ەلىمىزدە اباي كۇنى تۇڭعىش رەت اتاپ ءوتىلدى. ۇلت ۇستازى احمەت بايتۇرسىنوۆتىڭ سوزىمەن ايتساق, پرەزيدەنتتىڭ تاپسىرماسىنا سايكەس «قازاقتىڭ باس اقىنىنىڭ» تۋعان كۇنى – ۇكىمەتتىڭ قاۋلىسىمەن اباي كۇنى بولىپ بەلگىلەندى. ونىنشى تامىز كۇنى حاكىم اتامىزدىڭ تۋعانىنا 175 جىل تولدى. وسىعان وراي ەلورداداعى تۇعىرلى تۇلعانىڭ ەسكەرتكىشىنە مەملەكەتتىك حاتشى قىرىمبەك كوشەرباەۆ, پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ, پرەمەر-ءمينيستردىڭ ورىنباسارى ەرالى توعجانوۆ, مادەنيەت جانە سپورت مينيسترى اقبوتا رايىمقۇلوۆا,
نۇر-سۇلتان قالاسىنىڭ اكىمى التاي كولگىنوۆ جانە قوعام قايراتكەرلەرى مەن زيالىلار گۇل شوعىن قويدى.
سالتاناتتى جيىنعا قاتىسقان فيلولوگيا عىلىمدارىنىڭ دوكتورى, پروفەسسور مىرزاتاي جولداسبەكوۆ دانىشپاننىڭ تەرەڭ ويلارى مەن شىعارماشىلىعى جايىندا پاراساتتى ءسوز ءوربىتتى.
«ابايدىڭ قازاقتى سىناماعان جەرى جوق. بىراق قازاقتى جانىنداي ءسۇيدى. ءبىر وكىنىشتىسى, اباي سىناعان كوپ ادەتتەن ءالى كۇنگە ارىلا الماي كەلەمىز. قايتا ونىڭ ۇستىنە ءبىرتالاي قايعى-قاسىرەت قوسىلدى. ءبىز وسىدان تۇگەل ارىلىپ, ابايدى قايتا ءتۇسىنىپ, ۇعىنىپ وقۋىمىز قاجەت» دەدى عالىم. قازاقستان جازۋشىلار وداعىنىڭ توراعاسى, اقىن ۇلىقبەك ەسداۋلەت ادامزاتتىڭ العاشقى ۇستازى اريستوتەلدەن باستاپ, ۇلى ۇستازدار مەن كلاسسيكتەردىڭ قاي-قايسىمەن دە ابايدى تەرەزەسى تەڭ تۇراتىن دانىشپان دەپ ەسەپتەيتىندىگىن ايتتى:
– قازاقستان جازۋشىلار وداعى مەرەيتويعا وراي اقىننىڭ پوەزيالىق كۇنتىزبەسىن شىعاردىق. سونىمەن بىرگە ينتەراكتيۆتى كىتابىن دايىنداپ, وعان ولەڭدەرى, قارا ءسوزى جانە اندەرىن ەنگىزدىك. بۇل كىتاپتى باعالى دۇنيە دەپ ايتۋعا بولادى. قازىرگى كۇنى كەمەڭگەر تۇلعانىڭ شىعارمالارى ون تىلگە اۋدارىلىپ, وقىرمانعا جول تارتا باستادى. بۇدان بولەك, م.اۋەزوۆ اتىنداعى ادەبيەت جانە ونەر ينستيتۋتى دايىنداعان اقىننىڭ ءۇش تومدىق اكادەميالىق تانىمدىق جيناعى جارىق كورەدى.
