسقا ارمەنيا, ازەربايجان, بەلارۋس, بولگاريا, گەرمانيا, گرۋزيا, مولدوۆا, رەسەي, رۋمىنيا, تۇركيا, وزبەكستان, قىرعىزستان, وڭتۇستىك كورەيا, جاپونيا, تاجىكستان جانە اقش سەكىلدى 16 مەملەكەتتەن 200-دەن استام سپورتشى قاتىستى. ولاردىڭ ءبارى استانادا ءوتىپ جاتقان حالىقارالىق مامانداندىرىلعان «ەكسپو-2017» كورمەسىن ارالاۋعا شاقىرىلدى.
ورىنبەك وتەمۇرات
