ەندى اقىلى اۆتوتۇراق قۇنىن Senim ءموبيلدى قوسىمشاسى كومەگىمەن تولەۋگە بولادى. «استانا قالاسى كولىك كەڭىستىگىن باسقارۋ» جشس وسى ايدان باستاپ قالا تۇرعىندارى مەن قوناقتارىنا اۆتوتۇراق اقىسىن تولەۋدىڭ ىڭعايلى جولىن ۇسىنۋدا.
ول ءۇشىن سمارتفونىڭىزعا Senim ءموبيلدى قوسىمشاسىن جۇكتەپ, تىركەلىپ, كولىگىڭىز تۋرالى بارلىق اقپاراتتى ەنگىزگەن سوڭ بالانستى تولتىرۋ قاجەت. وسىلايشا, اۆتوتۇراق اقىسىن ءبىر تەتىكپەن تولەيسىز.
ەستەرىڭىزگە سالساق, 15 قاڭتاردان باستاپ «نۇرجول» جەلەكجولىندا اقىلى كولىك تۇراقتارى جوباسى ىسكە قوسىلعان بولاتىن. 472 كولىككە ورىن ازىرلەنىپ, جول بەلگىلەرى سىزىلدى. سول سياقتى اقپارات الۋ تاقتالارى ورناتىلىپ, 12 پاركومات قويىلدى.
تۇراق قۇنى – تاڭعى ساعات 8.00-دەن كەشكى 20.00-گە دەيىن ساعاتىنا 100 تەڭگە. تولەم كولىكتى تۇراققا قويعان ساتتەن باستاپ العاشقى 30 مينۋت ىشىندە جۇرگىزىلۋى ءتيىس. ال دەمالىس جانە مەرەكە كۇندەرى تۇراقتى پايدالانۋ – تەگىن. تۇراقتى پايدالانۋ ءتارتىبى مەن تولەم تاسىلدەرى جانە پاركوماتتار ورنالاسقان ورىندار تۋرالى www.2888.kz. سايتىنان دا تولىعىراق اقپارات الا الاسىز. سونداي-اق 8-800-080-28-88 تەگىن نومىرىنە نەمەسە قالالىق 109 بىرىڭعاي بايلانىس ورتالىعىنا دا حابارلاسۋىڭىزعا بولادى.
