2 ماۋسىمدا استانادا ۇلتتىق بىرىڭعاي تەستىلەۋ باستالدى. العاشقى سىناق بەيسەنبى كۇنى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە ءوتتى. ءبىرىنشى كۇننىڭ ناتيجەسى بويىنشا ەلوردادا ورتاشا بالل 91,3 پايىزدى قۇرادى.
بيىل ەلوردالىق مەكتەپتەردى 4 695 تۇلەك تامامداعان. ۇلتتىق بىرىڭعاي تەستىلەۋگە 4017 وقۋشى قاتىسادى دەپ جوبالانعان. ال 571 مەكتەپ ءبىتىرۋشى وزدەرى ءبىلىم العان وقۋ ورداسىندا مەملەكەتتىك ەمتيحان تاپسىرسا, 18 بالا دەنساۋلىعىنا بايلانىستى سىناقتان بوساتىلعان. 192 وقۋشى – «التىن بەلگىگە» ۇمىتكەر.
العاشقى كۇنى ەلوردالىق 1058 وقۋشى تەستىلەۋدەن ءوتتى. سونىڭ ىشىندە 707-ءسى – قازاق تىلىندە, 351-ءى – ورىس تىلىندە تاپسىردى. ازىرگە ۇزدىك كورسەتكىش – 124 بالل. بۇل جەتىستىككە استاناداعى قىزدارعا ارنالعان قازاق-تۇرىك ليتسەيىنىڭ ەكى وقۋشىسى مەن №15 مەكتەپ-ليتسەيىنىڭ ءبىر تۇلەگى قول جەتكىزدى. بيىلشا ۇلتتىق تەستىلەۋدىڭ فورماتى وزگەرگەن جوق. ەمتيحان كەزىندە اۋديتوريادان شىعارىلعاندار مەن تەست ناتيجەلەرىن جويۋ جاعدايلارى تىركەلمەگەن. سونداي-اق, ءار تالاپكەر سىناق قورىتىندىسىمەن كەلىسپەسە, اپەللياتسياعا بەرۋگە دە قۇقى بار.
ازامات ەسەنجول
