قر ۇلتتىق سپورت قاۋىمداستىعىنىڭ ۇيىمداستىرۋىمەن وتكەن «التىن تۇعىر-2018» سالتاناتتى جيىندا ۇلتتىق سپورتتىڭ ۇزدىكتەرى ماراپاتتالدى.
شارا بارىسىندا ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان سالا ماماندارىمەن ەسەپتىك كەزدەسۋ وتكىزدى. جيىندا قاۋىمداستىقتىڭ جاڭا قۇرامى تانىستىرىلدى. قاۋىمداستىققا قاراستى «كوكپار» فەدەراتسياسىنىڭ پرەزيدەنتى بولىپ تانىمال بوكسشى, وليمپيادا ويىندارىنىڭ جۇلدەگەرى مۇحتارحان دىلدابەكوۆ, «اۋدارىسپاق» فەدەراتسياسىنىڭ پرەزيدەنتى بولىپ كاسىپكەر دانيار قوبىلاندين, ال «بايگە» فەدەراتسياسىنىڭ پرەزيدەنتى – ۇلتتىق قاۋىمداستىقتىڭ ۆيتسە-پرەزيدەنتى بولىپ نۇربول نازارباەۆ تاعايىندالدى. مۇحتارحان دىلدابەكوۆ پەن دانيار قوبىلاندين وزدەرىنىڭ جاڭا قىزمەتتەگى الداعى جوسپارلارى تۋرالى ايتىپ ءوتتى. ال ۇلتتىق سپورت قاۋىمداستىعىنىڭ اتقارۋشى ديرەكتورى راحات جاقسىباي ءوتىپ بارا جاتقان جىلداعى اتقارىلعان جۇمىستار مەن الداعى جىلدىڭ جوسپارى جايلى باياندادى.
ەلىمىزگە بەلگىلى ساحنا ساڭلاقتارىنىڭ كونتسەرتىمەن ورىلگەن, بيىل التىنشى مارتە ۇيىمداستىرىلىپ وتىرعان سالتاناتتى شاراعا قر مادەنيەت جانە سپورت ءمينيسترى ارىستانبەك مۇحامەديۇلى, قر ۇلتتىق سپورت قاۋىمداستىعىنىڭ قۇرمەتتى پرەزيدەنتى قايرات ساتىبالدىۇلى قاتىستى.
وندا بيىلعى ۇلتتىق سپورتتىڭ حالىقارالىق باسەكەسىندە دارا شىققان جەڭىمپازدار, ياعني اۋدارىسپاقتان ءىىى ازيا چەمپيوناتىندا, تەڭگە ءىلۋ مەن قۇسبەگىلىكتەن ءىى ازيا چەمپيوناتىندا, جامبى اتۋدان XIV الەم چەمپيوناتىندا, كوكپاردان, توعىزقۇمالاقتان, اسىق اتۋدان, قازاق كۇرەسىنەن حالىقارالىق جارىستاردا جۇلدەلى ورىن يەلەنگەن سپورتشىلار «التىن تۇعىر» سىيلىعىن يەلەندى.
ۇلتتىق سپورت تۇرلەرىنىڭ ۇزدىكتەر نوميناتسياسى بويىنشا «ءۇزدىك مەرگەن» ابزال تۋلىبەكوۆ, «ۇزدىك بايگە اتى» قاراكوز اتتى جۇيرىكتىڭ يەسى ارتىعالي ميرازوۆ, شاباندوزى بەكزات ءسادۋاقاس, «ۇزدىك شاباندوز» باۋىرجان مىرزاباەۆ, «ۇزدىك كوكپار كومانداسى» – «قۇلاگەر» كومانداسى, «ۇزدىك كوكپارشى» اسلانبەك سايدۋللا, «ۇزدىك اۋدارىسپاقشى» شىڭعىسحان ەرجانوۆ پەن ازامات سەرعازين, «ۇزدىك تەڭگە ءىلۋشى» ماعجان ساپاربەك, «ۇزدىك قۇسبەگى» باباجان بەرىكبولسىن, «ۇزدىك قازاق كۇرەسىنىڭ بالۋانى» ەرسۇلتان مۇزاپپاروۆ, «ۇزدىك توعىزقۇمالاق ويىنشىسى» اسەل داليەۆا, «ۇزدىك اسىق اتۋشى» مۇحتار احمەتوۆ دەپ تانىلدى. نۇرلان دوداي «ۇزدىك جاتتىقتىرۋشى», ەربول ەدىلباەۆ «ۇزدىك جەتەكشى», گۇلنار بازارحانوۆا «ۇزدىك تورەشى» اتاعىمەن ماراپاتتالدى. قىزىلوردا وبلىسىنىڭ اكىمى قىرىمبەك كوشەرباەۆقا «ەلىمجان» مەدالى, ال دەربىس بايدىلداەۆ پەن باعدات مۇپتەكەقىزىنا, جومارت سابىرجانوۆقا جانە ونەرباي جانبالاعا «ۇلتتىق سپورت ارداگەرى» مەدالى تابىس ەتىلدى.
ال «استانا اقشامى» گازەتىنە ۇلتتىق سپورتتى ۇزدىك ناسيحاتتاعانى ءۇشىن ارناۋلى جۇلدە بەرىلدى. سونىمەن قاتار ۇلتتىق سپورت سالاسىنىڭ دامۋىنا ەڭبەك سىڭىرگەن بىرقاتار ازاماتتار ۇلتتىق سپورت قاۋىمداستىعىنىڭ ارنايى ديپلومى, العىس حاتى جانە قارجىلاي سىيلىقتارىنا يە بولدى.
