كەشە استانانىڭ 20 جىلدىعىنا وراي قر مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ تاپسىرىسى بويىنشا «Kazakh Tourism» ۇلتتىق كومپانياسىنىڭ ۇيتقى بولۋىمەن ەلىمىزدىڭ تابيعاتى كوركەم جەرلەرىن ارالايتىن «ۇلى دالا ەلىنە ساياحات: التايدان جىبەك جولىنا دەيىن» اتتى ەكسپەديتسيا جولعا شىقتى.
بۇل ەكسپەديتسيا 29 قىركۇيەككە دەيىن جالعاسادى. وعان 140-قا جۋىق ادام قاتىسپاق. ولاردىڭ اراسىنان پارلامەنت دەپۋتاتتارى, جۋرناليستەر, بلوگەرلەردى كەزدەستىرەسىز. تۋريستىك باعىتتار «تيان-شان مارجانى» – الماتى وبلىسى; «التاي – وركەنيەت بەسىگى» – شىعىس قازاقستان وبلىسى; «جوڭعار الاتاۋى» – الماتى وبلىسى, «سارىارقا» – اقمولا, پاۆلودار, قاراعاندى, قوستاناي وبلىستارى; «تەڭىزدەن تەڭىزگە دەيىن» – قىزىلوردا, اقتوبە, ماڭعىستاۋ وبلىستارى; «جاڭا جىبەك جولى» – تۇركىستان, جامبىل, الماتى وبلىستارى اۋماقتارىن قامتيدى.
«ءبىز ەل تۇرعىندارىنىڭ تۋعان جەرىن تانۋعا دەگەن قىزىعۋشىلىعى ارتىپ كەلە جاتقانىن بايقايمىز. ءبىزدىڭ جەرىمىزدىڭ تابيعاتى وتە كوركەم. ءۇش اي ىشىندە كاسىبي مامانداردان قۇرىلعان توپ ەلىمىزدىڭ ەڭ قىزىقتى جەرلەرىن ارالاپ, ولار تۋرالى وتانداستارىمىز بەن شەتەلدىك تۋريستەرگە كەڭ تۇردە باياندايتىن بولادى. سونداي-اق, ەكسپەديتسيا سول جەرلەردەگى ءتۋريزمدى ءارى قاراي دامىتۋ ءۇشىن قاجەتتى ينفراقۇرىلىمدىق شەشىمدەردى تابۋعا مۇمكىندىك بەرەدى» دەيدى «Kazakh Tourism» ۇك» اق باسقارما توراعاسى راشيد كۇزەمباەۆ.
سونىمەن قاتار, يگىلىكتى شارا ناتيجەسىندە ەلىمىزدىڭ تابيعي نىساندارى تۋرالى جاڭا تۋريستىك باعىتتار, ساپالى فوتو جانە ۆيدەوبانكتەر قۇرىلىپ, يلليۋستراتسيالانعان جولنۇسقا جاسالادى.
